ବ୍ରହ୍ମପୁର: ଚାଲିଛି ପ୍ରସିଦ୍ଧ ସିନ୍ଦେରେଶ୍ୱର ମନ୍ଦିରର ରୂପାନ୍ତରୀକରଣ କାର୍ଯ୍ୟ । ଆଜି ସିନ୍ଦେରେଶ୍ୱର ମନ୍ଦିରରେ ପହଞ୍ଚି ସ୍ଥିତି ଅନୁଧ୍ୟାନ କଲେ 5T ଅଧ୍ୟକ୍ଷ ଭିକେ ପାଣ୍ଡିଆନ । ଗଞ୍ଜାମ ଜିଲ୍ଲାର ଅଷ୍ଟଶମ୍ଭୁ ମଧ୍ୟରେ ଅନ୍ୟତମ ହେଉଛି ପ୍ରସିଦ୍ଧ ସିନ୍ଦେରେଶ୍ୱର ମନ୍ଦିର । ତେବେ ଗସ୍ତର ଦ୍ୱିତୀୟ ଦିନରେ ଜିଲ୍ଲାର ଛତ୍ରପୁର ବ୍ଲକରେ ରହିଥିବା ପ୍ରସିଦ୍ଧ ସିନ୍ଦେରେଶ୍ୱର ମନ୍ଦିରରେ ପହଞ୍ଚିଥିଲେ ପାଣ୍ଡିଆନ । ସେଠାରେ ସେ ରୂପାନ୍ତରୀକରଣ ପାଇଁ କରାଯାଇଥିବା ଯୋଜନାକୁ ଅନୁଧ୍ୟାନ କରିବା ସହିତ ମହାଦେବଙ୍କୁ ଦର୍ଶନ କରିଛନ୍ତି ।
ଏହି ଅବସରରେ ଉପସ୍ଥିତ ଜନତାଙ୍କୁ ଉଦବୋଧନ ଦେଇଛନ୍ତି 5ଟି ଅଧ୍ୟକ୍ଷ । ସାରା ରାଜ୍ୟରେ ସମସ୍ତ ହାଇସ୍କୁଲ ଗୁଡିକର ରୂପାନ୍ତରୀକରଣ ପରେ ବର୍ତ୍ତମାନ ଉଚ୍ଚ ମାଧ୍ୟମିକ ବିଦ୍ୟାଳୟ ଗୁଡିକରେ ରୂପାନ୍ତରୀକରଣ ହେବ । ତେବେ ପୁରୀ ଶ୍ରୀମନ୍ଦିର ଠାରୁ ଆରମ୍ଭ କରି ରାଜ୍ୟର ପ୍ରମୁଖ ମନ୍ଦିର ଗୁଡିକ ରୂପାନ୍ତରୀକରଣ କରାଯାଉଥିବାବେଳେ ଗଞ୍ଜାମ ଜିଲ୍ଲାର ଛତ୍ରପୁର ନିର୍ବାଚନମଣ୍ଡଳୀର ମା' ରାମଚଣ୍ଡୀଙ୍କ ମନ୍ଦିର, ପ୍ରସିଦ୍ଧ ବଟେଶ୍ୱର ମନ୍ଦିର ଏବଂ ସିନ୍ଦେରେଶ୍ୱର ମନ୍ଦିରର ରୂପାନ୍ତରୀକରଣ କାର୍ଯ୍ୟ ଚାଲିଛି ।
ଏହି ତିନି ମନ୍ଦିର ଭକ୍ତମାନଙ୍କ ପାଇଁ ଏକ ଉକୃଷ୍ଟ ଦର୍ଶନୀୟ ସ୍ଥାନ ହେବ ବୋଲି ଅନେକ ଆଶା ରହିଛି । ତେବେ ଦୁଇ ଦିନିଆ ଗଞ୍ଜାମ ଜିଲ୍ଲା ଗସ୍ତରେ ଆସିଥିବା ରାଜ୍ୟର 5T ତଥା ନବୀନ ଓଡିଶାର ଅଧ୍ୟକ୍ଷ ଭି.କେ.ପାଣ୍ଡିୟାନ ରୂପାନ୍ତରୀକରଣ କାର୍ଯ୍ୟର ସମୀକ୍ଷା କରିଛନ୍ତି । ଦ୍ୱିତୀୟ ଦିନରେ ଗୋପାଳପୁର ନିର୍ବାଚନମଣ୍ଡଳୀର ରଙ୍ଗେଇଲୁଣ୍ଡା ବ୍ଲକର ପ୍ରସିଦ୍ଧ ଧବଳେଶ୍ୱର ଶୈବ ପୀଠକୁ ଗସ୍ତ କରି ସେଠାକାର ଉନ୍ନୟନମୂଳକ କାର୍ଯ୍ୟ ସହିତ ରୂପାନ୍ତୀକରଣ କାର୍ଯ୍ୟକୁ ସେ ଅନୁଧ୍ୟାନ କରିଛନ୍ତି ।
ଏହା ବି ପଢନ୍ତୁ...ଦୁଇଦିନିଆ ଗଞ୍ଜାମ ଗସ୍ତରେ 5ଟି ଅଧ୍ୟକ୍ଷ ପାଣ୍ଡିଆନ
ସେହିପରି ଖଲ୍ଲିକୋଟ ନିର୍ବାଚନମଣ୍ଡଳୀର ପୁରଷୋତ୍ତମପୁର ସ୍ଥିତ ପ୍ରସିଦ୍ଧ ତୁମ୍ୱେଶ୍ୱର ଶୈବପୀଠର ଚାଲିଥିବା ରୂପାନ୍ତୀକରଣ କାର୍ଯ୍ୟକୁ ଅନୁଧ୍ୟାନ କରିବା ସହ ପୋଲସରାର ପ୍ରସିଦ୍ଧ ମାରଦା ଜଗନ୍ନାଥ ମନ୍ଦିରର ରୂପାନ୍ତୀକରଣ କାର୍ଯ୍ୟକୁ ଅନୁଧ୍ୟାନ କରିଛନ୍ତି ପାଣ୍ଡିଆନ । ଏହା ସହିତ କବିସୂର୍ଯ୍ୟନଗରର ଆଠଗଡ ଜଗନ୍ନାଥ ମନ୍ଦିର ରୂପାନ୍ତୀକରଣ କାର୍ଯ୍ୟ ଏବଂ ଆସିକା ସହରରେ ରହିଥିବା ପ୍ରସିଦ୍ଧ ମା' ଖମ୍ୱେଶ୍ୱର ମନ୍ଦିରର ରୂପାନ୍ତୀକରଣ କାର୍ଯ୍ୟ ସହିତ ଉନ୍ନୟନ କାର୍ଯ୍ୟର ସମୀକ୍ଷା କରିଛନ୍ତି । ଶେଷରେ ଜିଲ୍ଲାରେ ଭଞ୍ଜନଗର ସ୍ଥିତ ପ୍ରସିଦ୍ଧ ଜଗନ୍ନାଥ ମନ୍ଦିର ଏବଂ କୁଲାଡର ମା' ବ୍ୟାଘ୍ରଦେବୀ ମନ୍ଦିରର ଉନ୍ନତିମୂଳକ ଓ ରୂପାନ୍ତୀକରଣ କାର୍ଯ୍ୟକୁ ଅନୁଧ୍ୟାନ କରି ରାଜଧାନୀ ଭୁବନେଶ୍ୱରକୁ ଫେରିଛନ୍ତି 5T ଅଧ୍ୟକ୍ଷ ପାଣ୍ଡିଆନ ।
ଇଟିଭି ଭାରତ, ବ୍ରହ୍ମପୁର
