ଗଜପତି: କେନ୍ଦ୍ର ସରକାରଙ୍କ ପକ୍ଷରୁ ଅଣାଯାଇଥିବା ନୂତନ କୃଷି ଆଇନ କୃଷକଙ୍କ ଆୟକୁ ଦୁଇଗୁଣ ବୃଦ୍ଧି କରିବାରେ ସହାୟକ ହେବ ବୋଲି କହିଛନ୍ତି ରାଜ୍ୟ ବିଜେପି କୃଷକ ମୋର୍ଚ୍ଚା ସଂପାଦକ ସରୋଜ ସାହୁ । ତେବେ ଏହା କରାଇନଦେବା ପାଇଁ କୃଷକ ବିରୋଧୀ ଦଳମାନେ ବର୍ତ୍ତମାନ ଏହି ଆଇନ ସଂପର୍କରେ ମିଛି କଥା କହି ଏହା ବିରୁଦ୍ଧରେ ଚାଷୀଙ୍କୁ ମତାଇବା ଅତ୍ୟନ୍ତ ଦୁର୍ଭାଗ୍ୟଜନକ । ବର୍ତ୍ତମାନ କୃଷକମାନେ କଷ୍ଟ କରୁଥିବା ବେଳେ କେବଳ ପୁଞ୍ଜିପତି କିମ୍ବା ଦଳୀୟ ନେତା ଏବଂ ଦଲାଲମାନେ ଲାଭବାନ ହେଉଛନ୍ତି । ଫଳରେ ପ୍ରକୃତ ଚାଷୀ ଏହାଦ୍ବାରା କ୍ଷତିରେ ପଡୁଛି । ତେଣୁ ଏଥିରେ ସୁଧାର ଆଣିବା ପାଇଁ କେନ୍ଦ୍ର ସରକାର ନୂତନ କୃଷି ଆଇନ କରିଥିବା କହିଛନ୍ତି ସରୋଜ ସାହୁ ।
ଗଜପତି ଜିଲ୍ଲା ବିଜେପି କାର୍ଯ୍ୟାଳୟ ପରିସରରେ ଆୟୋଜିତ ସାମ୍ବାଦିକ ସମ୍ମିଳନୀରେ କେନ୍ଦ୍ର ସରକାର ଚାଷୀଙ୍କ ପାଇଁ ଧାନର ଏମଏସପି ୧୮୬୮ଟଙ୍କା ପ୍ରଦାନ କରୁଥିବା ବେଳେ ରାଜ୍ୟ ସରକାର ଏହାକୁ ଚାଷୀଙ୍କୁ ଦେବା ବଦଳରେ ବିଭିନ୍ନ ବାହାନା କରି ଟଙ୍କା କାଟୁଛନ୍ତି । ସେହିପରି ଚାଷୀଙ୍କୁ ଅଖା ପାଇଁ ଟଙ୍କା ଦିଆଯିବା ସହ ମଣ୍ଡିର ଉନ୍ନତି ପାଇଁ ଟଙ୍କା ପ୍ରଦାନ କରାଯାଉଥିଲେ ମଧ୍ୟ ତାହା ଚାଷୀଙ୍କୁ ପ୍ରଦାନ କରାଯାଉନାହିଁ ।
ତେଣୁ ଚାଷୀଙ୍କୁ ଏସବୁ କ୍ଷତିରୁ ରକ୍ଷା କରିବା ପାଇଁ କେନ୍ଦ୍ର ସରକାର ନୂତନ କୃଷି ଆଇନ ଆଣିଛନ୍ତି । ଏହି ଆଇନ କାର୍ଯ୍ୟକାରୀ ହେଲେ ଦଲାଲରାଜ କମିବ ଏବଂ ଏସବୁ ଚାଷୀ ବିରୋଧୀ ଦଳମାନଙ୍କୁ ସିଧାସଳଖ ପ୍ରଭାବିତ କରିବା ଆଶଙ୍କା କରି ସେମାନେ ଏହାକୁ ବିରୋଧ କରୁଥିବା ସେ କହିଛନ୍ତି । ତେବେ ଚାଷୀଙ୍କ ସ୍ବାର୍ଥ ପାଇଁ ବିଜେପି କୃଷକ ମୋର୍ଚ୍ଚା ସବୁବେଳେ ସଚେତନ ରହିଛି ଏବଂ ଏଥିପାଇଁ ପ୍ରୟାସ କରିବ ବୋଲି ସେ କହିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
