ଗଜପତି: ଆଜିବି ବଞ୍ଚି ରହିଛି ଅନ୍ଧ ବିଶ୍ବାସ । ଆଧୁନିକ ଯୁଗରେବି ଅନ୍ଧ ବିଶ୍ବାସର ଅନ୍ଧଗଳିରୁ ବାହାରୁ ପାରୁନାହାନ୍ତି ଲୋକେ । ଫଳରେ ଗୁଣିଗାରେଡିକୁ ନେଇ ମଣିଷ ଘଟାଇ ଚାଲିଛି ଗୋଟିଏ ପରେ ଗୋଟିଏ ଜଘନ୍ୟ କାଣ୍ଡ । ଗଜପତି ଜିଲ୍ଲାର ସଦର ମହକୁମା ପାରଳାଖେମୁଣ୍ଡିର ସୁବାଷ ନଗରରେ ଗୁଣିଗାରେଡି ନେଇ ଜଣଙ୍କ ଘରେ ପଶି ଆକ୍ରମଣ କରିବା ସହ ବ୍ୟାପକ ଭଙ୍ଗାରୁଜା କରାଯାଇଛି । ସୁବାଷ ନଗରର ଜଣେ 15ବର୍ଷିୟା ନାବାଳିକା ନମିତା ଏକ ମାସ ହେବ ଅସୁସ୍ଥଥିଲେ ।
ତେବେ ଶେଷରେ ଚିକିତ୍ସା ପାଇଁ ଗୁଣିଗାରେଡିର ଆଶ୍ରୟ ନେଇଥିଲେ ପରିବାର ଲୋକେ । ହେଳେ କିଛି ସୁଫଳ ମିଳିନଥିବା ବେଳେ ଗତ ସନ୍ଧ୍ୟା ସମୟରେ ହଠାତ ନାବାଳକ ଜଣଙ୍କ ରାଜାରାଓ ନାଗବଂଶଙ୍କ ଘର ସମ୍ମୁଖକୁ ଯାଇ ଚିତ୍କାର କରିଥିଲା । ଫଳରେ ଲୋକେ ରାଜାରାଓଙ୍କ ପରିବାର ଗୁଣି କରି ନାବାଳିକାକୁ ହଇରାଣ କରୁଥିବା ସନ୍ଦେହ କରିଥିଲେ । ଏହାପରେ ବିଳମ୍ବିତ ରାତିରେ ସୁବାଷ ନଗରର ଲୋକେ ରାଜାରାଓଙ୍କ ଘରେ ପଶି ଆକ୍ରମଣ କରିବା ସହ ଘରର ସମସ୍ତ ଆସବାବପତ୍ର ଭଙ୍ଗାରୁଜା କରିଥିଲେ ।
ଘଟଣା ସ୍ଥଳରେ ଚାପା ଉତ୍ତେଜନ ଲାଗି ରହିଥିବା ବେଳେ ପାରଳାଖେମୁଣ୍ଡି ଥାନା ଅଧିକରୀ ବିବେକାନନ୍ଦ ସ୍ବାଇଁ ଏବଂ ଏସଡିପିଓ ରାମକୃଷ୍ଣ ପତି ଅଧିକ ଫୋର୍ସ ସହ ପହଞ୍ଚି ପରିସ୍ଥିତିକୁ ନିୟନ୍ତ୍ରଣ ମଧ୍ୟକୁ ଆଣିଥିଲେ । ଘଟଣାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପାରଳାଖେମୁଣ୍ଡି ଏସଡିପିଓ କହିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
