ଗଜପତି: ପାରଳାଖେମୁଣ୍ଡି ଟାଉନ୍ ହଲ୍ ପରିସରରେ ଗତ ରବିବାର ମଧ୍ୟରାତ୍ରିରେ ୫ଟି କାର୍ ପୋଡି ଘଟଣାର ପର୍ଦ୍ଦାଫାସ କରିଛି ପୋଲିସ୍ । ଗୁରୁବାର ୬ଜଣକୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ସାମାନ୍ୟ ବଚସାକୁ ନେଇ ରାଗ ରଖି ଏଭଳି କାଣ୍ଡ କରିଛନ୍ତି ଅଭିଯୁକ୍ତ । ଏହାକୁ ନେଇ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି ପାରଳାଖେମୁଣ୍ଡି ଥାନା ଅଧିକାରୀ ବିବେକାନନ୍ଦ ସ୍ବାଇଁ । ୬ଜଣ ଗିରଫ ଅଭିଯୁକ୍ତ ହେଲେ ପାରଳାଖେମୁଣ୍ଡି ଘାସି ସାହିର ଭୀମ ନାଗବଂଶ (୨୫), ଦିବାକର ପାଡାଲ(୨୩), ଜଗଦୀଶ ପାଡାଲ(୨୧), ତିରୁପତି ଜଙ୍ଗମ(୨୩), ଅର୍ଜୁନ ଲିଆରୀ(୨୫) ଏବଂ ସୁଦେଶ ବାଦା(୧୯) ।
ଏହି ଘଟଣାର ଅଧିକ ତଦନ୍ତ ଜାରି ରହିଛି ଏବଂ ଅତିଶୀଘ୍ର ଏଥିରେ ସଂପୃକ୍ତ ଥିବା ଅନ୍ୟ ଅଭିଯୁକ୍ତମାନଙ୍କୁ ମଧ୍ୟ ଗିରଫ କରାଯିବ ବୋଲି ପୋଲିସ କହିଛି । ଗତ ରବିବାର ମଧ୍ୟାହ୍ନରେ ପାରଳାଖେମୁଣ୍ଡି ନିୟନ୍ତ୍ରିତ ବଜାର କମିଟି ଗୋଦାମ୍ ନିକଟରେ ସାମାନ୍ୟ ଘଟଣାକୁ ନେଇ ଜାଗିଲି ସାହିର ଅଭିଯୋଗକାରୀ ସିର୍ଲା ଅରୁଣ କୁମାର ଏବଂ ତାଙ୍କ ବନ୍ଧୁ ଏ.ରାମକ୍ରିଷ୍ଣାଙ୍କ ସହ ଅଭିଯୁକ୍ତଙ୍କ ପାଟିତୁଣ୍ଡ ହୋଇଥିଲା । ଅଭିଯୁକ୍ତମାନେ ପ୍ରବଳ ମଦ୍ୟପାନ କରିଥିବା ବେଳେ ପାଟିତୁଣ୍ଡ ବେଳେ ସିର୍ଲାଙ୍କ ଗାଡିକୁ ରାତି ସୁଦ୍ଧା ନଷ୍ଟ କରିଦେବାକୁ ଧମକ ଦେଇଥିଲେ ।
ଏହାପରେ ସେହିଦିନ ସନ୍ଧ୍ୟା ପ୍ରାୟ ୫ଟା ସମୟରେ ଅଭିଯୁକ୍ତମାନେ ରାମକ୍ରିଷ୍ଣାଙ୍କ ଘରେ ପଶି ତାଙ୍କୁ ଏବଂ ତାଙ୍କ ପରିବାର ବର୍ଗଙ୍କୁ ଆକ୍ରମଣ କରିଥିଲେ । ଏନେଇ ପାରଳାଖେମୁଣ୍ଡି ଥାନାରେ ଏକ ମାମଲା ରୁଜୁ କରାଯାଇଥିଲା । ପରେ ରାତିରେ ଅରୁଣଙ୍କ ଫୋର୍ଡ କାର୍କୁ ନିଆଁ ଲଗାଇ ଦେଇଥିଲେ ଅଭିଯୁକ୍ତ । ହେଲେ କେବଳ ଏହି ଗୋଟିଏ କାର ପୋଡିଲେ ସେମାନଙ୍କ ଉପରେ ସନ୍ଦେହ ହେବ ବୋଲି ଭାବି ସେହି ନିକଟରେ ଥିବା ଅନ୍ୟ ୪ଟି ଗାଡିକୁ ମଧ୍ୟ ନିଆ ଲଗାଇଦେବା ସହ ଅନ୍ୟ ଗୋଟିଏ ଗାଡି ଭଙ୍ଗାରୁଜା କରିଥିଲେ ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
