ଭଞ୍ଜନଗର: ଗଞ୍ଜାମ ଜିଲ୍ଲା ଜଗନ୍ନାଥ ପ୍ରସାଦ ଥାନା ତନ୍ତିସାହିରେ ଜୀବନ୍ତ ବାଛୁରୀକୁ ହତ୍ୟା କରି ମାଂସ ବିକ୍ରି ପାଇଁ ଯୋଜନା କରୁଥିଲେ 3 ଗୋ ହତ୍ୟାକାରୀ । ଏହି ସମୟରେ ସେମାନେ ଗ୍ରାମବାସୀଙ୍କ ହାବୁଡରେ ପଡିଥିବାବେଳେ ଗ୍ରାମବାସୀ ସେମାନଙ୍କୁ ପୋଲିସ ଜିମା ଦେଇଛନ୍ତି ।
ହତ୍ୟାକାରୀମାନେ ହେଲେ ହାଟପଦା ହରିଜନ ସାହିର ବାବୁଲା ନାଇକ, ହରି ନାଇକ, ମୁନା ନାଇକ l ମିଳିଥିବା ସୂଚନା ଅନୁସାରେ ଶୁକ୍ରବାର ରାତିରେ ଗ୍ରାମର ଜଳିସାହିର ଲକ୍ଷଣ ସେଠିଙ୍କ ଗୁହାଳରୁ ଗୋଟିଏ ଦେଢ଼ ବର୍ଷର ବାଛୁରୀ ଚୋରି ହୋଇଥିଲା । ଶନିବାର ସକାଳେ ଲକ୍ଷଣ ଏ ସମ୍ପର୍କରେ ଜାଣିବାକୁ ପାଇଥିଲେ । ପରେ ବହୁ ଖୋଜାଖୋଜି ପରେ ବାଛୁରୀଟିକୁ ପାଇନଥିଲେ । ସେପଟେ ସନ୍ଧ୍ୟା 6ଟା ବେଳେ ସ୍ଥାନୀୟ ଶୁଣ୍ଢୀ ଆମ୍ବତୋଟାରେ ଗୋମାଂସ କାଟୁଥିବାର ଦେଖିବାକୁ ମିଳିଥିଲା ।
ଗ୍ରାମବାସୀ ସେହି ସ୍ଥାନକୁ ଯାଇ ପାଟିତୁଣ୍ଡ କରିବାରୁ ଘଟଣାସ୍ଥଳରେ ଭିଡ଼ ଜମିଥିଲା । ତେବେ ଏହି ଘଟଣାରେ ସମ୍ପୃକ୍ତ ବାବୁଲା, ହରି, ମୁନାକୁ କିଛି ଗ୍ରାମବାସୀ ଅଟକ ରଖି ପୋଲିସକୁ ଖବର ଦେଇଥିଲେ । ଏ ସମ୍ପର୍କରେ ବାଛୁରୀ ମାଲିକ ଲକ୍ଷଣ ସେଠାରେ ପହଞ୍ଚି ତାଙ୍କ ବାଛୁରୀକୁ ଚିହ୍ନଟ କରିବାରୁ ସେଠାରେ ଉତ୍ତେଜନା ମୂଳକ ପରିସ୍ଥିତି ସୃଷ୍ଟି ହୋଇଥିଲା । ଖବର ପାଇ ଜଗନ୍ନାଥ ପ୍ରସାଦ ପୋଲିସ ପହଞ୍ଚି 3 ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
