ବ୍ରହ୍ମପୁର: ପାତ୍ରପୁର ବ୍ଲକ ଖଇରା ଗାଁରେ ଗୋଷ୍ଠୀ ସଙ୍ଘର୍ଷ । ଏଥିରେ ଜଣେ ୧୬ ବର୍ଷୀୟ ନାବାଳକର ମୃତ୍ୟୁ ଘଟିଥିବା ବେଳେ ଏଥିରେ ଉଭୟ ଗୋଷ୍ଠୀର ୧୦ରୁ ଉର୍ଦ୍ଧ୍ବ ଜଣ ଆହତ ହୋଇଥିବା ଅଭିଯୋଗ ହୋଇଛି ।
ସୂଚନାନୂଯାୟୀ, ତାଣ୍ଡିପୁର ପଞ୍ଚାୟତର ଖଇରା ଗାଁରେ ପୂର୍ବରୁ ଏକ ବିବାହ ଭୋଜିକୁ ନେଇ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ହୋଇଥିଲା । ଏହାର ସମାଧାନ ପାଇଁ ମଙ୍ଗଳବାର ରାତିରେ ଉଭୟ ଗୋଷ୍ଠୀର ସଦସ୍ୟଙ୍କୁ ନେଇ ଏକ ବୈଠକ ବସିଥିଲା । କିନ୍ତୁ ପୁଣି ଥରେ ଉଭୟ ଗୋଷ୍ଠୀ ମଧ୍ୟରେ ମାରପିଟ ଆରମ୍ଭ ହୋଇଯାଇଥିଲା । ଯେଉଁଥିରେ ନାବାଳକ ରାଜା ପ୍ରଧାନର ମୃତ୍ୟୁ ଘଟିଛି ।
ଏହାପରେ ସଂପୃକ୍ତ ଗାଁରେ ଚାପା ଉତ୍ତେଜନା ଲାଗିଛି । ଯେପରି ଗାଁରେ କୌଣସି ଅପ୍ରିତିକର ପରିସ୍ଥିତି ସୃଷ୍ଟି ନହୁଏ ସେନେଇ ଏସଡିପିଓଙ୍କ ସମେତ ବ୍ୟାପକ ପୋଲିସ ମୁତୟନ ହୋଇଛନ୍ତି । ସେପଟେ ଏହି ଘଟଣାରେ ମାମଲା ରୁଜୁ ପରେ ଗଣ୍ଡଗୋଳରେ ସଂପୃକ୍ତ ଥିବା ଦୋଷୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ବ୍ରହ୍ମପୁର ଏସପି ।
ବ୍ରହ୍ମପୁରରୁ ସମୀର କୁମାର ଆଚାର୍ଯ୍ୟ, ଇଟିଭି ଭାରତ
