ଜଗତସିଂହପୁର: ନଦୀରେ ଗାଧୋଇବା ହେଲା କାଳ । ଗାଧୋଇବା ସମୟରେ ନଦୀରେ ଭାସିଗଲେ ତିନି ନାବାଳକ । ଜଗତସିଂହପୁର ନାଉଗାଁ ଥାନା ଅନ୍ତର୍ଗତ ବାଛଳ ଗ୍ରାମ ନିକଟ ଦେବୀନଦୀର ଘଟିଛି ଅଘଟଣ । ଦେବୀନଦୀରେ ଜଣେ ବାଳକ ବୁଡିଯାଇ ମୃତ୍ୟ ବରଣ କରିଥିବା ବେଳେ ଅନ୍ୟ ଦୁଇଜଣ ଉଦ୍ଧାର ହୋଇଥିବା ଖବର ମିଳିଛି । ଘଟଣା ସ୍ଥଳରେ ଅଗ୍ନିଶମ ବାହୀନିର କର୍ମଚାରୀ ପହଞ୍ଚି ମୃତଦେହକୁ ଉଦ୍ଧାର କରିଥିବା ଜଣାପଡ଼ିଛି ।
ସ୍ଥାନୀୟ ଲୋକଙ୍କ କହିବା ଅନୁଯାୟୀ, ଜଗତସିଂହପୁର ଜିଲ୍ଲା ନାଉଗାଁ ଥାନା ଅନ୍ତର୍ଗତ ବାଛଳ ଗ୍ରାମର ତିନିଜଣ ସାଙ୍ଗ ଶାନ୍ତନୁ ନାୟକ, ବିଶ୍ୱଜିତ ରାଉତ ଓ ଅଭିଜିତ ଦାସ ଅପରାହ୍ନ ୪ଟା ସମୟରେ ଶୌଚ ହେବା ପାଇଁ ନଦୀକୁ ଯାଇଥିଲେ । ପ୍ରବଳ ଗୁଳୁଗୁଳି ହେଉ ଥିବାରୁ ତିନିଜଣ ମିଶି ଗାଧୋଇବା ପାଇଁ ମନସ୍ଥ କରିଥିଲେ । ସମସ୍ତେ ଧରାଧରି ହୋଇ ଗାଧୋଇବା ପାଇଁ ନଦୀରେ ପଶିଥିଲେ । ହେଲେ ସେହି ସ୍ଥାନରେ ନଦୀରେ ଗଣ୍ଡ ଥିବାରୁ ତିନିଜଣ ଯାକ ଗଭୀର ଜଳ ମଧ୍ୟକୁ ଚାଲି ଯାଇଥିଲେ । ଏହାଦେଖି କେତେକ ଲୋକେ ଚିତ୍କାର କରିଥିଲେ । ଲୋକଙ୍କ ଚିତ୍କାର ଶୁଣି ବାକି ଲୋକେ ସେଠାରେ ଆସି ଦୁଇଜଣଙ୍କୁ ଯଥା ଶାନ୍ତନୁ ନାୟକ ଓ ବିଶ୍ୱଜିତ ରାଉତକୁ ଉଦ୍ଧାର କରିଥିଲେ । ହେଲେ ଅଭିଜିତ ଦାସ ଗଭୀର ପାଣି ମଧ୍ୟକୁ ଚାଲି ଯାଇଥିବାରୁ ତାଙ୍କୁ ଉଦ୍ଧାର କରି ପାରି ନଥିଲେ ସ୍ଥାନୀୟ ଲୋକେ ।
