ଭଞ୍ଜନଗର: ତିନିବର୍ଷର ଶିକୁଳି ଜୀବନ । 17 ବର୍ଷରୁ ମାନସିକ ବିକାରଗ୍ରସ୍ତ ଅବସ୍ଥା । ନାଁ ,ରଥ ବଳିଆର ସିଂ । ଘର ଗଞ୍ଜାମ ସୋରଡା ବ୍ଲକ ବାଲିନାଳ । ଉରବାନ ବଳିଆର ସିଂଙ୍କ ବଡପୁଅ। ସବୁଜ ଶ୍ୟାମଳ ଗାଁରେ ହାତରେ ଶିକୁଳି ଲଗାଇ ବୁଲୁଥାନ୍ତି ଏହି ମାନସିକ ରୋଗୀ ଜଣକ । ପୁଅକୁ ଭଲ କରିବା ପାଇଁ ବାପା ମା ଆର୍ଥିକ ସମସ୍ୟା ସତ୍ତ୍ବେ କେତେ କ’ଣ କରିଛନ୍ତି । ହେଲେ ସବୁଆଡୁ ହେବାକୁ ପଡିଛି ନିରାଶ ।
ସ୍ତ୍ରୀ, ଦୁଇ ପୁଅ ଓ ଝିଅକୁ ନେଇ ଉରବାନ ବଳିଆର ସିଂଙ୍କ ସଂସାର । ହେଲେ ଠିକ 17 ବର୍ଷ ପୂର୍ବ ଉରବାନଙ୍କ ବଡପୁଅ ଓ ଝିଅ ମାନସିକ ବିକୃତ ହୁଅନ୍ତି । ପରେ ଗୁଜୁରାଟର ଏକ ଆଶ୍ରମରେ ଚିକିତ୍ସିତ ହୁଏ ଝିଅ, କିନ୍ତୁ ଏବେ ତାର ଖୋଜ ଖବର ନାହିଁ । ଏପଟେ ଅନ୍ୟଲୋକଙ୍କୁ ମାରପିଟ କରୁଥିବାରୁ 3 ବର୍ଷ ହେଲା ବଡପୁଅ ହାତରେ ପଡିଛି ବେଡି । ଉତ୍ତମ ଚିକିତ୍ସା ପାଇଁ ଆର୍ଥିକ ସମ୍ବଳ ବି ନାହିଁ ।
ଗାଁର ଏଇ ସାଧାସିଧା ଗରିବ ବ୍ୟକ୍ତି ଉରବାନ ଏହା ମଧ୍ୟ ଜାଣି ନାହାଁନ୍ତି ଯେ ପୁଅକୁ ଶିକୁଳିରେ ବାନ୍ଧି ସେ ତାର ମାନବାଧିକାର ଉଲଙ୍ଘନ କରୁଛନ୍ତି । ଶିକ୍ଷା, ସ୍ବାସ୍ଥ୍ୟଠାରୁ ଅନେକ ଦୂରରେ ଥିବା ଏ ଗାଁର ଉରବାନ ପରିବାର ପାଇଁ ଦୁଇ ଓଳି ଦୁଇ ମୁଠା ଖାଦ୍ୟ ଯୋଗାଡ କରିବା ପାଇଁ ସଂଘର୍ଷ କରୁଛନ୍ତି । ଆର୍ଥିକ ଅନଟନ, ଦାରୁଣ ରୋଗ ଉଜାଡି ଦେଇଛି ତାଙ୍କ ସଂସାର। ପେଟ ପାଇଁ ସଙ୍ଘର୍ଷ କରୁଥିବା ଏଇ ମଣିଷ ପାଖରେ ରୋଗ ଉପଶମ ପାଇଁ ଅର୍ଥ ନାହିଁ । ସରକାରୀ ସାହାୟତା ଅପେକ୍ଷାରେ ବିତୁଛି ପ୍ରତିଟି ମୂହୁର୍ତ୍ତ ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
