ବ୍ରହ୍ମପୁର: ରାଜ୍ୟରୁ ଜିଲ୍ଲା ଯାଏଁ ସବୁଠି ଜାରି ରହିଛି କୋରୋନା ମୁକାବିଲା ପାଇଁ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ । ଏଭଳି ସମୟରେ ଗଞ୍ଜାମ ଜିଲ୍ଲାରେ ଅଧିକ ଆତଙ୍କ ଖେଲାଇଛି କୋରୋନା । ଏହାକୁ ଲକ୍ଷ୍ୟ ରଖି ପ୍ରଶାସନ ପକ୍ଷରୁ ସ୍ବତନ୍ତ୍ର ଆପର ବ୍ୟବହାର କରାଯାଉଛି ।
ରାଜ୍ୟ ବାହାରରୁ ଆସିଥିବା ବ୍ୟକ୍ତି ବିଶେଷଙ୍କ ହୋମ୍ କ୍ବାରେଣ୍ଟାଇନର ଗତିବିଧିକୁ ଅନୁଧ୍ୟାନ ପାଇଁ ପ୍ରସ୍ତୁତ ହୋଇଛି ସ୍ବତନ୍ତ୍ର ଆପ୍ । ଏହା ମାଧ୍ୟମରେ ମନିଟରିଙ୍ଗ କରୁଛି ପ୍ରଶାସନ । ଏହାରି ମାଧ୍ୟମରେ ଆପର ଡାଟାରୁ ମିଳିଥିବା ସୂଚନା ଅନୁସାରେ କାର୍ଯ୍ୟାନୁଷ୍ଠାନ ନିଆଯାଉଛି ।
ଏହି ଅବସରରେ ସୋମବାର ଜଣେ ବ୍ୟକ୍ତି ହୋମ୍ କ୍ବାରେଣ୍ଟାଇନ ନିୟମକୁ ଉଲ୍ଲଙ୍ଘନ କରିବା ଜଣାପଡିଥିଲା । ଏହାପରେ ସମ୍ପୃକ୍ତ ବ୍ୟକ୍ତିଙ୍କୁ ଘରୁ ସରକାରୀ କ୍ବାରେଣ୍ଟାଇନ ସେଣ୍ଟରକୁ ସ୍ଥାନାନ୍ତର କରାଯାଇଛି । ଏନେଇ ଗଞ୍ଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ଟ୍ବିଟ୍ କରି ଏହି ସୂଚନା ଦେଇଛନ୍ତି । ଏହାସହ ଜିଲ୍ଲାରେ ହୋମ୍ କ୍ବାରେଣ୍ଟାଇନରେ ଥିବା ଲୋକଙ୍କୁ ଏହି ଆପ୍ ଦ୍ବାରା ଡାଟା ସଂଗ୍ରହ ହେଉଥିବାରୁ ଅଧିକ ସତର୍କ ରହିବାକୁ ପରାମର୍ଶ ଦେଇଛନ୍ତି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
