ଗଜପତି: ପାରଳାଖେମୁଣ୍ଡିରେ ଥିବା ଶତାୟୁ ପୁରାତନ 2ଟି ହାଇସ୍କୁଲକୁ ପୋଷ୍ୟ ଭାବେ ଗ୍ରହଣ କଲେ ପୂର୍ତ୍ତ ବିଭାଗ ସଚିବ ଡା.କ୍ରିଷନ । ଏନେଇ ମୋ ସ୍କୁଲ ଅଭିଯାନ ପକ୍ଷରୁ ଟ୍ବିଟ କରି ସୂଚନା ଦିଆଯାଇଛି । ମହାରାଜାଙ୍କ ବାଳକ ଉଚ୍ଚ ବିଦ୍ୟାଳୟ 1857 ମସିହାରେ ଏବଂ ବାଳିକା ଉଚ୍ଚ ବିଦ୍ୟାଳୟ 1919 ମସିହାରେ ପାରଳାଖେମୁଣ୍ଡି ମହାରାଜାଙ୍କ ଦ୍ବାରା ସ୍ଥାପିତ ହୋଇଥିଲା । ପରବର୍ତ୍ତୀ ସମୟରେ ଏହା ସରକାରଙ୍କ ଦ୍ବାରା ପରିଚାଳିତ ହୋଇ ଆସୁଛି । ଜଣେ ବରିଷ୍ଠ ପ୍ରଶାସନିକ ଅଧିକାରୀ ଏହି ବିଦ୍ୟାଳୟଗୁଡିକୁ ପୋଷ୍ୟ ଭାବେ ଗ୍ରହଣ କରିବା ଦ୍ବାରା ସ୍କୁଲର ବହୁ ଉନ୍ନତି ହୋଇପାରିବ ବୋଲି ବିଭିନ୍ନ ମହଲରେ ମତ ପ୍ରକାଶ ପାଇଛି ।
ଏହି ଦୁଇ ଶତାୟୁ ବିଦ୍ୟାଳୟର ଅନେକ ଶିକ୍ଷାର୍ଥୀ ରାଜ୍ୟ ତଥା ଦେଶ ବିଦେଶରେ ବହୁ ଗୁରୁତ୍ବପୂର୍ଣ୍ଣ ପଦ ପଦବୀରେ ରହିଛନ୍ତି । ତେବେ ମୋ ସ୍କୁଲ ଅଭିଯାନ ମାଧ୍ୟମରେ ଅନେକ ପୁରାତନ ଛାତ୍ର ନିଜକୁ ସ୍କୁଲ ବିକାଶରେ ସାମିଲ କରିଛନ୍ତି । ଯାହା ମାଧ୍ୟମରେ ମହାରାଜାଙ୍କ ବାଳକ ଉଚ୍ଚ ବିଦ୍ୟାଳୟ 2ଲକ୍ଷ 88ହଜାର ଟଙ୍କାର ପାଣ୍ଠି ସଂଗ୍ରହ କରିଥିବା ବେଳେ ମହାରାଜାଙ୍କ ବାଳିକା ଉଚ୍ଚ ବିଦ୍ୟାଳୟ ପ୍ରାୟ 2ଲକ୍ଷ ଟଙ୍କାର ପାଣ୍ଠି ସଂଗ୍ରହ କରିପାରିଛି । ଏହି ଟଙ୍କାରେ ସ୍କୁଲର ଉନ୍ନୟନମୂଳକ କାର୍ଯ୍ୟ କରିବା ପାଇଁ ସ୍କୁଲ କର୍ତ୍ତୃପକ୍ଷ ସରକାରଙ୍କୁ ପ୍ରସ୍ତାବ ଦେଇଛନ୍ତି । ଏହା ଅତିଶୀଘ୍ର କାର୍ଯ୍ୟକାରୀ ହେବ ବୋଲି ଉଭୟ ସ୍କୁଲର ପ୍ରଧାନ ଶିକ୍ଷକ ଜଣାଇଛନ୍ତି ।
ତେବେ ଏହି ଦୁଇ ସ୍କୁଲ ସହ ସମ୍ପର୍କ ନଥିବା ଜଣେ ଅଣ ଓଡିଆ ପ୍ରଶାସନିକ ଅଧିକାରୀ ଏହାକୁ ପୋଷ୍ୟ ଭାବେ ଗ୍ରହଣ କରିବା ନିଷ୍ପତ୍ତିକୁ ସାଧାରଣରେ ପ୍ରଶଂସା କରାଯାଉଛି । ଯାହାଦ୍ବାରା ସ୍କୁଲର ଆହୁରି ଉନ୍ନତି ଘଟିବ ବୋଲି ଆଶା ସଞ୍ଚାର ହୋଇଛି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
