ଢେଙ୍କାନାଳ : ଗାଡ଼ି ଧକ୍କାରେ ନଅ ବର୍ଷ ଝିଅର ମୃତ୍ୟୁ । ଏଭଳି ଘଟଣା ଘଟିଛି ଭୁବନ ଥାନା ଅନ୍ତର୍ଗତ ପୁରୁଷୋତ୍ତମପୁର ଗ୍ରାମରେ । ଘଟଣା ପରେ ଝିଅର ମୃତଦେହ ରଖି ରାସ୍ତା ଅବରୋଧ କରିଲେ ଗ୍ରାମବାସୀ । ମୃତକ ହେଲେ ପୁରୁଷୋତ୍ତମପୁର ଗ୍ରାମର ଉଦ୍ଧବ ଦେହୁରୀଙ୍କ ସାନ ଝିଅ ଶ୍ରାବଣୀ ଦେହୁରୀ(୯) । ଫଳରେ ଭୁବନେଶ୍ବରରୁ ଢେଙ୍କାନାଳ ଯାତାୟତ ବାଧାପ୍ରାପ୍ତ ହୋଇଛି । ସୂଚନାନୁସାରେ ଭୁବନରୁ ଏକ ମାରୁତି ସୁଇଫ୍ଟ ଗାଡ଼ି ଦୁଇଜଣ ରୋଗୀଙ୍କୁ ନେଇ କଟକ ମେଡିକାଲ ଅଭିମୁଖେ ବାହାରିଥିଲା ।
ତେବେ ଭୁବନ ଥାନା ଅନ୍ତର୍ଗତ ପୁରୁଷୋତ୍ତମ ଗ୍ରାମ ନିକଟରେ ଭାରସାମ୍ୟ ହରାଇ ନଅ ବର୍ଷର ଝିଅକୁ ରାସ୍ତା କଡ଼ ଏକ ଓସ୍ତ ଗଛରେ ନେଇ ଧକ୍କା ଦେଇଥିଲା କାର ଚାଳକ । ଘଟଣାପରେ ଡ୍ରାଇଭର ଫେରାର ହୋଇଯାଇଛି । ସେପେଟେ ଘଟଣାସ୍ଥଳରେ ଉକ୍ତ ଦୁର୍ଘଟଣାକୁ ନେଇ ଚାପା ଉତ୍ତେଜନା ସୃଷ୍ଟି ହୋଇଥିଲା । ଉତ୍ତ୍ୟକ୍ତ ଗ୍ରାମବାସୀ ମୃତଦେହକୁ ରାସ୍ତା ଉପରେ ରଖି କ୍ଷତିପୂରଣ ଦାବିରେ ରାସ୍ତା ରୋକ କରିଥିଲେ । ତେବେ ଘଟଣାସ୍ଥଳରେ ଭୁବନ ପୋଲିସ ପହଞ୍ଚି ଘଟଣାର ତଦନ୍ତ ଜାରି ରଖିଛି ।
ଇଟିଭି ଭାରତ, ଢେଙ୍କାନାଳ
