ଯାଜପୁର/ଗଜପତି/ନବରଙ୍ଗପୁର: ବରିଷ୍ଠ ନାଗରିକ ଦିବସ ଅବସରରେ ଆଜି ସାରା ରାଜ୍ୟରେ ବେଶ ଆଡମ୍ବରର ସହ ପାଳନ ହୋଇଛି ବରିଷ୍ଠ ନାଗରିକଙ୍କ ପାଇଁ ଦିନଟିଏ । ବରିଷ୍ଠ ନାଗରିକମାନଙ୍କ ସ୍ବାସ୍ଥ୍ୟ, ସୁରକ୍ଷା, ଦୈନନ୍ଦିନ ଜୀବନ କିପରି ହସଖୁସିରେ କଟିବ ଓ ସେମାନେ ମାନସିକ ଚାପରୁ ମୁକ୍ତି ପାଇ ଏକ ସୁସ୍ଥ ଜୀବନ ଅତିବାହିତ କରିପାରିବେ ସେନେଇ ଆୟୋଜିତ ହୋଇଛି କର୍ମଶାଳା ।
ଯାଜପୁର, ଗଜପତି ଓ ନବରଙ୍ଗପୁରରେ ଏନେଇ ଆୟୋଜିତ ହୋଇଛି ସ୍ବତନ୍ତ୍ର କାର୍ଯ୍ୟକ୍ରମ । ଏହି ଜିଲ୍ଲାମାନଙ୍କରେ ବରିଷ୍ଠ ନାଗରିକମାନଙ୍କୁ ଫୁଲ, ଚନ୍ଦନ ଦେଇ ବନ୍ଦାପନା କରିବା ସହ ସେମାନଙ୍କର ମାଗଣା ସ୍ବାସ୍ଥ୍ୟ ପରୀକ୍ଷାର ବ୍ୟବସ୍ଥା କରାଯାଇଥିଲା । ଯାଜପୁର ବ୍ୟାସନଗର ପୌରପାଳିକା ପକ୍ଷରୁ ବ୍ୟାସଦେବ ଟାଉନ ହଲଠାରେ ଏହି ଦିବସ ପାଳନ କରାଯାଇ ବରିଷ୍ଠ ନାଗରିକମାନଙ୍କୁ ପରିଚୟ ପତ୍ର ପ୍ରଦାନ କରାଯାଇଛି । ଏହି କାର୍ଯ୍ୟକ୍ରମରେ ପୌର ପ୍ରଶାସନ, ସ୍ଥାନୀୟ ପୋଲିସ, ବିଭିନ୍ନ ବରିଷ୍ଠ ନାଗରିକ ମଞ୍ଚ ଓ ସ୍ବେଚ୍ଛାସେବୀ ସଙ୍ଗଠନ ଯୋଗ ଦେଇଥିଲେ ।
ଗଜପତି ଜିଲ୍ଲା ପାରଳାଖେମୁଣ୍ଡିରେ ମଧ୍ୟ ଜିଲ୍ଲାସ୍ତରୀୟ କାର୍ଯ୍ୟକ୍ରମର ଆୟୋଜନ କରାଯାଇଥିଲା । ଏହି ଅବସରରେ ସକାଳେ ନିର୍ବାହୀ ଅଧିକାରୀ ବରିଷ୍ଠ ନାଗରିକମାନଙ୍କୁ ନେଇ ଯୋଗାଭ୍ୟାସ କରିବା ପରେ ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇଥିଲା । ଏଥିସହ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଜିଲ୍ଲାପାଳ ଅନୁପମା ସାହାଙ୍କ ସମେତ ଅନେକ ବରିଷ୍ଠ ଅଧିକାରୀ ଯୋଗ ଦେଇ ବରିଷ୍ଠ ନାଗରିକମାନଙ୍କୁ ସମ୍ବର୍ଦ୍ଧିତ କରିଥିଲେ ।
ସେହିପରି ନବରଙ୍ଗପୁର ଜିଲ୍ଲାରେ ବରିଷ୍ଠ ନାଗରିକ ଦିବସ ଅବସରରେ ମା’ ଭଣ୍ଡାରଘରଣୀ ମନ୍ଦିର ପାଖରୁ ଏକ ରାଲି ବାହାରି ସହର ପରିକ୍ରମା କରିଥିଲା । ଜିଲ୍ଲାପାଳ ଡ଼ଃ ଅଜିତ କୁମାର ମିଶ୍ର କାର୍ଯ୍ୟକ୍ରମରେ ଯୋଗ ଦେଇ ରାଲିକୁ ସବୁଜ ପତାକା ଦେଖାଇଥିଲେ । ପୌରପାଳିକା ନିର୍ବାହୀ ଅଧିକାରୀ ଓ ଜିଲ୍ଲା ପ୍ରଶାସନର ବିଭିନ୍ନ ଅଧିକାରୀ ମଧ୍ୟ କାର୍ଯ୍ୟକ୍ରମରେ ସାମିଲ ରହିଥିଲେ । କାର୍ଯ୍ୟକ୍ରମରେ ଉପସ୍ଥିତି ବରିଷ୍ଠ ନାଗରିକମାନଙ୍କୁ ପରିଚୟ ପତ୍ର ପ୍ରଦାନ କରାଯିବା ସହ ଆଗାମୀ ଦିନରେ ସେମାନଙ୍କୁ ଆବଶ୍ୟକ ସୁବିଧା ପ୍ରଦାନ କରିବା ର ଚେଷ୍ଟା କରାଯିବ ବୋଲି ଜିଲ୍ଲା ପ୍ରଶାସନ ପ୍ରତିଶୃତି ଦେଇଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା/ ଗଜପତିରୁ ହରିହର ପଟ୍ଟନାୟକ/ ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
