ଗଜପତି: ପ୍ରାକ ଗଜପତି ଉତ୍ସବ ‘ରାହାଗିରି’ରେ ନାଚିଲେ ଏସପି ଓ ଜିଲ୍ଲାପାଳ । ଏସପି ସାରା ଶର୍ମା ଆଦିବାସୀ ନୃତ୍ୟରେ ପାଦରେ ପାଦ ମିଶାଇ ନାଚିବା ସହ ଲୋକଙ୍କୁ ଉତ୍ସାହିତ କରିବା ଲାଗି ଗୀତ ଗାଇଛନ୍ତି । ସେହିପରି ଜିଲ୍ଲାପାଳ ଅନୁପମ ସାହା ମଧ୍ୟ ଆଦିବାସୀ ନୃତ୍ୟରେ ନାଚୁଥିବା ଦେଖିବାକୁ ମିଳିଛି ।
ଶୀତୁଆ ସକାଳରେ ଆରମ୍ଭ ହୋଇଥିବା ଏହି ଉତ୍ସବରେ ପ୍ରଶାସନିକ ଅଧିକାରୀଙ୍କ ଠାରୁ ଆରମ୍ଭ କରି ସହରର ପିଲା ଠାରୁ ବୟସ୍କ ଲୋକ ସାମିଲ ହୋଇଥିଲେ । ଏହି ଅବସରରେ ବିଭିନ୍ନ ସାଂସ୍କୃତିକ ଅନୁଷ୍ଠାନର କଳାକାରମାନେ ନିଜ ନିଜର କଳା ପ୍ରଦର୍ଶନ କରିଥିବା ବେଳେ ଯୁବତୀମାନେ ଝୋଟି ପ୍ରତିଯୋଗିତାରେ ସାମିଲ ହୋଇଥିଲେ । କିଛି ସମୟ ପାଇଁ ପାରଳାଖେମୁଣ୍ଡି ବଡଦାଣ୍ଡ ଲୋକାରଣ୍ୟରେ ପରିଣତ ହୋଇଥିଲା ।
ଆସନ୍ତା 10 ତାରିଖରୁ 14 ତାରିଖ ଯାଏଁ ଦୀର୍ଘ 5ଦିନ ଧରି ଅନୁଷ୍ଠିତ ହେବ ଗଜପତି ଉତ୍ସବ 2019 ଏବଂ ପଲ୍ଲିଶ୍ରୀ ମେଳା । ଏଥିପାଇଁ ବର୍ତ୍ତମାନ ସାରା ଜିଲ୍ଲା ଚଳଚଞ୍ଚଳ । ଗତ କିଛିଦିନ ହେବ ବ୍ଲକ ସ୍ତରୀୟ ଉତ୍ସବ ଜାରି ରହିଥିବାବେଳେ ରବିବାର ପାରଳାଖେମୁଣ୍ଡି ପୌରାଞ୍ଚଳରେ ଅନୁଷ୍ଠିତ ହୋଇଛି ପ୍ରାକ ଗଜପତି ଉତ୍ସବ ‘ରାହାଗିରି’ । ଏଥିରେ ଅନେକ କଳାକାର ଭାଗ ନେଇ ନିଜ ନିଜର କଳା ପ୍ରଦର୍ଶନ କରିଛନ୍ତି ।
କିଏ ପାରମ୍ପରିକ ବେଶ ପୋଷାକରେ ଆଦିବାସୀ ନୃତ୍ୟ ପ୍ରଦର୍ଶନ କରିଛି ତ ଆଉ କିଏ ରାଜ ରାସ୍ତାରେ ଯୋଗାଭ୍ୟାସ କରିଛି । ସେହିପରି ଏଠାରେ ପାଇକ ଆଖଡା ହୋଇଥିବାବେଳେ ପାରଳାଖେମୁଣ୍ଡିର ଅନ୍ୟତମ ପରମ୍ପରା ଗଜମୁଆ ମଧ୍ୟ ପ୍ରଦର୍ଶିତ ହୋଇଛି । ସେହିପରି ପିଲାଙ୍କ ଦ୍ବାରା ସ୍କେଟିଂ କରାଯିବା ସହ ଓଡିଶୀ ନୃତ୍ୟ ପରିବେଷଣ କରାଯାଇଛି ।
ତେବେ ସୁବୁଠୁ ବଡ କଥା, ଏହି ଉତ୍ସବରେ ଜିଲ୍ଲାପାଳ ଓ ଏସପି ସାମିଲ ହୋଇ କଳାକାରଙ୍କ ମନୋବଳକୁ ଦ୍ବିଗୁଣିତ କରିଛନ୍ତି । ନିଜେ ଏସପି ଗୀତ ଗାଇବା ସହ ନାଚିଥିବାବେଳେ ଜିଲ୍ଲାପାଳ ମଧ୍ୟ ନାଚିଥିବା ଦେଖିବାକୁ ମିଳିଛି । ଅନ୍ୟପଟେ 2017 ମସିହା ପରେ ଦ୍ବିତୀୟ ଥର ପାଇଁ ସହରରେ ରାହାଗିରି ହେଉଥିବାରୁ ଏହାକୁ ଦେଖିବା ଲାଗି ପ୍ରବଳ ଜନସମାଗମ ହୋଇଛି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
