ଭଞ୍ଜନଗର: ପ୍ରଧାନମନ୍ତ୍ରୀ ଆବାସ ଯୋଜନାରେ ମିଳିବ ପକ୍କା ଘର । ଏହି ଯୋଜନା ମାଧ୍ୟମରେ ବାସହୀନ ଓ ଗରିବ ଶ୍ରେଣୀଙ୍କୁ ଗୃହ ଯୋଗାଇ ଦେବେ ସରକାର । ହେଲେ କିଛି ଦଲାଲଙ୍କୁ ଯୋଗୁଁ ବାଟବଣା ପିଏମ ଆବାସ ଯୋଜନା। ତାଲିକାରେ ନାଁ ଅଛି ହେଲେ ଲାଞ୍ଚ ନ ଦେବାରୁ ମିଳୁନି ଘର । ଏପରିକି ସରକାରୀ ଦସ୍ତାବିଜରେ ଜାଲିଆତି କରି ଘର ମିଳିଥିବାର ଦର୍ଶାଇ ଟଙ୍କା ହଡପ କରୁଛନ୍ତି । ଏଭଳି ଏକ ଅଭିଯୋଗ ଆସିଛି ଗଞ୍ଜାମ ଜିଲ୍ଲା ଭଞ୍ଜନଗର ବ୍ଲକ ହରିଗଡ ପଞ୍ଚାୟତର ବଦାଙ୍ଗି ଗାଁରୁ ।
ଗଞ୍ଜାମ ଜିଲ୍ଲା ଭଞ୍ଜନଗର ବ୍ଲକ ହରିଗଡ ପଞ୍ଚାୟତର ବଦାଙ୍ଗି ଗାଁ ଶିଶୁଳା ନାଏକ । 2016-17ରେ ଶିଶୁଳାଙ୍କ ନାଁ ପ୍ରଧାନମନ୍ତ୍ରୀ ଆବାସ ଯୋଜନାରେ ସାମିଲ କରାଯାଇଥିଲା । ହେଲେ ଘର କରିବା ପୂର୍ବରୁ 10 ହଜାର ଟଙ୍କା ଦେଲେ ଯାଇ ୱାର୍କ ଅର୍ଡର ମିଳିବ ବୋଲି ଲାଞ୍ଚ ମାଗିଥିଲେ ସ୍ଥାନୀୟ ସରପଞ୍ଚ । କିନ୍ତୁ ଅତି ଗରିବ ପରିବାର ହୋଇଥିବାରୁ ଟଙ୍କା ଦେବାକୁ ମନା କରିଥିଲେ ଶିଶୁଳାଙ୍କ ପରିବାର ।
ଏହି ଘଟଣାକୁ 3 ବର୍ଷ ବିତିଯାଇଥିଲେ ବି ପକ୍କା ଘର ମିଳିପାରିଲା ନାହିଁ । ସେହି ନୁଆଁଣିଆ ଚାଳ ଘର, ଆଉ ଘରେ ପଶିଲେ ବାଜୁଛି ମୁଣ୍ଡ । ଫଳରେ ସୂଚନା ଅଧିକାରୀଙ୍କ ଦ୍ବାରସ୍ଥ ହେଇଥିଲେ ପରିବାର । ଯେଉଁଥିରୁ ସେମାନେ ଜାଣିବାକୁ ପାଇଲେ, ତାଙ୍କ ନାଁରେ ପ୍ରଧାନମନ୍ତ୍ରୀ ଆବାସ ଯୋଜନା ମିଳିଛି । ଆଉ ଏଥିପାଇଁ 1 ଲକ୍ଷ 30 ହଜାର ଟଙ୍କା ମିଳିଛି ।
ଏଥିରେ ଅନିୟମିତତା କରି ଘର ଅନ୍ୟ କାହାକୁ ଦିଆଯାଇଥିବା ଅଭିଯୋଗ କରାଯିବା ପରେ, ଘଟଣାର ତଦନ୍ତ କରି ଦୋଷୀକୁ ଦଣ୍ଡ ଦେବା ସହ ପିଏମ ଆବାସ ଯୋଜନାରେ ଶିଶୁଳାଙ୍କ ପରିବାରଙ୍କୁ ସାମିଲ କରି ଘର ଯୋଗାଇବାକୁ ଦାବି କରିଛନ୍ତି ବିଜେପି କୃଷକ ମୋର୍ଚ୍ଚାର ରାଜ୍ୟ ଉପସଭାପତି ।
ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ
