ଗଜପତି: ଗୁରୁ ଶିଷ୍ୟ ପରମ୍ପରା ଉପରେ ପୁଣି ଉଠିଛି ଆଙ୍ଗୁଳି । ଜଣେ ଶିକ୍ଷକଙ୍କ ମାଡରେ ଆଇଟିଆଇ ଛାତ୍ର ଗୁରୁତର । ଗଜପତି ଜିଲ୍ଲା ରାୟଗଡ ବ୍ଲକର ଏଭଳି ଏକ ଘଟଣା ଏବେ ଲୋକଲୋଚନକୁ ଆସିଛି ।
ଗଜପତି ଜିଲ୍ଲା ରାୟଗଡ ବ୍ଲକରେ ଥିବା ସରକାରୀ ଆଇଟିଆଇ କଲେଜର ଦ୍ବିତୀୟ ବର୍ଷର ଛାତ୍ର ଧର୍ମପଦ ନାୟକଙ୍କୁ ସେହି କଲେଜର ଜଣେ ଶିକ୍ଷକ ମାଡ ମାରିଥିବା ଅଭିଯୋଗ ହୋଇଛି । ଛାତ୍ରଙ୍କ ଗୁପ୍ତାଙ୍ଗରେ ଗଭୀର ଆଘାତ ଲାଗିଛି । ଗୁରୁତର ଅବସ୍ଥାରେ ପଡି ରହିଥିବା ଧର୍ମପଦକୁ ଅନ୍ୟ ଛାତ୍ରମାନେ ଉଦ୍ଧାର କରି ରାୟଗଡ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ । ସେଠାରେ ଡ୍ୟୁଟିରେ ଥିବା ଡ଼ଃ ଶ୍ରବଣ କୁମାର ତାଙ୍କ ଚିକିତ୍ସା କରିଥିଲେ ମଧ୍ୟ ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ ତୁରନ୍ତ ପାରଳାଖେମୁଣ୍ଡି ସ୍ଥାନାନ୍ତର କରିଛନ୍ତି ।
108 ଆମ୍ବୁଲାନ୍ସ ନମିଳିବାରୁ ଏକ ସ୍ବତନ୍ତ୍ର ଗାଡିରେ ଛାତ୍ର ଜଣଙ୍କୁ ପାରଳାଖେମୁଣ୍ଡି ସ୍ଥାନାନ୍ତର କରାଯାଇଛି । ତେବେ ଘଟଣା ସଂପର୍କରେ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କଲେଜର ଅଧ୍ୟକ୍ଷ ପ୍ରକାଶ ରଞ୍ଜନ ସୋରେନ କହିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
