ଢେଙ୍କାନାଳ: ଲକଡାଉନରେ ମଉଳିଗଲା ନିରୀହ ଜୀବନ ଦୀପ । ପରିବାର ପ୍ରତିପୋଷଣ ପାଇଁ ସୁଦୂର ଗୁଜୁରାଟର ସୁରଟ ସହରକୁ ଯାଇ ଏକ ସୂତା କାରଖାନାରେ କାମ କରୁଥିବା ଜଣେ ଯୁବକଙ୍କର ମୃତ୍ୟୁ ଘଟିଛି । ଲକଡାଉନ ଯୋଗୁଁ ଘରକୁ ଫେରି ନପାରି ନିଜ ମା'ଙ୍କ ସହ ମୋବାଇଲରେ କଥା ହେଉଥିବା ବେଳେ 4 ମହଲା କୋଠା ଉପରୁ ତଳକୁ ଖସି ପଡିଥିଲେ ସମ୍ପୃକ୍ତ ଯୁବକ । ଆଉ ଘଟଣାରେ ଆଖି ବୁଜିଥିଲେ ଢେଙ୍କାନାଳ ପରଜଙ୍ଗ କଙ୍କିଳି ଗ୍ରାମର କୁମୁଦ ନାୟକଙ୍କ ସାନ ପୁଅ ଆଲୋକ ନାୟକ । ହେଲେ ଲକଡାଉନରେ ପୁଅର ମରଶରୀର ଆଣିବା ସମ୍ଭବ ହେଉନଥିବାରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ସାହାଯ୍ୟ ମାଗିଥିଲେ ପରିବାର ।
ସହାୟତା ସ୍ବରୂପ ଧର୍ମେନ୍ଦ୍ର ଏକ ସ୍ବତନ୍ତ୍ର ଆମ୍ବୁଲାନ୍ସ ଯୋଗେ ଆଲୋକଙ୍କ ମୃତଦେହକୁ ଘରକୁ ଆଣିବାର ବ୍ୟବସ୍ଥା କରିଥିଲେ । ଶୁକ୍ରବାର ଏହି ସ୍ବତନ୍ତ୍ର ଆମ୍ବୁଲାନ୍ସ ଯୋଗେ ଆଲୋକଙ୍କ ମର ଶରୀର ଗାଁରେ ପହଞ୍ଚିଥିବା ବେଳେ ଗାଁରେ ସୃଷ୍ଟି ହୋଇଥିଲା ଶୋକାକୁଳ ପରିବେଶ । ସୂଚନା ଅନୁଯାୟୀ ଆଲୋକ ସୁରଟର ରାଜ କ୍ରସନ ସୂତା କାରଖାନାରେ ଶ୍ରମିକ ଥିବାବେଳେ ପାଣ୍ଡେରସ୍ଥିତ ସୁଧା କଲୋନୀରେ ସେ କିଛି ଓଡିଆ ବନ୍ଧୁଙ୍କ ସହ ରହୁଥିଲେ । ହେଲେ ଗତ 28 ତାରିଖରେ ମା’ଙ୍କ ସହ କଥା ହେଉଥିବା ବେଳେ ରହୁଥିବା ଘରର ଛାତରୁ ଅସାବଧାନତାବଶତଃ ତଳକୁ ଖସି ପଡିଥିଲେ । ତାଙ୍କୁ ତୁରନ୍ତ ଉଦ୍ଧାର କରାଯାଇ ନିକଟସ୍ଥ ସ୍ମିମର୍ସ ଡାକ୍ତରଖାନାରେ ଭର୍ତ୍ତି କରାଯାଇଥିଲେ ହେଁ ସେଠାରେ ତାଙ୍କର ମୃତ୍ୟୁ ହୋଇଥିଲା ।
ଶୁକ୍ରବାର କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହଯୋଗରେ ଆଲୋକଙ୍କ ମରଶରୀର ଗାଁରେ ପହଞ୍ଚିବା ପରେ ଗାଁ ଶ୍ମଶାନରେ ସାମାଜିକ ଦୂରତା ବଜାୟ ରଖି ତାଙ୍କର ଅନ୍ତ୍ୟେଷ୍ଟି କ୍ରିୟା ସମ୍ପନ୍ନ ହୋଇଥିଲା ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
