ପଞ୍ଚୁଦୋଳ ପାଇଁ ଗାଁ ଥିଲା ଉତ୍ସବ ମୁଖର । ମାତ୍ର ଯାତ୍ରା ପଡିଆରେ ଗର୍ଜି ଉଠିଲା ଗାଁ ସଭାପତିଙ୍କ ବନ୍ଧୁକ । ଘଟଣାସ୍ଥଳରେ ଟଳିପଡିଲେ ଜଣେ ପୋଲିସ କନେଷ୍ଟବଳ । ପୋଲିସ ଉପସ୍ଥିତିରେ ଏହି ଗୁଳିକାଣ୍ଡ ନେଇ ସ୍ତବ୍ଧ ହୋଇଯାଇଛି ସାରା ଗାଁ ।
ଏହି ଗୁଳିକାଣ୍ଡରେ ମୃତ୍ୟୁ ଘଟିଥିବା ପୋଲିସ କନଷ୍ଟେବଳ ରାମଚନ୍ଦ୍ର ସାହୁଙ୍କ ମୃତଦେହ କଟକରୁ ବ୍ୟବଚ୍ଛେଦ ପରେ ଶନିବାର ଅପରାହ୍ନରେ ଗ୍ରାମ ଚଉଳିଆରେ ପହଞ୍ଚିଥିଲା । ତେବେ ରାମଚନ୍ଦ୍ରଙ୍କ ହତ୍ୟା ଅଭିଯୁକ୍ତ ଗାଁ ସଭାପତି ଶ୍ରୀକାନ୍ତ ସାହୁଙ୍କୁ ଗିରଫ ଦାବିରେ ଗ୍ରାମବାସୀମାନେ ରାସ୍ତାକୁ ଓହ୍ଲାଇଥିଲେ । ରାମଚନ୍ଦ୍ରଙ୍କ ମୃତଦେହକୁ ଖମାର ଛକରେ ରାସ୍ତାରେ ରଖି ଢେଙ୍କାନାଳ ବଣସିଙ୍ଗ ମୁଖ୍ୟରାସ୍ତାକୁ ଅବରୋଧ କରି ଅଡିବସିଥିଲେ । ଫଳରେ ସାଧାରଣ ଯାତାୟତ ଠପ୍ ହୋଇ ଉତ୍ତେଜନା ବଢିଥିଲା ।
ପରେ ପୋଲିସ ପ୍ରଶାସନ ପକ୍ଷରୁ ଘଟଣାସ୍ଥଳରେ ଏସପି ପହଞ୍ଚି ତୁରନ୍ତ ଗିରଫ ପାଇଁ ପ୍ରତିଶୃତି ଦେବାରୁ ଅବରୋଧ ହଟିଥିଲା ।
