ବ୍ରହ୍ମପୁର: ଲକଡାଉନ ମଧ୍ୟରେ ପୁଣି ଏକ ଦୁଃସାହାସିକ ଜଳଯାତ୍ରା । ନିଜ ଜୀବନକୁ ବାଜି ଲଗାଇ ମୋଟର ବୋଟରେ ଚେନ୍ନାଇରୁ ଗଞ୍ଜାମ ଜିଲ୍ଲାର ରାମେୟାପାଟଣା ସମତେ ଓଡ଼ିଶା ଏବଂ ଆନ୍ଧ୍ର କୂଳରେ ପହଞ୍ଚିଛନ୍ତି ମୋଟ ୩୯ଜଣ ଶ୍ରମିକ ଓ ମତ୍ସଜୀବି ।
ଏହି ଯାତ୍ରାର ଅଧାବାଟରେ ଆନ୍ଧ୍ରର ଶ୍ରମିକମାନେ ଓହ୍ଲାଇ ପଡିଥିଲେ । ବୋଟ ମେୟାପାଟଣାରେ ଲାଗିବା ପୂର୍ବରୁ ପାତିସୁନାପୁରରୁ ଆଉ କିଛି ଓହ୍ଲାଇ ଯାଇଥିବା ବେଳେ ରମେୟାପାଟଣାରେ ବେଳକୁ ମାତ୍ର ୧୨ଜଣ ଶ୍ରମିକ ଥିବା ଦେଖାଯାଇଥିଲା । ସେମାନଙ୍କ ଉଦ୍ଧାର ପରେ ସମସ୍ତଙ୍କୁ ପ୍ରଶାସନ ପକ୍ଷରୁ କ୍ବାରେଣ୍ଟାଇନରେ ଭର୍ତ୍ତି କରାଯାଇଛି ।
ଗତ ତିନି ଦିନ ତଳେ ଚେନ୍ନାଇରୁ କିଛି ମତ୍ସଜୀବୀ ଏଭଳି ବୋଟରେ ଗଞ୍ଜାମ ଫେରିଥିଲେ । ଏପଟେ ବାହାର ରାଜ୍ୟରୁ ଫେରୁଥିବା ପ୍ରବାସୀ ଶ୍ରମିକଙ୍କ ପଞ୍ଜିକରଣ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଥିବା ବେଳେ ଏବେ ଅଧାବାଟରୁ ଓହ୍ଲାଇ ପଡ଼ିଥିବା ଶ୍ରମିକଙ୍କୁ ଖୋଜିବା ପ୍ରଶାସନ ପାଇଁ ସବୁଠାରୁ ବଡ଼ ଚ୍ୟାଲେଞ୍ଜ ପାଲଟିଛି ।
ଲକଡାଉନ ଯୋଗୁଁ ବାହାର ରାଜ୍ୟରେ ଥିବା ଓଡିଆ ଶ୍ରମିକଙ୍କ ପାଇଁ ଜୀବନ ବିତାଇବା ଏକ ପ୍ରକାର କଷ୍ଟକର ହୋଇପଡିଛି । ଏଥିଯୋଗୁଁ କିଏ କେଉଁ ଉପାୟରେ ଘର ବାହୁଡା ପାଇଁ ଚେଷ୍ଟା କରୁଛନ୍ତି । ତେବେ ଜଳପଥରେ ଶହ ଶହ କିଲୋମିଟର ଆସିବା ସମୟରେ ରାସ୍ତାରେ ବର୍ଷା- ତୋଫାନ ମଧ୍ୟରେ ନାନା ଆଶା ଆଶଙ୍କା ମଧ୍ୟରେ ଭୋକ ଉପାସରେ ତିନିଦିନ ପରେ ଓଡିଶା ପହଞ୍ଚିଛନ୍ତି ସମସ୍ତେ । ଏହାକୁ ମିଶାଇ ତୃତୀୟ ବୋର୍ଟ ଆସି ପହଞ୍ଚିଛି ଗଞ୍ଜାମ ଓ ଆନ୍ଧ୍ର ସୀମାନ୍ତ ଭଳି ଅଞ୍ଚଳରେ ।
ବ୍ରହ୍ମପୁରରୁ ସମୀର ଆଚାର୍ଯ୍ୟ, ଇଟିଭି ଭାରତ
