ଗଜପତି: କିଶୋରୀ ଓ ମହିଳା ମାନଙ୍କୁ ସୁରକ୍ଷା ଦେବା ପାଇଁ ଗଜପତି ପୋଲିସ ପକ୍ଷରୁ ଆରମ୍ଭ ହୋଇଛି ସି ଟିମ କାର୍ଯ୍ୟକ୍ରମ । ସୋମବାର ଏହାର ଲୋଗ ଉଦଘାଟନ ହୋଇଥିବା ବେଳେ ଏହାର ଗୀତ ଲୋକାର୍ପଣ ହୋଇଛି । ଏସପି ସାରା ଶର୍ମା ଏହାକୁ ଉଦଘାଟନ କରିଛନ୍ତି ।
ନାରୀର ସୁରକ୍ଷା ପାଇଁ କରିଛି ପଣ ଦେଶପାଇଁ ନିଜକୁ କରିଛି ପଣ । ଶୀର୍ଷକ ସଙ୍ଗୀତଟି ଖୋଦ ଏସପି ସାରା ଶର୍ମା ଗାଇଥିବା ବେଳେ ଏହାକୁ ସଙ୍ଗୀତରେ ସଜାଇଛନ୍ତି ଗୁରୁ ରଘୁନାଥ ପାତ୍ର । ବିଭିନ୍ନ କାମରେ ମହିଳାମାନେ ନିୟୋଜିତ ହୋଇଥିବା ବେଳେ ସେମାନେ ଘର ବାହାରେ ରହିଥାନ୍ତି । ତେବେ ଅନେକ ସମୟରେ ସେମାନେ ବିଭିନ୍ନ କ୍ଷେତ୍ରରେ ନିର୍ଯାତନାର ଶିକାର ହେଉଥିବା ଅଭିଯୋଗ ହେଉଛି । କେବଳ ସେତିକି ନୁହେଁ ସ୍କୁଲ କଲେଜରେ ମଧ୍ୟ ଛାତ୍ରୀମାନେ ବିଭିନ୍ନ ପ୍ରକାର ନିର୍ଯାତନାର ଶିକାର ହୋଇଥାନ୍ତି ।
ଏଭଳି ମହିଳା ମାନଙ୍କୁ ସୁରକ୍ଷା ଦେବା ପାଇଁ ଗଜପତି ପୋଲିସ ପାଇଲଟ ପ୍ରକଳ୍ପ ଭାବେ ଆରମ୍ଭ କରିଛି ସି ଟିମ । ଶିଶୁ ସୁରକ୍ଷା ସହାୟତାରେ ଆରମ୍ଭ ହୋଇଥିବା ଏହି ପ୍ରକଳ୍ପ ପାଇଁ ଜଣେ ମହିଳା ଇନସପେକ୍ଟରଙ୍କ ନେତୃତ୍ବରେ ଏକ ସ୍ବତନ୍ତ୍ର ଟିମ ଗଠନ କରାଯାଇଛି । ଯେଉଁ ଟିମ ବିଭିନ୍ନ ଶିକ୍ଷାନୁଷ୍ଠାନ ଠାରୁ ଆରମ୍ଭ କରି କାର୍ଯ୍ୟାଳୟକୁ ଯାଇ ମହିଳାମାନଙ୍କୁ ସୁରକ୍ଷା ସଂପର୍କରେ ତଦାରଖ କରିବେ ବୋଲି ଏସପି କହିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
