ଭିଜିଲାନ୍ସ ଜାଲରେ RWS&Sର କନିଷ୍ଠ ଯନ୍ତ୍ରୀ; ୫ଟି ସ୍ଥାନରେ ଏକକାଳୀନ ରେଡ୍

ଭୁବନେଶ୍ବର RWS&Sର କନିଷ୍ଠ ଯନ୍ତ୍ରୀଙ୍କ ଘରେ ଭିଜିଲାନ୍ସ ରେଡ୍ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ । ଅଧିକ ପଢନ୍ତୁ

ବ୍ରହ୍ମପୁର: ଭିଜିଲାନ୍ସ ସ୍କାନରରେ RWS&Sର କନିଷ୍ଠ ଯନ୍ତ୍ରୀ(JE) । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଘରେ ପଶିଲା ଭିଜିଲାନ୍ସ । ଭିଜିଲାନ୍ସ ଟିମ୍ ଆଜି(ଗୁରୁବାର) ସକାଳୁ ଭୁବନେଶ୍ବର RWS&Sର କନିଷ୍ଠ ଯନ୍ତ୍ରୀ ସୁନୀଲ କୁମାର ପାଢୀଙ୍କ ଘରେ ଚଢାଉ କରିଛି । ତାଙ୍କର ଗଞ୍ଜାମ ଜିଲ୍ଲା ଆସିକା ସ୍ଥିତ ପୈତୃକ ବାସଭବନ ସମେତ ୫ଟି ଠିକଣାରେ ରେଡ୍ ହେଉଛି । ଆସିକା, ଭଞ୍ଜନଗର, ବ୍ରହ୍ମପୁର, କଟକ ଓ ଭୁବନେଶ୍ବର ସ୍ଥିତ ଘରେ ଏକକାଳୀନ ରେଡ୍ ଚାଲିଛି । ତେବେ ଏହି ରେଡ୍ ବେଳେ କନିଷ୍ଠ ଯନ୍ତ୍ରୀ କୁଆଡେ ଛୁ' ମାରିଥିବା ନେଇ ସୂଚନା ମିଳିଛି । ଏନେଇ ଭିଜିଲାନ୍ସ ପକ୍ଷରୁ କୌଣସି ପ୍ରତିକ୍ରିୟା ଦିଆଯାଇନି ।

ସୂଚନା ଅନୁସାରେ, ସୁନୀଲ କୁମାର ପାଢୀ ଭୁବନେଶ୍ବରର ଆର୍.ଡବ୍ଲୁ.ଏସ୍.ଏସ୍ (RWS&S) କନିଷ୍ଠ ଯନ୍ତ୍ରୀ ଭାବରେ କାର୍ଯ୍ୟ କରୁଥିଲେ । ଆୟ ବହିର୍ଭୂତ ସମ୍ପତ୍ତି ଠୁଳ କରିଥିବା ନେଇ ତାଙ୍କ ବିରୋଧରେ ଭିଜିଲାନ୍ସରେ ଅଭିଯୋଗ ହୋଇଥିଲା । ଯାହାପରେ ଆଜି ସକାଳୁ ସକାଳୁ ଭିଜିଲାନ୍ସ ଟିମ୍ ତାଙ୍କର ଆସିକା ବାସଭବନ ସମେତ ୫ଟି ଠିକଣାରେ ଏକକାଳୀନ ରେଡ୍ ଜାରି ରଖିଛି । ଏହି ଚଢାଉରେ ଓଡ଼ିଶା ଭିଜିଲାନ୍ସର ୬ ଜଣ ଡିଏସପି, ୩ ଜଣ ଇନସିପେକ୍ଟର, ୭ ଜଣ ଏ.ଏସ୍.ଆଇ ସାମିଲ ହୋଇଛନ୍ତି ।

ଗଞ୍ଜାମ ଜିଲ୍ଲାର ଆସିକା ସ୍ଥିତ ସୁନାମ୍ବ ସାହିର ପୈତୃକ ବାସଭବନ, ଆସିକା ମାର୍କେଟ କମ୍ପ୍ଲେକ୍ସ, ଭଞ୍ଜନଗରରେ ରହିଥିବା ସମ୍ପର୍କୀୟଙ୍କ ଘର, ଭୁବନେଶ୍ବରରେ ଥିବା ସରକାରୀ କାର୍ଯ୍ୟାଳୟ ଏବଂ ଜାଗମରା ସ୍ଥିତ ମଲିକା କମ୍ପ୍ଲେକ୍ସର ପାଢୀ ଭିଲାରେ ଏହି ଚଢାଉ କରାଯାଇଛି । ଭିଜିଲାନ୍ସ ଅଧିକାରୀମାନେ କନିଷ୍ଠ ଯନ୍ତ୍ରୀଙ୍କ ଘରର ବିଭିନ୍ନ କାଗଜପତ୍ର ସହ ବ୍ୟାଙ୍କ ପାସବୁକ ସହ ଅନ୍ୟ ଦସ୍ତାବିଜ୍‌ ଛାନଭିନ୍ କରୁଛନ୍ତି । ଏନେଇ ଅଧିକ ସୂଚନାକୁ ଅପେକ୍ଷା କରାଯାଇଛି । ଏ ସମ୍ପର୍କରେ ଭିଜିଲାନ୍ସ ପକ୍ଷରୁ ଏଯାବତ୍ କୌଣସି ପ୍ରତିକ୍ରିୟା ମିଳିପାରି ନାହିଁ ।

ଭିଜିଲାନ୍ସ ଜାଲରେ ରାଜ୍ୟର ଗୋଟିଏ ପରେ ଗୋଟିଏ ସରକାରୀ ବାବୁ ଛନ୍ଦି ହେଉଛନ୍ତି । ଦୁଇ ଦିନ ତଳେ କୋରାପୁଟ ଜିଲ୍ଲା ବୈପାରୀଗୁଡା ଥାନା ଅଧିକାରୀ(IIC) ସୁଶାନ୍ତ କୁମାର ଶତପଥୀଙ୍କ ଘରେ ଭିଜିଲାନ୍ସ ରେଡ୍ କରିଥିଲା ।

ଇଟିଭି ଭାରତ, ବ୍ରହ୍ମପୁର