ବ୍ରହ୍ମପୁର: ବଙ୍ଗୋପସାଗରରେ ସୃଷ୍ଟି ହୋଇଥିବା ସାମୁଦ୍ରିକ ଝଡ 'ଫନି'ର ମୁକାବିଲା କରିବା ପାଇଁ ପ୍ରସ୍ତୁତି ଆରମ୍ଭ କରିଛି ଗଞ୍ଜାମ ଜିଲ୍ଲା ପ୍ରଶାସନ । ଜିଲ୍ଲାର 5ଟି ବ୍ଲକ ସମୁଦ୍ର କୂଳବର୍ତ୍ତୀ ଅଞ୍ଚଳରେ ରହିଥିବାରୁ ଏହି ଗ୍ରାମ ଗୁଡିକୁ ପ୍ରଶାସନ ପକ୍ଷରୁ ଡାକବାଜି ଯନ୍ତ୍ର ମାଧ୍ୟମରେ ସଚେତନତା ଆରମ୍ଭ କରାଯାଇଛି ।
ସମୁଦ୍ର ମଧ୍ୟକୁ କୌଣସି ମତ୍ସ୍ୟଜୀବୀ ମାଛ ଧରିବାକୁ ଯିବା ପାଇଁ ବାରଣ କରାଯାଇଛି । ଏହାସହ ଡଙ୍ଗା ଏବଂ ମାଛ ମାରିବା ସାମଗ୍ରୀକୁ ସୁରକ୍ଷିତ ସ୍ଥାନରେ ବାନ୍ଧି ରଖିବା ପାଇଁ ନିର୍ଦ୍ଦେଶ ଦିଆଯାଇଛି । ପାଣିପାଗର ପରବର୍ତ୍ତୀ ସୂଚନା ମିଳିବା ପରେ ସମସ୍ତେ ସତର୍କତା ସହ ନିଜର ଅତ୍ୟାବଶ୍ୟକୀୟ ସାମଗ୍ରୀକୁ ସାଥୀରେ ନେଇଯିବାକୁ କୁହାଯାଇଛି ।
ଯଦି ଆବଶ୍ୟକ ପଡେ ତେବେ ସମୁଦ୍ରକୂଳିଆ ବାସିନ୍ଦାଙ୍କୁ ସେମାନଙ୍କର ଅତ୍ୟାବଶ୍ୟକ ସାମଗ୍ରୀ ସାଙ୍ଗରେ ଧରି ତୁରନ୍ତ ସ୍ଥାନାନ୍ତରିତ ହେବାକୁ ସଚେତନ କରାଯାଇଛି । ସେପଟେ ବାରମ୍ୱାର ଗଞ୍ଜାମ ଜିଲ୍ଲାରେ ବିଭିନ୍ନ ବାତ୍ୟା ଓ ପବନକୁ ସମ୍ମୁଖିନ ହୋଇଥିବା ଗ୍ରାମବାସୀ ପୁଣି ଏକ ବାତ୍ୟାର ସୂଚନା ପାଇବା ପରେ ଚିନ୍ତିତ ହୋଇପଡିଥିବା ଦେଖାଯାଇଛି ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
