ଢେଙ୍କାନାଳ: ବିଶ୍ବ ପ୍ରସିଦ୍ଧ ମହିମା ଧର୍ମର ଜୋରନ୍ଦା ମେଳା ଉପରେ ଢେଙ୍କାନାଳ ଜିଲ୍ଲା ପ୍ରଶାସନ ଜାରି କଲା ନୂଆ କଟକଣା । କୋରୋନା ସଂକ୍ରମଣ ସ୍ଥିତିକୁ ନେଇ ପୂର୍ବ ପ୍ରସ୍ତୁତିରେ ପରିବର୍ତ୍ତନ କରାଯାଇଛି । ଜିଲ୍ଲା ତଥା ରାଜ୍ୟ ବାହାର ସାଧୁସନ୍ଥ ଓ ଶ୍ରଦ୍ଧାଳୁଙ୍କୁ ମହିମାଗାଦୀ ମନା ।
ଏହାସହ କୋଭିଡ ନେଗେଟିଭ ରିପୋର୍ଟ ଥିବା ଜିଲ୍ଲାର କେବଳ ସାଧୁଙ୍କୁ ଆସିବାକୁ ଅନୁମତି ମିଳିବ । ବିଶ୍ବ ପ୍ରସିଦ୍ଧ ମହିମା ଧର୍ମର ମୁଖ୍ୟପୀଠ ଢେଙ୍କାନାଳର ମହିମା ଗାଦୀରେ ଆସନ୍ତା ୨୫ ରେ ହେବାକୁ ଥିବା ପ୍ରସିଦ୍ଧ ଜୋରନ୍ଦା ମେଳା ପ୍ରସ୍ତୁତିରେ ପରିବର୍ତନ କରାଯାଇଛି ।
ପୂର୍ବରୁ ଜୋରନ୍ଦା ମେଳା ପାଇଁ ମେଳା କମିଟି ଓ ପ୍ରଶାସନ ପକ୍ଷରୁ ହୋଇଥିବା ପ୍ରସ୍ତୁତି ବୈଠକରେ ନିଷ୍ପତି ଉପରେ ଏବେ କଟକଣା ଜାରି କରାଯାଇଛି । ସାମ୍ପ୍ରତିକ ସ୍ଥିତିରେ କୋରୋନା ସଂକ୍ରମଣ ଦୃଷ୍ଟିରୁ ଢେଙ୍କାନାଲ ଜିଲ୍ଲା ପ୍ରଶାସନ ନୂଆ ଗାଇଡ଼ଲାଇନ ଜାରି କରାଯାଇଛି ।
ଏପରିକି ଚଳିତବର୍ଷ ମେଳାକୁ କେବଳ ବିଧି ପାଳନରେ ସୀମିତ ରଖାଯିବ। ଜିଲ୍ଲା ତଥା ରାଜ୍ୟ ବାହାର ସାଧୁସନ୍ଥଙ୍କ ଠାରୁ ଆରମ୍ଭ କରି ସର୍ବସାଧରଣଙ୍କୁ ମେଳାକୁ ସମ୍ପୂର୍ଣ୍ଣ ବାରଣ କରାଯାଇଛି । ତେବେ କେବଳ ଜିଲ୍ଲାର ମହିମା ସାଧୁ ମାନଙ୍କ ମଧ୍ୟରେ ଚଳିତବର୍ଷ ଏହି ମେଳା ସୀମିତ ରହିବ । ତେବେ ମେଳାରେ ସାମିଲ ମହିମା ସାଧୁ ମାନଙ୍କର କୋଭିଡ ନେଗେଟିଭ ରିପୋର୍ଟ ବାଧ୍ୟତାମୂଳକ କରାଯାଇଛି ।
ଅପରପକ୍ଷରେ ଆସନ୍ତା ୨୫ଓ ୨୬ ଦୁଇଦିନ ଧରି ମହିମା ପରମ୍ପରା ମୁତାବକ ହେଉଥିବା ମେଳାରେ ମୁଖ୍ୟ ଗାଦିମନ୍ଦିର ପରିସରରେ କୋଭିଡ କଟକଣା ମଧ୍ୟରେ ଅତି ବେଶୀରେ ୫୦ଜଣ ସାଧୁଙ୍କ ମଧ୍ୟରେ ଝାଡ଼ବତୀ ଓ ଧ୍ବନୀ ପ୍ରଜ୍ବଳନ ମଧ୍ୟରେ ସୀମିତ ରହିବ ବୋଲି ଆଜି(ରବିବାର) ଢେଙ୍କାନାଲ ଜିଲ୍ଲା ପ୍ରଶାସନ ପକ୍ଷରୁ ନୂଆ ଗାଇଡ଼େଲାଇନ ଜାରି କରାଯାଇଛି।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
