ଗଜପତି: କରୋନାର ଦ୍ଵିତୀୟ ଲହରିକୁ ନେଇ ସାରା ଦେଶ ଚିନ୍ତାରେ । ରାଜ୍ୟର ସ୍ଥିତି ମଧ୍ୟ ଜଟିଳ । ଏବେବି ସଂକ୍ରମଣ କମିବାର ନାଁ ଧରୁନାହିଁ । ସରକାର ରାଜ୍ୟରେ ଲକଡାଉନ୍ ଅବଧିକୁ ଆଉ ୧୬ ଦିନ ବୃଦ୍ଧି କରିଛନ୍ତି । ହେଲେ ରାଜ୍ୟର ୩ଟି ଜିଲ୍ଲାରେ ସ୍ଥିତି ନିୟନ୍ତ୍ରଣାଧୀନ ରହିଥିବାରୁ ଲକଡାଉନ୍ ନିୟମରେ କୋହଳ କରିଛନ୍ତି ସରକାର । ଏହି ୩ଟି ଜିଲ୍ଲା ମଧ୍ୟରେ ଗଜପତି ଜିଲ୍ଲା ରହିଛି ।
ଜିଲ୍ଲାରେ ଏପ୍ରିଲ ମାସରେ ୧୦୩୫ ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ମେ ମାସରେ ମୋଟ ୨୮୯୮ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୨୫ ଜଣଙ୍କ ମୃତ୍ୟୁ ହୋଇଥିବା ସରକାରୀ ଭାବେ କୁହାଯାଇଛି । ତେବେ ଗତ ଏକ ସପ୍ତାହ ମଧ୍ୟରେ ମାତ୍ର ୫୫୩ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ୨୪ ତାରିଖରେ ୬୬ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ୨୫ତାରିଖରେ ୪୩ଜଣ, ୨୬ତାରିଖରେ ୭୪ଜଣ, ୨୭ ତାରିଖରେ ୮୦ଜଣ, ୨୮ତାରିଖରେ ୩୬ଜଣ, ୨୯ ତାରିଖରେ ୧୦୫ଜଣ, ୩୦ତାରିଖରେ ୬୯ ଜଣ ଏବଂ ୩୧ ତାରିଖରେ ୮୦ ଜଣ ଆକ୍ରାନ୍ତ ଚିହ୍ନଟ ହୋଇଛନ୍ତି । ଏନେଇ ସାଧାରଣ ଲୋକେ ଆଶ୍ବସ୍ତି ପ୍ରକାଶ କରିବା ସହ ଲକଡାଉନ୍ ନିୟମରେ କୋହଳ କରାଯାଇଥିବାରୁ ସ୍ଵାଗତ କରିଛନ୍ତି । ଆସନ୍ତାକାଲି ଠାରୁ ଜିଲ୍ଲାରେ ସକାଳ ୭ଟାରୁ ୧ଟା ଯାଏଁ ସମସ୍ତ ଦୋକାନ ବଜାର ଖୋଲା ରହିବ । ଏହାଦ୍ଵାରା ସାଧାରଣ ଲୋକଙ୍କ ଠାରୁ ବ୍ୟବସାୟୀଙ୍କ ଯାଏଁ ସମସ୍ତେ ଉପକୃତ ହୋଇଇପାରିବେ ।
ଏନେଇ ଜିଲ୍ଲାପାଳ କହିଛନ୍ତି ଯେ, ପ୍ରଥମ ଲହରି ସମୟରେ ଅଧିକ ମାତ୍ରାରେ ପ୍ରବାସୀ ଶ୍ରମିକ ଜିଲ୍ଲାକୁ ଆସିଥିଲେ । କିନ୍ତୁ ଏଥର ହାତଗଣତି କିଛି ପ୍ରବାସୀ ଶ୍ରମିକ ଜିଲ୍ଲାକୁ ଆସିଛନ୍ତି । ତେଣୁ ସେମାନଙ୍କୁ ସଙ୍ଗରୋଧରେ ରଖିବା ସହଜ ହୋଇଥିଲା । ସେହିପରି ଲୋକେ ସଚେତନ ହୋଇ ସରକାରଙ୍କ ନିୟମକୁ ମାନିବା ସହ ଅଧିକରୁ ଅଧିକ ଲୋକେ ନିଜ ଆଡୁ ପରୀକ୍ଷା ମଧ୍ୟ କରକାଇଛନ୍ତି । ଯେଉଁଥିପାଇଁ ଏହି ସଫଳତା ମିଳିଥିବା ଜିଲ୍ଲାପାଳ କହିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
