ଭଞ୍ଜନଗର: ଗଞ୍ଜାମ ଜିଲ୍ଲା ଆସିକା ନିକଟସ୍ଥ ବାବନପୁର କୋଭିଡ ମେଡିକାଲରେ ମୃତ୍ୟୁବରଣ କରିଥିବା ତଅଁର ଗ୍ରାମର ରାମକୃଷ୍ଣ ପାଢୀ ନାମକ ବ୍ୟକ୍ତିଙ୍କ ମୃତଦେହ ଅନ୍ତିମ ସଂସ୍କାର କରିବା ନିମନ୍ତେ ଅଣ୍ଟା ଭିଡିଲେ ସରପଞ୍ଚ । ଆଜି ବାବନପୁର କୋଭିଡ ମେଡିକାଲରେ ରାମକୃଷ୍ଣ ପାଢୀଙ୍କ କରୋନାରେ ମୃତ୍ୟୁ ହୋଇଥିଲା । ଘଟଣା ସ୍ଥଳରେ ସରପଞ୍ଚ ପ୍ରତିନିଧି ଅନୀଲ କୁମାର ନାହାକ ପହଞ୍ଚି ମୃତଦେହ ସଂସ୍କାର ପାଇଁ ଗ୍ରାମର କିଛି ସ୍ବେଚ୍ଛାସେବୀଙ୍କୁ ଅନୁରୋଧ କରିଥିଲେ ।
ପାଞ୍ଚ ଜଣ ସ୍ବେଚ୍ଛାସେବୀ କାହ୍ନା ନାୟକ, ଦିଲିପ କୁମାର ନାୟକ, ସିପୁନ ପ୍ରଧାନ, ଆଦିତ୍ୟ ଜେନା, ପ୍ରଦୀପ ନାୟକ ପ୍ରମୁଖ ପିପିଇ କିଟ ପରିଧାନ କରି ମୃତକ ଜଣକୁ ନିକଟସ୍ଥ ଏକ ସ୍ଥାନରେ ଅନ୍ତିମ ସଂସ୍କାର କରିଥିଲେ । ଏହି ସମୟରେ ଆସିକା ତହସିଲଦାର ମଧ୍ୟ ଉପସ୍ଥିତ ରହିଥିଲେ । ଏହି ମହାନ କାର୍ଯ୍ୟ କରିଥିବା ଯୁବକ ମାନଙ୍କୁ ବୁଦ୍ଧିଜୀବୀ ମହଲରେ ପ୍ରଶଂସା କରାଯାଇଛି ।
ଭଞ୍ଜନଗରରୁ ରଞ୍ଜନ ସ୍ୱାଇଁ, ଇଟିଭି ଭାରତ
