ଗଜପତି: ନିଆରା ଅନ୍ଦାଜ ପାଇଁ ସବୁବେଳେ ଚର୍ଚ୍ଚାରେ ଥିବା ଗଜପତି ଏସପି ସାରା ଶର୍ମା ବର୍ତ୍ତମାନ 31ତମ ସଡକ ସୁରକ୍ଷା ସପ୍ତାହକୁ ନିଆରା ଢଙ୍ଗରେ ପାଳନ କରି ପୁଣି ଚର୍ଚ୍ଚାକୁ ଆସିଛନ୍ତି । ଆଜି(ଗୁରୁବାର) ପାରଳାଖେମୁଣ୍ଡି ସହରରେ ସେ ଟ୍ରାଫିକ ନିୟମ ମାନିଥିବା ଲୋକଙ୍କୁ ଚକୋଲେଟ ଦେଇ ସେମାନଙ୍କୁ ସ୍ଵାଗତ କରିଥିବା ବେଳେ ଏହାକୁ ମାନୁନଥିବା ଲୋକଙ୍କୁ କଲରା ଏବଂ ଅଁଳା ଦେଇ ଟ୍ରାଫିକ ନିୟମ ମାନିବାକୁ ସଚେତନ କରିଛନ୍ତି । କିଛି ଲୋକଙ୍କୁ ଅଟକାଇ ହେଲମେଟ କିଣାଇ ନିଜ ହାତରେ ପିନ୍ଧାଇ ଦେଇଛନ୍ତି । ଏସପିଙ୍କ ଏଭଳି କାର୍ଯ୍ୟକୁ ସାଧାରଣ ଲୋକେ ସ୍ବାଗତ କରିବା ସହ ଏହାଦ୍ବାରା ଲୋକେ ସଚେତନ ହୋଇପାରିବେ ବୋଲି କହିଛନ୍ତି ।
31ତମ ସଡକ ସୁରକ୍ଷା ସପ୍ତାହ ଅବସରରେ ଗଜପତି ଜିଲ୍ଲାର ବିଭିନ୍ନ ଥାନା ଅଞ୍ଚଳରେ ପୁଲିସ ପକ୍ଷରୁ ସଚେତନତା କାର୍ଯ୍ୟକ୍ରମ କରାଯାଉଛି । ପାରଳାଖେମୁଣ୍ଡି ପୁଲିସ ପକ୍ଷରୁ ସ୍ଥାନୀୟ ଥାନା ଛକ ଠାରେ ଏକ ସଚେତନତା କାର୍ଯ୍ୟକ୍ରମ କରାଯାଇଥିଲା । ଏଥିରେ ସାମିଲ ହୋଇଥିଲେ ଏସପି ସାରା ଶର୍ମା । ଥାନା ଛକରେ ଛିଡା ହୋଇ ପ୍ରତ୍ୟେକ ଗାଡିକୁ ଅଟକାଇବା ସହ ଯେଉଁମାନେ ଟ୍ରାଫିକ ନିୟମ ମାନି ହେଲମେଟ ପିନ୍ଧିଥିଲେ କିମ୍ବା ସିଟ୍ ବେଲ୍ଟ ବ୍ୟବହାର କରିଥିଲେ ସେମାନଙ୍କୁ ଚକୋଲେଟ ଦେଇ ସ୍ବାଗତ କରିବା ସହ ସାଧୁବାଦ ଜଣାଇଥିଲେ ।
ଏସପିଙ୍କ ଏଭଳି କାର୍ଯ୍ୟକୁ ଲୋକେ ଖୁବ ପସନ୍ଦ କରିବା ସହ ସବୁ ସ୍ଥାନରେ ଟ୍ରାଫିକ ନିୟମ ନମାନିଲେ ଜରିମନା ଆଦାୟ କରାଯାଉଛି କିନ୍ତୁ ଏଠାରେ ସେହି ଟଙ୍କାରେ ହେଲମେଟ କିଣାଇବା ନିଶ୍ଚିତ ଭାବେ ଏକ ସ୍ବାଗତ ଯୋଗ୍ୟ ପଦକ୍ଷେପ ବୋଲି କହିଛନ୍ତି । ଏଭଳି କରିବା ଦ୍ବାରା ଲୋକେ ସଚେତନ ହେବା ସହ ଟ୍ରାଫିକ ନିୟମ ମାନିବାକୁ ବାଧ୍ୟ ହେବେ । ଫଳରେ ଲୋକେ ନିଜର ଜୀବନ ବଞ୍ଚାଇ ପାରିବେ ବୋଲି ସାଧାରଣ ଲୋକେ କହିଛନ୍ତି ।
ଏହି କାର୍ଯ୍ୟକ୍ରମରେ ପାରଳାଖେମୁଣ୍ଡି ଥାନା ଅଧିକାରୀ ବିବେକାନନ୍ଦ ସ୍ବାଇଁଙ୍କ ସହ ଆଞ୍ଚଳିକ ପରିବହନ ଅଧିକାରୀ ରଜନୀକାନ୍ତ ସ୍ବାଇଁ, ମୋଟର ଯାନ ନିରୀକ୍ଷକ ବସନ୍ତ ମହାପାତ୍ର ପ୍ରମୁଖ ଯୋଗ ଦେଇଥିଲେ ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
