ବ୍ରହ୍ମପୁର: ବ୍ରହ୍ମପୁର ଅବକାରୀ ବିଭାଗକୁ ସଫଳତା । ସହର ଉପକଣ୍ଠରେ ଚାଲିଥିଲା ନକଲି ବିଦେଶୀ ମଦ କାରବାର । ଯାହାକୁ ନେଇ ତିନୋଟି ସ୍ଥାନରେ ଚଢାଉ କରି ଦୁଇ ଜଣଙ୍କୁ ଗିରଫ କରିବାରେ ସକ୍ଷମ ହୋଇଛି ଅବକାରୀ ବିଭାଗ । ବ୍ରହ୍ମପୁର ଉପକଣ୍ଠରେ ସୋରଳ ଛକରେ ବିଭାଗର ଅଧିକାରୀମାନେ ଚଢ଼ାଉ କରିବା ସମୟରେ ଜଣେ ସ୍କୁଟିରେ ନକଲି ବିଦେଶୀ ମଦ ନେଇ ଯାଉଥିଲା । ଏହି ସମୟରେ ଜଣେ ଯୁବକଙ୍କୁ କାବୁ କରିଥିଲା ଅବକାରୀ ବିଭାଗ । ଅଭିଯୁକ୍ତ ସୂଚନା ମୁତାବକ ଆଙ୍କୁଲି ଅଞ୍ଚଳରେ ଚଢ଼ାଉ କରାଯାଇଥିଲା । ସେଠାରେ ପହଁଞ୍ଚି ନକଲି ମଦ ପ୍ରସ୍ତୁତ ସାମଗ୍ରୀ ଜବତ କରିଥିଲା ବ୍ରହ୍ମପୁର ଅବକାରୀ ବିଭାଗ । ଏହି ଘଟଣାରେ ମୋଟ ଦୁଇ ଜଣଙ୍କୁ ଗିରଫ କରାଯାଇଛି ।
ଆଙ୍କୁଲିରେ ଭଡା ଘରେ ସୁଶାନ୍ତ କୁମାର ପାଢୀ ନାମକ ଜଣେ ଯୁବକ ନକଲି ମଦ ପ୍ରସ୍ତୁତ କରି ପାତ୍ରପୁର ଅଞ୍ଚଳରେ ବିକ୍ରି କରୁଥିବା ଜାଣିବାକୁ ପାଇଥିଲା ଅବକାରୀ ବିଭାଗ । ତେବେ ଚଢାଉ ସମୟରେ ମଦ ପ୍ରସ୍ତୁତ ପାଇଁ ବ୍ୟବହୃତ ହେଉଥିବା ସ୍ପିରିଟ, ରଙ୍ଗ, ନାମିଦାମୀ କମ୍ପାନୀର ଲେବଲ, ସରକାରୀ ଷ୍ଟିକର ସହ ବହୁ ଠିପି ଜବତ ହୋଇଛି । ସେହିପରି ଏହି ଘଟଣାରେ ପାତ୍ରପୁର ଅଞ୍ଚଳରେ ଏନ ପାପାୟା ନାମକ ଜଣେ ବ୍ୟବସାୟୀଙ୍କୁ ମଧ୍ୟ ଗିରଫ କରାଯାଇଛି । ଏହାକୁ ନେଇ ଅବକାରୀ ବିଭାଗ ପକ୍ଷରୁ ଦୁଇଟି ମାମଲା ରୁଜୁ କରିବା ସହିତ ବ୍ରହ୍ମପୁର ରାମହରି ନଗରର ସୁଶାନ୍ତ କୁମାର ପାଢୀ(୪୯) ଏବଂ ପାତ୍ରପୁର ମୁଣ୍ଡାକେରୀ ଅଞ୍ଚଳର ଏନ ପାପେୟା (୫୦) କୋର୍ଟ ଚାଲାଣ କରାଯାଇଛି ।
ବ୍ରହ୍ମପୁର, ଇଟିଭି ଭାରତ
