ବିଜେପି ସାଙ୍ଗଠନିକ ନିର୍ବାଚନ, ମନମୋହନ ଦେଲେ ବଡ଼ ସୂଚନା

ଦିଲ୍ଲୀରୁ ଫେରି ମନମୋହନ ଦେଲେ ବଡ ସୂଚନା । କହିଲେ ଦୁଇ ଥର ସଭାପତି ଦାୟିତ୍ଵରେ ରହିବା ପରେ ବ୍ରେକ ନେଇ ପୁଣି ଥରେ ଆଉ ଗୋଟେ ଟର୍ମ ହେଇ ପାରିବେ ସଭାପତି ।

ଭୁବନେଶ୍ୱର:ବିଜେପି ସାଙ୍ଗଠନିକ ନିର୍ବାଚନ ନେଇ ରାଜ୍ୟ ସଭାପତି ମନମୋହନ ସାମଲଙ୍କ ବଡ ସୂଚନା । ରାଜ୍ୟ ସଭାପତି ଭାବେ ମନମୋହନ ରିପିଟ ହେବା ନେଇ ଯେଉଁ ଚର୍ଚ୍ଚା ଜୋର ଧରିଥିଲା ସେଥିରେ ଏକପ୍ରକାର ପୂର୍ଣ୍ଣଚ୍ଛେଦ ପକାଇଛନ୍ତି ମନମୋହନ । ଦଳର ନିୟମ ଅନୁଯାୟୀ ସାଙ୍ଗଠନିକ ନିର୍ବାଚନ ପ୍ରକ୍ରିୟା କରାଯିବ ବୋଲି ତିନି ଦିନିଆ ଦିଲ୍ଲୀ ଗସ୍ତରୁ ଫେରି କହିଛନ୍ତି ରାଜ୍ୟ ବିଜେପି ସଭାପତି ।

ରିପିଟ ହେବେନି ମନମୋହନ ସାମଲ !

ତିନିଦିନ ଧରି ଦିଲ୍ଲୀରେ ବୈଠକ ପରେ ଶନିବାର ଓଡ଼ିଶା ଫେରିଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ । ଦିଲ୍ଲୀରୁ ଫେରି ସେ ବଡ ସୂଚନା ଦେଇଛନ୍ତି । ସେ କହିଛନ୍ତି, "ବିଜେପି ରାଜ୍ଯ ସାଙ୍ଗଠନିକ ନିର୍ବାଚନ ପ୍ରକ୍ରିୟା ଏକ ନିରନ୍ତର ପ୍ରକ୍ରିୟା । ଦଳର ନିୟମ ଅନୁସାରେ ଲଗାତର ଦୁଇଥର ଜଣେ ସଭାପତି ରହିପାରିବେ । ଦୁଇ ଥର ସଭାପତି ଦାୟିତ୍ଵରେ ରହିବା ପରେ ବ୍ରେକ ନେଇ ପୁଣି ଥରେ ସଭାପତି ହୋଇପାରିବେ । ଦଳର ସଙ୍ଗଠନ ଏନେଇ ନିଷ୍ପତ୍ତି ନେବ । "

ସାଙ୍ଗଠନିକ ନିର୍ବାଚନକୁ ନେଇ ମନମୋହନଙ୍କ ବଡ ସୂଚନା:

ସେହିପରି ରେସରେ ଆଗରେ ଥିବା ନେଇ ଚର୍ଚ୍ଚା ଉପରେ ସେ କହିଛନ୍ତି,"ଆମ ଦଳରେ କେହି ରେସରେ ନଥାନ୍ତି । ଦଳୀୟ ସଙ୍ଗଠନର ଶୀର୍ଷ ନେତୃତ୍ଵ ଏହାକୁ ନେଇ ଶେଷ ନିଷ୍ପତ୍ତି ନେବେ । ସଭାପତି କିଏ ହେବେ ସେକଥା ସ୍ଥିର ହେଲା ପରେ ଜଣାପଡିବ । ସାଙ୍ଗଠନିକ ନିର୍ବାଚନ ପ୍ରକ୍ରିୟା ସୁରଖୁରରେ ଚାଲିଛି । ତିନି ବର୍ଷରେ ଥରେ ସାଙ୍ଗଠନିକ ନିର୍ବାଚନ ହୁଏ । ସାଙ୍ଗଠନିକ ପ୍ରକ୍ରିୟା ଦଳର ଆଭ୍ୟନ୍ତରୀଣ ବ୍ୟାପାର । ଠିକ ସମୟରେ ଜିଲ୍ଲା ସଭାପତି ଚୟନ ହେବେ ।"

ରାଜ୍ୟ ସଭାପତି ଚୟନକୁ ନେଇ ଦିଲ୍ଲୀରେ ବୈଠକ

ସେପଟେ ରାଜ୍ୟ ସଭାପତି ଚୟନକୁ ନେଇ ଦିଲ୍ଲୀରେ ରାଜ୍ୟ ନେତାଙ୍କ ବଡ଼ ବୈଠକ ବସିଥିଲା । ମୁଖ୍ୟମନ୍ତ୍ରୀଙ୍କ ସମେତ ରାଜ୍ୟ ସଭାପତି, ରାଜ୍ୟ ପ୍ରଭାରୀ ଓ କୋର କମିଟିର ମାନସ ମନ୍ଥନ ହୋଇଛି । ଜିଲ୍ଲା ସଭାପତି ନେଇ ମଧ୍ୟ ଆଲୋଚନା କରାଯାଇଥିବା ସୂଚନା ରହିଛି । ରାଜ୍ୟରେ ସାଙ୍ଗଠନିକ ସ୍ଥିତି ନେଇ ଆଲୋଚନା ହେବା ସହ ନୂଆ ମଙ୍ଗୁଆଳ କିଏ ହେବ ତାକୁ ନେଇ ଆଲୋଚନା ହୋଇଥିବା ସୂଚନା ରହିଛି ।

ଏହାମଧ୍ୟ ପଢନ୍ତୁ...

ଅନ୍ୟପଟେ ଗତ 15 ତାରିଖ ମଧ୍ୟରେ ବିଜେପି ଜିଲ୍ଲା ସଭାପତିଙ୍କ 50 ପ୍ରତିଶତ ନାଁ ଫାଇନାଲ କରିବାକୁ ନିଷ୍ପତ୍ତି ହୋଇଥିଲା । ଏହାପୂର୍ବରୁ ମଣ୍ଡଳ ଓ ବୁଥ ସଭାପତି ନିର୍ବାଚନ ଶେଷ ହୋଇଛି । ନିୟମ ଅନୁସାରେ 50 ପ୍ରତିଶତ ଜିଲ୍ଲା ସଭାପତି ନାଁ ଚୂଡାନ୍ତ ପରେ ରାଜ୍ୟ ସଭାପତି ବଛାଯିବ । ଏହାପରେ ନୂଆ ସଭାପତି ହେବାପରେ ଅନ୍ୟ ଜିଲ୍ଲା ସଭାପତି ଚୂଡାନ୍ତ କରିବେ । ଦଳ ଚଳିତ ଥର ସଭାପତି ପାଇଁ ବୟସ ସୀମା ମଧ୍ୟ ଧାର୍ଯ୍ୟ ହୋଇଛି । ଯେଉଁଥିରେ 35 ରୁ 45 ମଣ୍ଡଳ ସଭାପତି ଥିବାବେଳେ 45 ରୁ 60 ଜିଲ୍ଲା ସଭାପତି ପାଇଁ ବୟସ ସୀମା ଧାର୍ଯ୍ୟ କରିଛି ଦଳ । ତେବେ ଆଗାମୀ ପଞ୍ଚାୟତ ନିର୍ବାଚନକୁ ଆଖି ଆଗରେ ରଖି ଦଳ ତୃଣମୂଳ ସ୍ତରରୁ ନୂଆ ଟିମ ତିଆରି କରୁଛି ।

ଇଟିଭି ଭାରତ, ଭୁବନେଶ୍ୱର