ବ୍ରହ୍ମପୁର: ଅଜଣା ଗାଡି ଧକ୍କାରେ ଜିଲ୍ଲାରେ ପୁଣି ଗୋଟିଏ କୃଷ୍ଣସାର ମୃଗର ମୃତ୍ୟୁ ଘଟିଛି । ଜିଲ୍ଲାର ଦିଗପହଣ୍ଡିଠାରୁ ବ୍ରହ୍ମପୁର ରାସ୍ତାରେ ରାତ୍ର ସମୟରେ ଏହି ଦୁର୍ଘଟଣା ଘଟିଥିବା ଜଣାପଡିଛି । ଅନ୍ୟପଟେ ଦିଗପହଣ୍ଡି ବନବିଭାଗ ପକ୍ଷରୁ ମୃତ କୃଷ୍ଣସାର ମୃତଦେହକୁ ଉଦ୍ଧାର କରାଯାଇଛି।
ମୁଖ୍ୟତଃ କୌଣସି ଏକ ଅଜଣା ଭାରିଯାନ ଗାଡି ଧକ୍କା ଦେଇ କେଉଁଆଡେ ଫେରାର ହୋଇଯାଇଥିବା ବେଳେ କୃଷ୍ଣସାର ମୃଗଟିକୁ ଶକ୍ତ ଧକ୍କା ଦେଇଥିବା ଅନୁମାନ କରାଯାଉଛି । ଏପରିକି ମୃଗଟିର ଗୋଟିଏ ଶିଙ୍ଗ ସହିତ ଦୁଇଟି ଗୋଡ ସମ୍ପୂର୍ଣ୍ଣ ଭାଙ୍ଗିଯାଇଛି । ମୃଗଟିକୁ ରକ୍ତ ଜୁଡୁବୁଡୁ ଅବସ୍ଥାରେ ରାସ୍ତା ଉପରେ ଛଟପଟ ହେଉଥିବା ଦେଖି ସ୍ଥାନୀୟ ଲୋକେ ପାଣି ଦେଇ ବଞ୍ଚାଇବାକୁ ଆପ୍ରାଣ ଚେଷ୍ଟା କରି ମଧ୍ୟ ବିଫଳ ହୋଇଥିଲେ ।
ବନବିଭାଗ ପକ୍ଷରୁ ଫରେଷ୍ଟଗାର୍ଡ ନୀଳମାଧବ ଜେନା ଏବ° ପାରା କର୍ମଚାରୀ ମାନେ ପହଞ୍ଚି ମୃତ କୃଷ୍ଣସାର ମୃଗଟିକୁ ଉଦ୍ଧାର କରି ପ୍ରାଣୀ ଚିକିତ୍ସା କେନ୍ଦ୍ରକୁ ନେଇଯାଇଥିବା ବେଳେ ଆଜି ଶବ ବ୍ୟବଚ୍ଛେଦ କରାଯିବ । ମୃତ ଅଣ୍ଡିରା ମୃଗର ବୟସ ୫ରୁ ୬ ବର୍ଷ ହେବ ବୋଲି ଅନୁମାନ କରାଯାଉଛି ।
ଗଞ୍ଜାମ ଜିଲ୍ଲାରେ କୃଷ୍ଣସାର ମୃଗ ବିଚରଣ କରୁଥିବା ଅଞ୍ଚଳ ଗୁଡିକରେ ରାସ୍ତା ଉପରେ ସତର୍କ କିମ୍ବା ସଚେତନତା ଫଳକ ଲଗାଯାଉନଥିବାରୁ ଯାନବାହାନ ଗୁଡିକ ଦ୍ରୁତ ଗତିରେ ଚଳାଚଳ କରି ଏପରି ବାରମ୍ବାର ଜିଲ୍ଲାର ବିଭିନ୍ନ ସ୍ଥାନରେ ଦୁର୍ଘଟଣା ଘଟାଉଛନ୍ତି । ତେବେ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେଲେ ଆସନ୍ତା ଦିନରେ ଏଭଳି ଦୁର୍ଘଟଣାରେ ମୃତ୍ୟୁ ସଂଖ୍ୟା କମିବା ସହିତ କୃଷ୍ଣସାର ମୃଗର ସୁରକ୍ଷା ହୋଇପାରିବ ବୋଲି ବିଭିନ୍ନ ମହଲରେ ଦାବି ହୋଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
