ଗଜପତି: ଜିଲ୍ଲାରେ ବୁଧବାର ପୁଣି ୭୬ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ଫଳରେ ଜିଲ୍ଲାରେ ମୋଟ ଆକ୍ରାନ୍ତଙ୍କ ସଂଖ୍ୟା ୩୫୫ରେ ପହଞ୍ଚିଛି । ବୁଧବାର ଚିହ୍ନଟ ହୋଇଥିବା ୭୬ ଜଣଙ୍କ ମଧ୍ୟରୁ ୬୨ ଜଣ ଗୋଷାଣି ବ୍ଲକର ହୋଇଥିବା ବେଳେ ରାୟଗଡ ବ୍ଳକର ୧୦ ଜଣ, ଗୁମା ଏବଂ କାଶୀନଗର ବ୍ଲକର ୨ ଜଣ ଲେଖାଏଁ ରହିଥିବା ସୂଚନା ମିଳିଛି।
ସେହିଭଳି ୨୩ ଜଣ ତାମିଲନାଡୁ ଫେରନ୍ତା ହୋଇଥିବା ବେଳେ ୨୮ ତେଲେଙ୍ଗାନା ଜଣେ ଲେଖାଁଏ ତ୍ରିପୁରା ଏବଂ ଆନ୍ଧ୍ରପ୍ରଦେଶରୁ ୧୬ଜଣ ଲେଖାଏଁ ଫେରିଥିବା ପ୍ରଶାସନ କହିଛି । ବୁଧବାର ଚିହ୍ନଟ ହୋଇଥିବା ୭୬ ଜଣଙ୍କ ମଧ୍ୟରୁ ୬୮ ଜଣ ସଙ୍ଗରୋଧ କେନ୍ଦ୍ରରେ ରହିଥିଲେ। ବଳକା ୮ ଜଣ କଣ୍ଟେନମେଣ୍ଟ ଜୋନ ଅଞ୍ଚଳର ବୋଲି ପ୍ରଶାସନ ସୂଚନା ଦେଇଛି ।
କଣ୍ଟେନମେଣ୍ଟ ଅଞ୍ଚଳରେ ସ୍ବାସ୍ଥ୍ୟ ଟିମ ଯାଞ୍ଚ ବେଳେ ଚିହ୍ନଟ ହୋଇଥିବା ୮ ଜଣ ବ୍ୟକ୍ତିଙ୍କ ଲକ୍ଷଣ ଥିବା ଜଣାପଡିବା ପରେ ସ୍ବାବ ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା । ସେମାନଙ୍କ ସ୍ବାବ ରିପୋର୍ଟ ପଜିଟିଭ ଆସିବା ପରେ ସମସ୍ତଙ୍କୁ ଜିଲ୍ଲା କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଥିବା ଜିଲ୍ଲାପାଳ ଅନୁପମ ଶାହା ସୂଚନା ଦେଇଛନ୍ତି । ସେପଟେ ଜିଲ୍ଲାରେ ମୋଟ ୩୫୫ଜଣ ଆକ୍ରାନ୍ତଙ୍କ ମଧ୍ୟରୁ ବର୍ତ୍ତମାନ ସୁଦ୍ଧା ୯୮ ଜଣ ସୁସ୍ଥ ହୋଇ ଘରକୁ ଫେରୁଥିବା ବେଳେ ଅନ୍ୟ ୨୫୭ ଜଣଙ୍କ ଚିକିତ୍ସା ଜାରି ରହିଥିବା ଜିଲ୍ଲାପାଳ କହିଛନ୍ତି ।
ତେବେ ଚିହ୍ନଟ ହୋଇଥିବା ଆକ୍ରାନ୍ତ ମଧ୍ୟରୁ ୬୮ ଜଣ ବିଭିନ୍ନ ପର୍ଯ୍ୟାୟରେ ଜିଲ୍ଲାକୁ ଫେରିଥିବା ବେଳେ ଗଜପତି ଜିଲ୍ଲାର ନାକାରେ ପ୍ରଶାସନ ଏମାନଙ୍କୁ ଧରିଥିଲା। ଏହାପରେ ସେମାନେ ଆନୁଷ୍ଠାନିକ ସଙ୍ଗରୋଧ କେନ୍ଦ୍ରରେ ରହିଥିଲେ । ଏହାପରେ ସେମାନଙ୍କ ଠାରେ କୋରୋନା ଲକ୍ଷଣ ଦେଖାଦେବାରୁ ସେମାନଙ୍କ ସ୍ବାବ ସଂଗ୍ରହ କରାଯାଇଥିଲା ।
ସେହିଭଳି ଅନ୍ୟ ୮ଜଣ ଆକ୍ରାନ୍ତଙ୍କ କୌଣସି ଗସ୍ତସୁଚୀ ନଥିଲେ ମଧ୍ୟ ସ୍ବାସ୍ଥ୍ୟ ଟିମ୍ ଗାଁରେ ସ୍ବାସ୍ଥ୍ୟ ପରୀକ୍ଷା କଲାବେଳେ ଲକ୍ଷଣ ଥିବାରକୁ ତାଙ୍କ ସ୍ବାବ ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା । ଗତ ୨୦ ଏବଂ ୨୧ ରେ ଏମାନଙ୍କ ସ୍ବାବ ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା । ଯାହାର ରିପୋର୍ଟ ବୁଧବାର ହସ୍ତଗତ ହୋଇଥିବା ବେଳେ ପଜିଟିଭ ଥିବା ଜଣାପଡିଛି । ତେଣୁ ଆକ୍ରାନ୍ତ ମାନଙ୍କୁ ତୁରନ୍ତ ଆର.ସୀତାପୁର ସ୍ଥିତ ଜିଲ୍ଲା କୋଭିଡ ହସ୍ପିଟାଲକୁ ସ୍ଥାନାନ୍ତର କରାଯାଇଛି ବୋଲି ଜିଲ୍ଲାପାଳ କହିଛନ୍ତି ।
ଗଜପତିରୁ ହରିହର ପଟ୍ଟନାୟକ, ଇଟିଭି ଭାରତ
