ବ୍ରହ୍ମପୁର: ସୁନା ସଫେଇ ଆଳରେ ଠକେଇ କରୁଥିବା ଗ୍ୟାଙ୍ଗକୁ ଗିରଫ କରିଛି ପୋଲିସ । ବ୍ରହ୍ମପୁର ପୋଲିସ ଜିଲ୍ଲାର ଗୋଳନ୍ଥରା ଥାନା ଅଞ୍ଚଳରେ ଗତ ସେପ୍ଟେମ୍ବର ମାସର 24 ତାରିଖରେ ଏକ କେମିକାଲ ପାଉଡର ନାମରେ ସୁନା ଅଳଙ୍କାର ସଫେଇ କରିବା ବାହାନାରେ ସୁନା ଅଳଙ୍କାର ନେଇଯିବା ଅଭିଯୋଗ ଘଟଣାର ତଦନ୍ତ କରିଥିଲା । ଏନେଇ ଗ୍ୟାଙ୍ଗର ଦୁଇ ସଦସ୍ୟ ସମେତ ତିନି ଜଣ ଅଭିଯୁକ୍ତଙ୍କୁ ଗିରଫ କରିଛି ପୋଲିସ । ଏଥିସହ ସେମାନଙ୍କ ନିକଟରୁ 186.5 ଗ୍ରାମର ଚୋରି ସୁନା ଅଳଙ୍କାର ଜବତ କରାଯାଇଛି ।
ସୂଚନା ଅନୁଯାୟୀ, ରାଳବ ଗ୍ରାମର ତୁଳସୀ ବିହାର ପ୍ରଥମ ଲାଇନରେ ରହୁଥିବା ନିରୂପମା ନନ୍ଦଙ୍କ ଘରେ ଦୁଇ ଜଣ ଅଜଣା ବ୍ୟକ୍ତି ବିଶେଷ ପ୍ରବେଶ କରି କେମିକାଲ ପାଉଡର ବ୍ୟବହାର କରି ସୁନା ଓ ରୂପା ସଫେଇ କରିବାର ପ୍ରତିଶୃତି ଦେଇଥିଲେ। ଏହାକୁ ନେଇ ମହିଳା ଜଣଙ୍କ ନିଜର ଗୋଟିଏ ସୁନା ଚେନ୍ , ମଙ୍ଗଳସୁତ୍ର ଓ ରୂପା ବ୍ରେସଲେଟ୍ ସଫେଇ କରିବା ପାଇଁ ଦେଇଥିଲେ । ହେଲେ ଏହି ଦୁଇ ଅଭିଯୁକ୍ତ ବାହାନା କରି ସୁନା ଚେନ୍ ଓ ମଙ୍ଗଳସୁତ୍ର କୁ ଚୋରି କରି ନେଇ ଯାଇଥିଲେ । ଯାହାକୁ ନେଇ ପୋଲିସ ଅଭିଯୋଗ ପାଇବା ପରେ ଘଟଣାକୁ ଅତ୍ୟନ୍ତ ଗୁରୁତ୍ୱର ସହ ତଦନ୍ତ କରି ବିହାର ରାଜ୍ୟର ଭୋଗାଲପୁର ଅଞ୍ଚଳର ଭାରତ ଶାହା ଓ ଦିନେଶ ପ୍ରସାଦ ଶାହା କୁ ଅଟକାଇ ତଦନ୍ତ କରିବା ପରେ ସେମାନେ ଚାରି ଜଣ ଦୁବୁର୍ତ୍ତ ଏପରି ଘଟଣା ଘଟାଉଥିବା ପୋଲିସ ନିକଟରେ ସ୍ବୀକାର କରିଥିଲେ ।
ତେବେ ମୁଖ୍ୟତଃ ଏହି ଗ୍ୟାଙ୍ଗ୍ ସଦସ୍ୟ ମାନେ ବରିଷ୍ଠ ମହିଳାଙ୍କୁ ସୁନା ସଫେଇ କରିବାର ଆଳ ଦେଖାଇ ଏପରି କରି ଆସୁଥିବା ଜଣାପଡିଛି । ଏହି ଘଟଣାରେ ପୋଲିସ ବ୍ରହ୍ମପୁର ସହରର ଲୋକେଶ ଓରଫ ପି.ରାଜେଶ କୁମାର ଙ୍କୁ ମଧ୍ୟ ଗିରଫ କରିଛି । ପୋଲିସ ତଦନ୍ତ ସମୟରେ ଗିରଫ ଅଭିଯୁକ୍ତ ମାନେ ଗୋଳନ୍ଥରା , ଦିଗପହଣ୍ଡି , କେ.ନୂଆଗାଁ ଏବଂ ଆନ୍ଧ୍ରପ୍ରଦେଶର ଶ୍ରୀକାକୁଲମ୍ ଜିଲ୍ଲାର ମାଲାପୁଟି ଥାନା ଅଞ୍ଚଳର ଗୋଟିଏ ଲେଖାଏଁ ମାମଲାରେ ସଂପୃକ୍ତି ରହିଥିବା ପୋଲିସ ତଦନ୍ତରୁ ଜଣାପଡିଥିବା ବେଳେ ଘଟଣାର ଅଧିକ ଖୋଳତାଡ କରୁଛି ପୋଲିସ ।
ଇଟିଭି ଭାରତ, ବ୍ରହ୍ମପୁର
