ଆସିକାରେ ପ୍ରଥମ ଡେଙ୍ଗୁ ରୋଗୀ ଚିହ୍ନଟ, ବସ୍ତି ପରିଦର୍ଶନ କଲା ଡାକ୍ତରୀ ଟିମ

ଗଞ୍ଜାମ ଜିଲ୍ଲା ଆସିକା ଅଞ୍ଚଳରେ ପ୍ରଥମ ଡେଙ୍ଗୁରୋଗୀ ଚିହ୍ନଟ । ଘଟଣାସ୍ଥଳରେ ଡାକ୍ତରୀ ଟିମ। ନମୂନା ସଂଗ୍ରହ ସହ ଆରମ୍ଭ ହେଲା ସଚେତନତା କାର୍ଯ୍ୟକ୍ରମ । ଅଧିକ ପଢନ୍ତୁ...

ଭଞ୍ଜନଗର: ଗଞ୍ଜାମ ଜିଲ୍ଲା ଆସିକା ଅଞ୍ଚଳରେ ପ୍ରଥମ ଡେଙ୍ଗୁରୋଗୀ ଚିହ୍ନଟ ପରେ ଡାକ୍ତରୀ ଟିମ ଘଟଣାସ୍ଥଳ ପରିଦର୍ଶନ କରିଛି । ଆସିକା ଅଞ୍ଚଳରେ ପ୍ରଥମ ଡେଙ୍ଗୁରୋଗୀ ଚିହ୍ନଟ ହେବା ପରେ ସ୍ଥାନୀୟ ଅଞ୍ଚଳରେ ଭୟର ବାତାବରଣ ସୃଷ୍ଟି ହେବା ସହ ପ୍ରଶାସନିକ ତତ୍ପରତା ମଧ୍ୟ ଦେଖିବାକୁ ମିଳିଛି ।

ଘଟଣାକ୍ରମ ଅନୁସାରେ, ୨ଦିନ ତଳେ ଗଣ୍ଡପଲ୍ଲୀ ନିକଟସ୍ଥ ଏରେଗୁଲା ବସ୍ତିରେ ଜଣେ ଜୈନିକ ମହିଳା ଡେଙ୍ଗୁରେ ଆକ୍ରାନ୍ତ ଥିବା ଚିହ୍ନଟ ହୋଇଥିଲେ । ତେବେ ଆଜି ବ୍ରହ୍ମପୁରରୁ ଏକ ୩ ଜଣିଆ ଡାକ୍ତରୀ ଟିମ ଆସି ଏରେଗୁଲା ବସ୍ତି ପରିଦର୍ଶନ କରିବା ସହିତ ସ୍ଥାନୀୟ ଅଞ୍ଚଳରୁ ନମୁନା ସଂଗ୍ରହ କରି ଫେରିଛନ୍ତି । ସେହିପରି ଆସିକା ବିଜ୍ଞାପିତ ଅଞ୍ଚଳ ପକ୍ଷରୁ ସ୍ଥାନୀୟ ଅଞ୍ଚଳରେ ସଚେତନତା କାର୍ଯ୍ୟକ୍ରମ ଆରମ୍ଭ କରାଯାଇଛି l ପ୍ରତି ସାହି ଗଳିରେ ସ୍ବାସ୍ଥ୍ୟକର୍ମୀମାନେ ବୁଲି ଲୋକଙ୍କୁ ସଚେତନ କରୁଛନ୍ତି l

ଭଞ୍ଜନଗରରୁ ରଞ୍ଜନ ସ୍ବାଇଁ, ଇଟିଭି ଭାରତ