ଭଞ୍ଜନଗର: ଜଙ୍ଗଲରେ ଛେଳି ଖୋଜିବା ହେଲା କାଳ । ବାରହା ଶିକାର ପାଇଁ ବିଛା ଯାଇଥିବା ବିଦ୍ୟୁତ୍ ତାରରେ ସଂସ୍ପର୍ଶରେ ଆସି ଜଣଙ୍କର ମୃ୍ତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଛି। ଏଭଳି ଦୁଃଖଦ ଘଟଣା ଘଟିଛି ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ଥାନା ଅଧିନସ୍ଥ ଦୋରାବଗଡ ଗାଁରେ ।
ଭିଡିଓ ସୌଜନ୍ୟ: ପ୍ରତିନିଧି, ଭଞ୍ଜନଗର
ମୃତକ ହେଲେ ଏନ.ନରସିଂହ ଦୋରା । ଗୁରୁତର ହେଲେ ଡି .ନାଗେଶ୍ବର ଦୋରା। ଉଭୟେ ସମ୍ପର୍କରେ ଦୁଇଭାଇ ବୋଲି ଜଣାପଡିଛି । ସୂଚନା ଅନୁଯାୟୀ, ଉଭୟେ ହଜିଯାଇଥିବା ଛେଳିକୁ ଖୋଜିବା ପାଇଁ ନିକଟସ୍ଥ ଜଙ୍ଗଲକୁ ଯାଇଥିଲେ । ହେଲେ ବାରହା ଶିକାର ପାଇଁ ପୂର୍ବରୁ ବିଛା ଯାଇଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସିଥିଲେ । ଫଳରେ ଘଟଣାସ୍ଥଳରେ ହିଁ ସାନଭାଇ ଏନ .ନରସିଂହ ଦୋରା ପ୍ରାଣ ହରାଇଥିଲେ । ବଡଭାଇ ଗୁରୁତର ଆହତ ହୋଇଥିଲେ । ତାଙ୍କୁ ପ୍ରଥମେ ଆସିକା ମେଡିକାଲ ପରେ ବ୍ରହ୍ମପୁର ମେଡିକାଲ ପଠାଯାଇଛି । ଖବର ପାଇ ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
