ଗଜପତି: କିଛି ଦିନର ଆଶ୍ବସ୍ତି ପରେ ପୁଣି କରୋନା ଡରାଇବା ଆରମ୍ଭ କରିଛି । ଗଜପତି ଜିଲ୍ଲାରେ କୋରୋନା ସଂକ୍ରମଣ ବଢ଼ିବାରେ ଲାଗିଛି। ପ୍ରଥମ ଅପେକ୍ଷା ଦ୍ବିତୀୟ ଲହର ଅଧିକ ସଂକ୍ରାମକ ଏବଂ ଏହାର ରୂପ ମଧ୍ୟ ଭିନ୍ନ ବୋଲି କୁହାଯାଉଛି । ତେଣୁ ଏହାକୁ ନେଇ ସାଧାରଣ ଲୋକେ ଚିନ୍ତାରେ ପଡ଼ିଛନ୍ତି । ତେବେ ଭୟ କରିବାର କୌଣସି କାରଣ ନାହିଁ । ସମସ୍ତ ପ୍ରକାର ବ୍ୟବସ୍ଥା ଗ୍ରହଣ କରାଯାଉଛି । କେବଳ ଲୋକେ ସଚେତନ ହୋଇ ପ୍ରଶାସନକୁ ସହଯୋଗ କରିବା ଆବଶ୍ୟକ ବୋଲି ଜିଲ୍ଲାପାଳ କହିଛନ୍ତି।
2020 ମସିହାରେ କୋରୋନା ସଂକ୍ରମଣର ଯୋଗୁଁ ଗଜପତି ଜିଲ୍ଲାରେ ୩୨ଜଣ ଆକ୍ରାନ୍ତ ପ୍ରାଣ ହରାଇଥିଲେ। ଏହାକୁ ନେଇ ଲୋକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଥିଲା । ନଭେମ୍ବର ମାସ ପରଠାରୁ ଜିଲ୍ଲାରେ ଜଣେ ହେଲେ ଆକ୍ରାନ୍ତ ଚିହ୍ନଟ ହୋଇନଥିଲେ। ଫଳରେ ଲୋକେ ଆଶ୍ବସ୍ତ ହେବା ସହ ସ୍ଥିତି ଧିରେଧିରେ ସ୍ବାଭାବିକ ହୋଇଥିଲା। ତେବେ ପୁଣି ଗତ ୩ ତାରିଖରୁ ଦ୍ବିତୀୟ ଲହର ଆରମ୍ଭ ହୋଇଛି।
ଗଜପତିରେ ବର୍ତ୍ତମାନ ସୁଦ୍ଧା ୩୬ଜଣ ଆକ୍ରାନ୍ତ ଚିହ୍ନଟ ହେଲେଣି । ଆକ୍ରାନ୍ତଙ୍କୁ ସଙ୍ଗରୋଧରେ ରଖାଯିବା ସହ ସେମାନଙ୍କ ନିୟମିତ ସ୍ବାସ୍ଥ୍ୟ ପରୀକ୍ଷା କରାଯାଉଥିବା ଜିଲ୍ଲାପାଳ କହିଛନ୍ତି । ଜିଲ୍ଲାରେ କୋରୋନା ଗ୍ରାଫ୍ ବୃଦ୍ଧି ପାଉଥିବାରୁ ପ୍ରଶାସନ ସଜାଗ ହୋଇ ଉଠିଛି । ଜିଲ୍ଲାର ପୂର୍ବଥର ପରୀକ୍ଷଣ କେନ୍ଦ୍ର କାର୍ଯ୍ୟକ୍ଷମ କରିବା ସହ ୪ଟି ଆରଆରଟି ଟିମ୍ ଗଠନ କରାଯାଇଛି । ସେହିପରି ଜିଲ୍ଲାର ସମସ୍ତ ପ୍ରବେଶ ପଥରେ ଯାଞ୍ଚକୁ କଡାକଡି କରାଯାଇଛି । ପାରଳାଖେମୁଣ୍ଡି ସହରର ବିଜୁ କଲ୍ୟାଣ ମଣ୍ଡପ ଏବଂ ନିୟନ୍ତ୍ରିତ ବଜାର କମିଟି କାର୍ଯ୍ୟାଳୟ ପରିସରରେ ଦୁଇଟି କୋଭିଡ ପରୀକ୍ଷା କେନ୍ଦ୍ର ସ୍ଥାପନ କରାଯାଇଛି ।
କୌଣସି ପ୍ରକାରର କରୋନା ଲକ୍ଷଣ ଦେଖାଦେଲେ ସେମାନେ ତୁରନ୍ତ ଏଠାକୁ ଆସି ପରୀକ୍ଷା କରାଇ ନେବାକୁ ଜିଲ୍ଲାପାଳ ଅନୁରୋଧ କରିଛନ୍ତି । ସେହିପରି ଜିଲ୍ଲାରେ ବର୍ତ୍ତମାନ ଗୋଟିଏ କୋଭିଡ କେୟାର ସେଣ୍ଟର ଖୋଲାଯାଇଛି। କୋଭିଡ ନିୟମର ଖିଲାପ କଲେ ସଂପୃକ୍ତ ବ୍ୟକ୍ତିଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦେଇଛି ପ୍ରଶାସନ । ସେହିଭଳି ପୋଲିସ ପକ୍ଷରୁ କୋଭିଡ କଟକଣା ସଂପର୍କରେ ପ୍ରଚାର କରାଯାଇଛି । କୋରୋନା କଟକଣାକୁ ମାନବା ପାଇଁ ଜିଲ୍ଲାପାଳ ଅନୁରୋଧ କରିଛନ୍ତି। ସେହିଭଳି ମାସ୍କ ପିନ୍ଧିବା ଏବଂ ସାମାଜିକ ଦୂରତା ରକ୍ଷା କରିବା ପାଇଁ ଜିଲ୍ଲାପାଳ ଅନୁରୋଧ କରିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
