ଢେଙ୍କାନାଳ: ଜିଲ୍ଲାର ଭୁବନ ଅଞ୍ଚଳର ମୃଦଙ୍ଗା ଗ୍ରାମବାସୀମାନେ ପାନୀୟ ଜଳ ଯୋଗାଇଦେବା ଦାବିରେ ମୃଦଙ୍ଗା ପଞ୍ଚାୟତର ମୁଖ୍ୟ ରାସ୍ତାକୁ ଅବରୋଧ କରିଥିଲେ । ତେବେ ତହସିଲଦାର ଓ ବିଡିଓ ବୁଝାସୁଝା କରିବା ପରେ ସେମାନେ ରାସ୍ତାରୁ ହଟିଛନ୍ତି ।
ଲୋକମାନଙ୍କୁ ପାନୀୟ ଜଳ ଯୋଗାଇବା ପାଇଁ ରାଜ୍ୟ ସରକାର ବସୁଧା ଯୋଜନା ପ୍ରଣୟନ କରିଛନ୍ତି । କିନ୍ତୁ ଆଜକୁ ଦୁଇ ମାସ ହେଲା ପାନୀୟ ଜଳରୁ ବଞ୍ଚିତ ହେଉଛନ୍ତି ମୃଦଙ୍ଗା ଗ୍ରାମବାସୀ । ସେହି ଗ୍ରାମରେ ସରକାରଙ୍କ ତରଫରୁ ବସୁଧା ଯୋଜନାରେ ପଚାଶ ହଜାର କ୍ଷମତା ବିଶିଷ୍ଟ ପାନୀୟ ଜଳ ପ୍ରକଳ୍ପ ହୋଇଥିଲା । କିନ୍ତୁ ଗତ ଦୁଇ ବର୍ଷ ହେବ ପାଣି ଠିକ୍ ଭାବରେ ମିଳୁ ନଥିବା ବେଳେ ଏବେ ଏକ ମାସ ହେବ ପାଣି ପାଇ ପାରୁନାହାନ୍ତି ଗ୍ରାମବାସୀ ।
ବାରମ୍ବାର ଅଭିଯୋଗ ସତ୍ତ୍ବେ କେହି ନ ଶୁଣିବାରୁ ବାଧ୍ୟ ହୋଇ ଗ୍ରାମବାସୀମାନେ ଶୁକ୍ରବାର ରାଜରାସ୍ତାକୁ ଓଲହାଇଥିଲେ । ପାାନୀୟ ଜଳ ସମସ୍ୟା ଦୂର ନ ହେବା ପର୍ଯ୍ୟନ୍ତ ରାସ୍ତା ଅବରୋଧ କରିବେ ବୋଲି ଗ୍ରାମବାସୀମାନେ କହିଥିଲେ । ଖବର ପାଇ ଘଟଣାସ୍ଥଳରେ ତହସିଲଦାର ଓ ବିଡିଓ ପହଞ୍ଚି ଲୋକଙ୍କୁ ବୁଝାସୁଝା କରି ପ୍ରତିଶୃତି ଦେବା ପରେ ରାସ୍ତାରୋକରୁ ହଟିଥିଲେ ଗ୍ରାମବାସୀ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
