ବ୍ରହ୍ମପୁର: ମଦ ବିକ୍ରି ବନ୍ଦ ପରେ ସାତ ଜଣଙ୍କ ନାମରେ ମିଥ୍ୟା ମାମଲାକୁ ନେଇ ତାତିଲେ ଗ୍ରାମବାସୀ । ଏଭଳି ଘଟଣା ଦେଖିବାକୁ ମିଳିଛି ଗଞ୍ଜାମ ଜିଲ୍ଲାର ପାଟପୁର ଥାନା ଅନ୍ତର୍ଗତ ଦୟାନିଧିପୁର ପଞ୍ଚାୟତ ନିସ୍ତିପୁରରେ । ସୂଚନା ମୁତାବକ, ନିସ୍ତିପୁର ଗ୍ରାମରେ ପୂର୍ବରୁ ବେଆଇନ ଭାବେ ଚୋରାମଦ ବିକ୍ରି କରାଯାଉଥିଲା । ଯାହାଫଳରେ ଗ୍ରାମରେ ଗତ ଅପ୍ରେଲ ୧ ତାରିଖରେ ମଦମୁକ୍ତ ଗ୍ରାମରେ ପରିଣତ କରିବା ନିମନ୍ତେ ଗ୍ରାମବାସୀ ଓ ମଦ ମାଲିକ ମଧ୍ୟରେ ମଦ ବିକ୍ରି ବନ୍ଦ କରାଯିବା ପାଇଁ ନିଷ୍ପତ୍ତି ନିଆଯାଇଥିଲା ।
ଏହାପରେ ଅପ୍ରେଲ ୨୨ ତାରିଖ ଦିନ ମଦ ମାଲିକମାନେ ବିନା କାରଣରେ ଗ୍ରାମର ସାତ ଜଣକ ବିରୋଧରେ ପାଟପୁର ଥାନାରେ ମିଥ୍ୟା କେସ କରିଥିବା ଗ୍ରାମବାସୀ ଅଭିଯୋଗ କରିଛନ୍ତି । ଏନେଇ ଗ୍ରାମବାସୀ ମେଳି ବାନ୍ଧି ପାଟପୁର ଥାନା ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଥିଲେ । ଆଗାମୀ ଦିନରେ ଉକ୍ତ ସାତ ଜଣଙ୍କ ଉପରୁ ଯଦି କେସ ପ୍ରତ୍ୟାହାର କରାନଯାଏ ତେବେ ଆନ୍ଦୋଳନକୁ ବ୍ୟାପକ କରାଯିବ ବୋଲି ଗ୍ରାମବାସୀ ଚେତାବନୀ ଦେଇଛନ୍ତି ।
ଘଟଣା ପରେ ପାଟପୁର ପୋଲିସ ଥାନା ଅଧିକାରୀ ଅଜୟ ବାରିକ ଓ ସାନଖେମୁଣ୍ଡି ତହସିଲଦାର ଶ୍ରୀନିବାସ ବେହେରା ପହଞ୍ଚି ଲୋକଙ୍କ ସହ ଆଲୋଚନା କରିବା ପରେ ବିକ୍ଷୋଭରୁ ହଟିଥିଲେ ଗ୍ରାମବାସୀ ।
ବ୍ରହ୍ମପୁରରୁ ସମୀର କୁମାର ଆଚାର୍ଯ୍ୟ, ଇଟିଭି ଭାରତ
