ଭଞ୍ଜନଗର: କେନ୍ଦ୍ର ଓ ରାଜ୍ୟ ସରକାର ଆଦିବାସୀଙ୍କ ବିକାଶ ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । ହେଲେ ଆଦିବାସୀଙ୍କ ଦୁଃଖ ଯେମିତି ସେମିତି ରହିଛି । କେବଳ କାଗଜ କଲମରେ ସୀମିତ ରହିଯାଇଛି ସେମାନଙ୍କ ବିକାଶ । ଆମେ କହୁଛୁ ଗଞ୍ଜାମ ଜିଲ୍ଲା ସୋରଡା ବ୍ଲକ ଗାଜଲବାଡି ପଞ୍ଚାୟତର ମିନାଯୋଡି ଗ୍ରାମର କଥା । ଯେଉଁଠି 25ରୁ ଉର୍ଦ୍ଧ୍ବ ଆଦିବାସୀ ପରିବାର ବସବାସ କରନ୍ତି । ହେଲେ ଶିକ୍ଷା, ସ୍ବାସ୍ଥ୍ୟ ଓ ଗମନାଗମନ ଭଳି ମୌଳିକ ସୁବିଧାରୁ ବଞ୍ଚିତ ରହିଛନ୍ତି ଏଠାକାର ଅଧିବାସୀ ।
ବ୍ଲକ ଯିବାକୁ ହେଲେ ପ୍ରାୟ 25 କିଲୋମିଟର, ପଞ୍ଚାୟତକୁ ଯିବାକୁ ହେଲେ 10 କିଲୋମିଟର କଚ୍ଚା ରାସ୍ତା ଅତିକ୍ରମ କରିବାକୁ ହୁଏ । ସେପଟେ ଗାଁରେ ଥିବା ଦୁଇ ଦୁଇଟି ନଳକୂପ ଖୋଳି ଚୁପ ବସିଛି ପ୍ରଶାସନ । ଆଉ ଗାଁରେ ଥିବା ନଳକୂପରୁ ପାଣି ବାହାରୁଛି କି ନାହିଁ ଦେଖିବାକୁ ସରକାରୀ ବାବୁଙ୍କ ପାଖରେ ସମୟ ନାହିଁ । ଏହି ନୀରିହ ଆଦିବାସୀ ବ୍ଲକ ପ୍ରଶାସନ ପାଖରେ ଗୁହାରି କଲେ ମଧ୍ୟ କେହି କର୍ଣ୍ଣପାତ କରୁନଥିବା ଅଭିଯୋଗ କରିଛନ୍ତି ଗ୍ରାମବାସୀ।
ଜଳକଷ୍ଟରୁ ମୁକୁଳିବା ପାଇଁ ଝରଣା ପାଣି ଆଣି ବ୍ୟବହାର କରୁଛନ୍ତି ଗ୍ରାମବାସୀ । ଗାଁରେ ଏବେଠାରୁ ଜଳକଷ୍ଟ ଲାଗି ରହିଥିବା ବେଳେ ଆଗକୁ ଆସୁଛି ଖରା ଦିନ । ଅନ୍ୟପଟେ ଗାଁକୁ ଭଲ ରାସ୍ତା ଖଣ୍ଡେ ନ ଥିବାରୁ ସମସ୍ତ ମୌଳିକ ସୁବିଧାରୁ ବଞ୍ଚିତ ହେଉଛନ୍ତି ଏହି ଆଦିବାସୀ । ବଣ ଜଙ୍ଗଲରେ ମାଙ୍କଡ଼ ପରି ଚଳୁଛୁ ବୋଲି କହିଛନ୍ତି ଗ୍ରାମବାସୀ ।
ଦେଶ 71ତମ ସାଧାରଣତନ୍ତ୍ର ଦିବସ ପାଳନ କରୁଥିବା ବେଳେ ଏହି ଆଦିବାସୀ ପରାଧୀନ ହୋଇ ରହିଯାଇଛନ୍ତି । ନା ଅଛି ଭଲ ରାସ୍ତା ନା ଅଛି ପାନୀୟ ଜଳର ସୁବିଧା, ନା ପାଇପାରୁଛନ୍ତି ସ୍ବାସ୍ଥ୍ୟ ସେବା । ଏହି ଆଦିବାସୀଙ୍କ ନିଜସ୍ବ ଉଦ୍ୟମରେ ବର୍ଷା ଦିନେ ଝରଣାରୁ ଡଙ୍ଗା ସାହାଯ୍ୟରେ ପାଣି ଆଣି ଚାଷ କାର୍ଯ୍ୟ କରିଥାନ୍ତି । ଆଉ ବର୍ଷା ଋତୁ ପରେ ଆସ୍ତେ ଆସ୍ତେ ଝରଣା ଶୁଖିଯାଏ । ଫଳରେ ଚାଷ କାର୍ଯ୍ୟ ଠପ ହୋଇଯାଏ ।
ବର୍ଷା ପାଣିରେ ଚାଷ କରି ଯାହା କିଛି ଅମଳ କରିଥାନ୍ତି ସେତିକିରେ ବର୍ଷ ସାରା ଚଳିବାକୁ ପଡିଥାଏ ଏମାନଙ୍କୁ। କେବେ ଏହି ଆଦିବାସୀ ଗ୍ରାମ ଉପରେ ସରକାରଙ୍କ ଦୃଷ୍ଟି ପଡିବ ତାହା ଦେଖିବାକୁ ବାକି ରହିଲା ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
