ବ୍ରହ୍ମପୁର: ଆଉ ଦିନ କେଇଟା ପରେ ଆଲୋକର ପର୍ବ ଦୀପାବଳି । ଏହି ସମୟରେ ଦକ୍ଷିଣ ଓଡ଼ିଶାର ସର୍ବବୃହତ ବାଣ ବଜାର ବ୍ରହ୍ମପୁରର ବାଲୁଙ୍କେଶ୍ବର ବାଣ ବଜାର ହୋଇପଡିଥାଏ ଚଳଚଞ୍ଚଳ । ଏଠାକାର ବ୍ୟବସାୟୀମାନେ ରାଜ୍ୟ ତଥା ରାଜ୍ୟ ବାହାରୁ ବାଣ ଆଣି ବିକ୍ରି କରିଥାନ୍ତି । କିନ୍ତୁ ଚଳିତବର୍ଷ ଏହି ବଜାରର ବ୍ୟବସାୟୀମାନେ ସରକାରୀ ଲାଇସେନ୍ସ ନଥାଇ ବାଣ ଗଚ୍ଛିତ ରଖିଥିବା ଅଭିଯୋଗରେ ପୋଲିସ ଓ ଅଗ୍ନିଶମ ବିଭାଗ ପକ୍ଷରୁ ହୋଇଛି ମିଳିତ ଚଢ଼ାଉ ।
ଜିଲ୍ଲା ପ୍ରଶାସନର ନିର୍ଦ୍ଦେଶକ୍ରମେ ଉଭୟ ବିଭାଗ ପକ୍ଷରୁ ବ୍ୟବସାୟୀଙ୍କୁ ପ୍ରଥମେ ନୋଟିସ ଜାରି କରାଯାଇଥିଲା । ତେବେ ପ୍ରଶାସନ ନୋଟିସର କୌଣସି ଉତ୍ତର ନଦେଇ ଓଲଟା ଦୋକାନ ବନ୍ଦ ରଖିଥିଲେ ଦୋକାନୀ । ଯାହାପରେ ମାଜିଷ୍ଟ୍ରେଟଙ୍କ ଉପସ୍ଥିତିରେ ପୋଲିସ ଓ ଅଗ୍ନିଶମ ବିଭାଗ ଅଧିକାରୀମାନେ ଦୋକାନର ତାଲା ଭାଙ୍ଗି ସେଠାରେ କେତେ ପରିମାଣର ବାଣ ରହିଛି ତାହାକୁ ଯାଞ୍ଚ କରିବା ସହ ଦୋକାନଗୁଡିକୁ ସିଲ କରି ଦିଆଯାଇଛି ।
ମୁଖ୍ୟତଃ ବ୍ରହ୍ମପୁରର ବାଲୁଙ୍କେଶ୍ବର ବାଣ ବ୍ୟବସାୟୀ ସଂଘ ପକ୍ଷରୁ ନୀଳକଣ୍ଠେଶ୍ବର ଅଞ୍ଚଳରେ ରହିଥିବା ବାଣବଜାରରେ ମୋଟ ୪୮ଟି ବାଣ ଦୋକାନ ପାଇଁ ପ୍ରତିବର୍ଷ ପ୍ରଶାସନ ପକ୍ଷରୁ ସୀମିତ ସମୟ ପାଇଁ ଅନୁମତି ପ୍ରଦାନ କରାଯାଇଥାଏ । ହେଲେ ସେଠାରେ ଅଧିକ ବଖରା ଘର ରହିଥିବା ଏବଂ ଚଳିତବର୍ଷ ବିନା ଅନୁମତିରେ ବାଣ ମହଜୁଦ ରଖିଥିବା ଯୋଗୁଁ ଏଭଳି ଚଢ଼ାଉ କରାଯାଇଛି । ଅପରପକ୍ଷେ ବ୍ୟବସାୟୀମାନେ ଚଳିତବର୍ଷ ସରକାରୀ ଭାବରେ ଲାଇସେନ୍ସ ପ୍ରଦାନ କରିବା ପାଇଁ ଆବେଦନ କରିଥିବା ବେଳେ ଅଗ୍ନିଶମ ବିଭାଗର ସ୍ବୀକୃତି ମିଳିନଥିବାରୁ ତାହା ହୋଇପାରିନଥିବା ଜଣାପଡିଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
