ବ୍ରହ୍ମପୁର: ଗଞ୍ଜାମ IISER ବ୍ରହ୍ମପୁର ଏବଂ କାଜିନାର୍ଜୁଲ ବିଶ୍ବବିଦ୍ୟାଳୟର ବୈଜ୍ଞାନିକ ମାନେ ଦୀର୍ଘ ୨ ବର୍ଷ ଗବେଷଣା ପରେ ପାଇଛନ୍ତି ସଫଳତା । ସେମାନେ କୋରୋନା ମହାମାରୀର ସମସ୍ତ ଭାରିଏଣ୍ଟ ବିରୋଧରେ ଲଢିବା ପାଇଁ ସକ୍ଷମ ଥିବା ଟିକା ଅଭିସ୍ କୋଭାକ୍(AbhiSCoVac)ର ଉଦ୍ଭାବନ କରିଛନ୍ତି । କେବଳ ଏହାର କ୍ଲିନିକାଲ ଟ୍ରାଏଲ ପାଇଁ ବୈଜ୍ଞାନିକମାନେ ଅପେକ୍ଷା କରିଥିବା କହିଛନ୍ତି ।
ଏହି ଟିକା ସମ୍ପର୍କରେ ଆର୍ନ୍ତଜାତିକ ପତ୍ରିକା Journal Of Molecular liquids ରେ ପ୍ରକାଶିତ ହୋଇଛି । ଏହି ଗବେଷଣାଟି IISER ବ୍ରହ୍ମପୁରର ବୈଜ୍ଞାନିକ ଡ. ମଳୟ କୁମାର ରଣା , ଡ. ପାର୍ଥସାରଥୀ ସେନଗୁପ୍ତା ଏବଂ ସରୋଜ କୁମାର ପଣ୍ଡା ଓ କାଜିନାର୍ଜୁଲ ବିଶ୍ବବିଦ୍ୟାଳୟର ୨ ବୈଜ୍ଞାନିକ ଡ. ସୁପ୍ରଭାତ ମୁର୍ଖାଜୀ ଓ ଅଭିଜ୍ଞାନ ଚୌଧୁରୀଙ୍କ ତତ୍ତ୍ବାବଧାନରେ କରାଯାଇଥିଲା । ଏହି ପାଞ୍ଚ ଜଣ ବୈଜ୍ଞାନିକଙ୍କ କହିବା ଅନୁସାରେ ଗବେଷଣାଟି Cumputer Stimulation ପ୍ରଣାଳୀରେ ହୋଇଥିଲା ।
ଭ୍ୟାକ୍ସିନଟି ଆଗାମୀ ଦିନରେ କୋରୋନାର ସମସ୍ତ ଭାରିଏଣ୍ଟ ସହ ଲଢିବା ସହିତ ରୋଗ ପ୍ରତିରୋଧକ ଶକ୍ତି ବୃଦ୍ଧି କରାଇବାରେ ସାହାଯ୍ୟ କରିପାରେ ବୋଲି ସେମାନେ ଆଶା କରିଛନ୍ତି । ଏହି ଟିକାଟି ଏବେ କ୍ଲିନିକାଲ ଟ୍ରାଏଲ ଅପେକ୍ଷାରେ ରହିଛି । ଆଗାମୀ ଭବିଷ୍ୟତରେ ଏହି ଟିକାର ପ୍ରସ୍ତୁତି ସହ କାର୍ଯ୍ୟକାରିତା କ୍ରିନିକାଲ ଟ୍ରାଏଲ ପରେ ହିଁ ଜଣାପଡି଼ବ ବୋଲି ସେମାନେ କହିଛନ୍ତି ।
ବ୍ରହ୍ମପୁରରୁ ସମୀର କୁମାର ଆଚାର୍ଯ୍ୟ, ଇଟିଭି ଭାରତ
