ଗଜପତି: ଗୋଦାମରେ ଓଡିଶା ବିହନ ଖତ ଖାଉଥିବାବେଳେ ଚାଷୀମାନେ ଆନ୍ଧ୍ରପ୍ରଦେଶରୁ ବିହନ ଆଣୁଛନ୍ତି । ଫଳରେ ସରକାରୀ ବିହନର ଚାହିଦା କମି କମି ଆସୁଥିବା ଦେଖିବାକୁ ମିଳିଛି । ସୂଚନା ଅନୁସାରେ, ଚଳିତ ବର୍ଷ ୧୫ କ୍ବିଣ୍ଟାଲ ପ୍ରକ୍ରିୟା କରଣ ହୋଇଥିଲା । ବିଭିନ୍ନ ଜିଲ୍ଲାକୁ ପଠାଇବା ପରେ ଗଜପତି ଜିଲ୍ଲାରେ ମାତ୍ର ୫୫୧୬ କ୍ବିଣ୍ଟାଲ ବିହନ ବିକ୍ରି ହୋଇଛି । ୨୦୨୦-୨୧ ଏବଂ ୨୦୨୧-୨୨ ମସିହାରେ ଜିଲ୍ଲାରେ ଯେତିକି ଜମିରେ ଚାଷ ହୋଇଥିଲା ଚଳିତ ବର୍ଷ ମଧ୍ୟ ସେତିକି ଜମିରେ ଚାଷ ହୋଇଛି । କିନ୍ତୁ ସେହି ପରିମାଣରେ ବିହନ ବିକ୍ରି ହୋଇନାହିଁ ।
ଚାଷୀ ଆନ୍ଧ୍ରପ୍ରଦେଶ ବିହନ ପ୍ରତି ଆକୃଷ୍ଟ ହେଉଥିବାବେଳେ ସେଠାରେ ଥିବା ବେସରକାରୀ ଅନୁଷ୍ଠାନରେ ତିଆରି କରାଯାଉଥିବା ବିହନ କିଣୁଛନ୍ତି । ଏନେଇ ଚାଷୀ କହିଛନ୍ତି, "ଆନ୍ଧ୍ରପ୍ରଦେଶ ବିହନ ସ୍ଵଚ୍ଛ, ସଫାସୁତୁରା ଓ ଗୋଟିଏ କିସମର ଧାନରୁ ପ୍ରସ୍ତୁତ । ଓଡିଶା ସରକାରୀ ବିହନରେ ବହୁତ କେଳି ଥିବା ହେତୁ ଗତ ବର୍ଷ ସେମାନଙ୍କୁ କ୍ଷତି ସହିବାକୁ ପଡିଥିଲା । ଧାନ ହେବା ପରେ ମିଲକୁ ଧାନ ନେଲା ବେଳକୁ କଳା ପଡିଯାଇଥିବାରୁ ମିଲ ମାଲିକମାନେ ଧାନ ଫେରାଇ ଦେଇଛନ୍ତି । ଓଡିଶା ସରକାରଙ୍କ ଡିବିଟିଏଲ ମାଧ୍ୟମରେ ବିହନ ପାଇଁ ସବସିଡି ଦିଆଯାଉଥିଲେ ବି ତାହା ଚାଷୀଙ୍କ ଆକାଉଣ୍ଟକୁ ଆସୁନାହିଁ । ସେହିପରି ଓଡ଼ିଶାର ବିହନରୁ ତଳି ଭଲ ହେଉନାହିଁ ।" ତେଣୁ ଆନ୍ଧ୍ର ବିହନ କିଣିବାକୁ ସେମାନେ ବାଧ୍ୟ ହେଉଥିବା ଚାଷୀ ପ୍ରକାଶ କରିଛନ୍ତି ।
ଏହା ମଧ୍ୟ ପଢନ୍ତୁ...ଖରିଫ ଋତୁରେ ଚାଷୀଙ୍କୁ ସମସ୍ତ ସହଯୋଗ କରନ୍ତୁ ସରକାର: କିଷାନ କଂଗ୍ରେସ
ସେପଟେ ଜିଲ୍ଲା କୃଷି ନିର୍ଦ୍ଦେଶକ ଇରେନିୟସ ପ୍ରଧାନ କହିଛନ୍ତି, "ପାରଳାଖେମୁଣ୍ଡିରେ ଥିବା ବିହନ ପ୍ରକ୍ରିୟାକରଣ କେନ୍ଦ୍ରରେ ଆଧୁନିକ ଯନ୍ତ୍ରପାତି ସବୁ ସଂଯୋଗ କରାଯାଇ ବିହନ ବିକ୍ରି କରିବା ପାଇଁ ବ୍ୟବସ୍ଥା କରାଯାଇଛି । ଏହି ବର୍ଷ ଭଲ ବିହନ ଚାଷୀଙ୍କୁ ଦେବା ବ୍ୟବସ୍ଥା ମଧ୍ୟ କରାଯାଇଛି । ଆନ୍ଧ୍ର ଓଡିଶା ସୀମାନ୍ତ ଅଞ୍ଚଳ ହୋଇଥିବା ଯୋଗୁଁ ଏଠାକାର ଚାଷୀମାନେ ପ୍ରାୟତଃ ଆନ୍ଧ୍ରରୁ ହିଁ ବିହନ କ୍ରୟ କରି ଚାଷ କରିଥାନ୍ତି । ଚଳିତ ବର୍ଷ ପ୍ରାୟ 9ହଜାର ବିହନ ରହିଥିଲା । ସେଥିମଧ୍ୟରୁ 6 ହଜାର ବିହନ ବିକ୍ରୟ କରାଯାଇଛି । କିନ୍ତୁ ଯଦି କେହି ଚାଷୀ ଚାହିଁବେ ବିହନ ଆସି ନେଇପାରିବେ ।"
ତେବେ ବିହନ ନିଗମ ଉପରୁ ଚାଷୀଙ୍କ ଭରଷା ତୁଟିଯାଇଛି ପ୍ରତିକ୍ରିୟାରୁ ଜଣାପଡିଛି । ତଳି ରୁଆ କାମ ଆରମ୍ଭ ହୋଇଥିବାବେଳେ ଖତ ଖାଉଛି ବିହନ । ଏଭଳି ସ୍ଥିତିରେ ବିହନ ନିଗମ ଉପରେ ଭରଷା ନଥିବାରୁ ମୁହଁ ଫେରାଇ ନେଇଥିବା ଚାଷୀଙ୍କ ଭରଷା କେବେ ଫେରୁଛି ତାହାକୁ ଅପେକ୍ଷା ରହିଛି ।
ଇଟିଭି ଭାରତ, ଗଜପତି
