ଭଞ୍ଜନଗର: ତିତିଲି ଯାଇ ଫେନି ଗଲାଣି । ହେଲେ ତିତିଲି ପ୍ରଭାବିତ ଚାଷୀଙ୍କୁ ମିଳିପାରିଲା ନାହିଁ କୃଷିବୀମା । ଗଞ୍ଜାମ ସୋରଡ଼ା ବ୍ଲକ ଗୋପାଳପୁର ପଞ୍ଚାୟତର ତତାବାଲି ଗାଁରେ ସମ୍ପୂର୍ଣ୍ଣ ନଷ୍ଟ ହୋଇଯାଇଥିଲା ଖରିଫ ଫସଲ । ଆଉ ଏଥିସହ ଚାଷଜମି ବାଲିଚରରେ ପରିଣତ ହୋଇଥିଲା । ହେଲେ ଆଜି ଯାଏ ମଧ୍ୟ ଚାଷୀଙ୍କୁ କ୍ଷତିପୂରଣ ମିଳିନଥିବା ଅଭିଯୋଗ ହୋଇଛି ।
ବାତ୍ୟା ପରେ ଗାଁକୁ ଛୁଟିଥିଲା ନେତା ଠୁ ମନ୍ତ୍ରୀଙ୍କ ସୁଅ। ଆଉ ଦେଇଯାଇଥିଲେ ପୁଳାପୁଳା ପ୍ରତିଶୃତି । ହେଲେ ତିତିଲି ଗଲା କ୍ଷତିପୂରଣ ବି ଗଲା । ଚାଷୀମାନଙ୍କ ପାଇଁ ସରକାର ଏକ ପ୍ରତିଶତ ସୁଧରେ କୃଷି ଋଣ ପ୍ରଦାନ କରିଥାନ୍ତି । ଆଉ ଏହା ପରେ ଚାଷୀମାନେ ଫସଲ ବୀମାରେ ଅନ୍ତର୍ଭୁକ୍ତ ହୋଇସାରିଛନ୍ତି । ଅନ୍ୟପଟେ ସୋରଡ଼ା ବ୍ଲକର ପ୍ରତ୍ୟେକ ଚାଷୀଙ୍କ ଠାରୁ ରୟାଲ ସୁନ୍ଦରମ କମ୍ପାନୀ ବୀମା କରିବା ନାଁରେ ଦୁଇ ପ୍ରତିଶତ ଟଙ୍କା ନେଇଥିଲା । କିନ୍ତୁ ବର୍ତ୍ତମାନ କମ୍ପାନୀ ବୀମା ଦେବା ବଦଳରେ ବ୍ଲକରୁ ଫେରାର ହୋଇଯାଇଛି । ସେପଟେ ସରକାର ମଧ୍ୟ କମ୍ପାନୀ ବିରୋଧରେ କୌଣସି କାର୍ଯ୍ୟନୁଷ୍ଠାନ ଗ୍ରହଣ କରିନାହାଁନ୍ତି । ଯାହାକୁ ନେଇ ଚାଷୀମାନଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି ।
ତେବେ ଗୋଟିଏ ପଟେ ବୀମାରାଶି ମିଳୁନଥିବା ବେଳେ ଚଳିତ ଖରିଫ ଋତୁରେ ଟଙ୍କା ପରିଶୋଧକୁ ନେଇ ଚାଷୀକୂଳ ଏବେ ଚିନ୍ତାରେ । କିନ୍ତୁ ସେପଟେ ସରକାର ଚାଷୀଙ୍କ ପାଇଁ ମାଳମାଳ ଯୋଜନା କରିବା ସହ ଲୋକଙ୍କ ଦୃଷ୍ଟି ଆକର୍ଷଣ ପାଇଁ ଟଙ୍କା ଖର୍ଚ୍ଚ କରୁଥିବା ବେଳେ କୃଷିବୀମା ରାଶି ପ୍ରଦାନ କରିବାକୁ ଦାବି କରିଛନ୍ତି ଗ୍ରାମବାସୀ ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
