ଭଞ୍ଜନଗର: ଗଞ୍ଜାମ ଜିଲ୍ଲା ବୁଗୁଡ଼ା ଥାନା ମୋଚି ସାହିରେ ହତ୍ୟାକାଣ୍ଡ । ପ୍ରେମିକ ସହ ମିଶି ସ୍ତ୍ରୀ ତା' ସ୍ବାମୀକୁ ହତ୍ୟା କରିଛି । ମୃତକ ଜଣକ ହେଲେ ଢେଙ୍କାନାଳର ସିଲୁ ମେହେର । ଘଟଣା ପରେ ସାହି ବାସିନ୍ଦା ପ୍ରେମିକ ସହ ସ୍ତ୍ରୀକୁ ନେଇ ଥାନାରେ ଜିମା ଦେଇଛନ୍ତି ।
ସୂଚନାନୁସାରେ, ଢେଙ୍କାନାଳର ସିଲୁ ମେହେର ବୁଗୁଡ଼ା ସହରର ମୋଚି ସାହିର ମହେଶ୍ବରୀ ମେହେରକୁ ବିବାହ କରିଥିଲେ । ହସଖୁସିରେ ପରିବାର ଚାଲିଥିବାବେଳେ ତାଙ୍କର ତିନୋଟି ସନ୍ତାନ ଅଛନ୍ତି । ସ୍ତ୍ରୀ ମହେଶ୍ବରୀଙ୍କ ସେହି ଅଂଚଳରେ ଜଣେ ଯୁବକ ସହ ପ୍ରେମ ସମ୍ପର୍କ ଗଢିଉଠିଥିଲା । ପ୍ରେମିକ ସହିତ 3ଦିନ ପୂର୍ବରୁ ମହେଶ୍ବରୀ ନିଜ ଘର ବୁଗୁଡ଼ାକୁ ଚାଲି ଆସିଥିଲେ । ଘରେ ସ୍ତ୍ରୀକୁ ନ ପାଇ ସିଲୁ ବନ୍ଧୁବାନ୍ଧବ ଘର ଖୋଜାଖୋଜି ପରେ ଗତକାଲି (ଗୁରୁବାର) ସାଇକେଲ ଯୋଗେ ସିଲୁ ପହଂଚି ଥିଲେ ଶଶୁର ଘରେ । ସ୍ତ୍ରୀ ସହିତ ଅନ୍ୟ ଜଣେ ଯୁବକକୁ ଦେଖି ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଶୁକ୍ରବାର ରାତିରେ ପ୍ରେମିକ ସହ ମିଶି ସ୍ତ୍ରୀ ସିଲୁକୁ ଗଳା ଚିପି ହତ୍ୟା କରିଥିଲେ । ଏହି ଖବର ପ୍ରଘଟ ହେବାପରେ ସାହି ବାସିନ୍ଦା ଉଭୟ ସ୍ତ୍ରୀ ଓ ପ୍ରେମିକକୁ କାବୁ କରି ପୋଲିସ ରେ ଜିମା ଦେଇଥିଲେ । ଖବର ପାଇ ବୁଗୁଡ଼ା ପୋଲିସ ପହଂଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ଭଞ୍ଜନଗର ମେଡିକାଲ ପଠାଇ ଅଧିକ ତଦନ୍ତ ଆରମ୍ଭ କରିଛି । ଅନ୍ୟପଟେ ହତ୍ୟାକାରୀଙ୍କୁ କଠୋରରୁ କଠୋର ଦଣ୍ଡ ମିଳୁ ବୋଲି ପରିବାର ପକ୍ଷରୁ ଦାବି ହୋଇଛି ।
ଭଞ୍ଜନଗରରୁ ରଞ୍ଜନ ସ୍ୱାଇଁ, ଇଟିଭି ଭାରତ
