ଲାହୋର: କିମ୍ବଦନ୍ତୀ କ୍ରିକେଟର ତଥା ପାକିସ୍ତାନର ପୂର୍ବତନ ଷ୍ଟାର ପେସର ୱାକର ୟୁନିସ ପାକିସ୍ତାନ କ୍ରିକେଟ ଟିମର ବୋଲିଂ କୋଚ ହୋଇପାରନ୍ତି । ବୋଲିଂ କୋଚ ପାଇଁ ୱାକର ୟୁନିସ ଆବେଦନ କରିଥିବା ଚର୍ଚ୍ଚା ହେଉଛି । ତେବେ ଏନେଇ ପାକିସ୍ତାନ କ୍ରିକେଟ ବୋର୍ଡ (PCB) ପକ୍ଷରୁ ଏଯାବତ ସ୍ପଷ୍ଟ କରାଯାଇନାହିଁ । ୱାକର ୟୁନିସ ପୂର୍ବରୁ 2ଥର ପାକିସ୍ତାନର ମୁଖ୍ୟ କୋଚ ରହିସାରିଛନ୍ତି । ମେ 2014 ଓ ଏପ୍ରିଲ 2016 ମଧ୍ୟରେ ସେ ପାକିସ୍ତାନର କୋଚ ଭାର ସମ୍ଭାଳିଛନ୍ତି ।
ବିଶ୍ବକପରେ ଦଳର ଖରାପ ପ୍ରଦର୍ଶନ ପରେ PCB ପକ୍ଷରୁ ମୁଖ୍ୟ କୋଚ ସମେତ ସପୋର୍ଟ ଷ୍ଟାଫ ପାଇଁ ଆବେଦନ ଗ୍ରହଣ କରାଯାଉଛି । ଆବେଦନର ଶେଷ ତାରିଖ ଅଗଷ୍ଟ 26 ରହିଛି । ପୂର୍ବରୁ ମୁଖ୍ୟ କୋଚ ଥିବା ମିକି ଆର୍ଥର ଓ ବୋଲିଂ କୋଚ ଆଝାର ମହମ୍ମୁଦଙ୍କୁ ପଦରୁ ହଟାଇ ଦିଆଯାଇଛି ।
ପୂର୍ବତନ କ୍ୟାପଟେନ ମିସବା ଉଲ-ହକ ମୁଖ୍ୟ କୋଚ ହେବା ନେଇ ମଧ୍ୟ ଚର୍ଚ୍ଚା ହେଉଛି । ମିସବାଙ୍କୁ ଅଗଷ୍ଟ 22ରୁ ପାକିସ୍ତାନ ଟିମ ସହିତ 17 ଦିନ ପର୍ଯ୍ୟନ୍ତ କାର୍ଯ୍ୟ କରିବାକୁ ନିଯୁକ୍ତ କରାଯାଇଛି ।
