ଗଜପତି: ସ୍ଥାନୀୟ ଗୁରାଣ୍ଡି ଥାନା ଅନ୍ତର୍ଗତ ଜଙ୍ଗଲପାଡୁ ଗ୍ରାମରେ ଆଶା ଓ ଆଶଙ୍କାରେ ଗ୍ରାମବାସୀ । ଦୁଇ ଦିନ ହେବ ଘରେ ଜଳିନି ଚୁଲି କି ମା’ ବାପାଙ୍କ ଆଖିରୁ ଶୁଖିନି ଲୁହ । ଥାନା ବାବୁଙ୍କୁ ଆକୁଳ ନିବେଦନ କରିବି ମିଳି ପାରିନାହିଁ କୌଣସି ସୁଫଳ । ତେଣେ ପୋଲିସର ଅପାରଗତା ଯୋଗୁଁ 24 ଘଣ୍ଟାରୁ ଉର୍ଦ୍ଧ୍ବ ସମୟ ହେବ ନିଖୋଜ ଥିବା ପିଲାଙ୍କ କୌଣସି ଖବର ନପାଇ ପାଗଳ ପ୍ରାୟ ପରିବାର ଲୋକେ ।
ସୂଚନା ଅନୁଯାୟୀ ଶନିବାର ସକାଳେ ସମ୍ପୃକ୍ତ ଗ୍ରାମର 5 ଜଣ ଛାତ୍ର ସ୍କୁଲ ଯିବାକୁ କହି ଘରୁ ବାହାରି ଥିଲେ । ହେଲେ ସ୍କୁଲ ସମୟ ସରିବା ପରେ ମଧ୍ୟ ସେମାନେ ଘରକୁ ଫେରିନଥିଲେ । ଏନେଇ ସ୍କୁଲରେ ପଚରାଉଚୁରା କରିବାରୁ ଜଣା ପଡିଥିଲା କି ପିଲାମାନେ ଅଧା ବାଟରୁ ସ୍କୁଲ ବସ୍ରୁ ଓହ୍ଲାଇ ଯାଇଥିଲେ । କିନ୍ତୁ ଏହାପରେ ସେମାନେ କୁଆଡେ ଗଲେ ଓ କାହିଁକି ଗଲେ ସେନେଇ ମିଳିପାରୁନି କୌଣସି ପତ୍ତା ।
ପରିବାର ଲୋକେ ଏନେଇ ଆଖପାଖ ଅଞ୍ଚଳ ସହ ବସ୍ଷ୍ଟାଣ୍ଡ ଓ ରେଳ ଷ୍ଟେସନରେ ପଚରା ଉଚୁରା କରିବା ପରେ ବି କୌଣସି ସୁରାକ ନପାଇବାରୁ ଗୁରାଣ୍ଡି ଥାନାରେ ଏକ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ତଦନ୍ତ ଆରମ୍ଭ କରିଥିବା ଥାନା ପକ୍ଷରୁ ସୂଚନା ଦିଆଯାଇଥିଲେ ସୁଦ୍ଧା ଘଟଣାର 24 ଘଣ୍ଟା ବିତିଲା ପରେ ବି ଫଳ ଶୂନ । ତେବେ ଗୋଟିଏ ପଟେ ପିଲାଙ୍କ ଖବର ନପାଇ ପରିବାର ଲୋକ ଅସ୍ତବ୍ୟସ୍ତ ହେଉଥିବା ବେଳେ ଅନ୍ୟପଟେ ଘଟଣାରେ ପୋଲିସର ନିରବତା ଗ୍ରାମରେ ଏକ ଅଜଣା ଆତଙ୍କ ସୃଷ୍ଟି କରିଛି ।
ସମ୍ପୃକ୍ତ ଘଟଣାରେ ଗୁରାଣ୍ଡି ଥାନା ଆଇଆଇସିଙ୍କୁ ତଦନ୍ତ ସମ୍ପର୍କରେ ପଚରା ଯିବାରୁ ସେ ଏନେଇ କୌଣସି ପ୍ରତିକ୍ରିୟା ଦେବାକୁ ରୋକଠୋକ ମନା କରିଦେଇଥିଲେ । ଯାହା ନିଖୋଜ ଛାତ୍ରଙ୍କ ପରିବାର ଲୋକଙ୍କୁ ଅଧିକ ଭୟଭୀତ କରିଛି । ତେଣୁ ଉପାୟଶୂନ୍ୟ ହୋଇ ଗଣମାଧ୍ୟମ ଆଗରେ ପିଲାଙ୍କୁ ଫେରେଇ ଆଣିବାକୁ ନିବେଦନ କରିଛନ୍ତି ପରିବାର ଲୋକେ ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
