ଢେଙ୍କାନାଳ: ଭୁବନ ଥାନା ଅନ୍ତର୍ଗତ ଅସୁରବନ୍ଧ ଗ୍ରାମରେ ଜଘନ୍ୟକାଣ୍ଡ । ଦିଅର ଟାଙ୍ଗିଆ ଚୋଟରେ ଭାଉଜର ମୃତ୍ୟୁ । 5ବର୍ଷର ଶିଶୁ ଗୁରୁତର ଆହତ । ଭୁବନ ଡାକ୍ତରଖାନାରେ ଭର୍ତ୍ତି ।
ଗ୍ରାମର ସଦାନନ୍ଦ ମଳିକଙ୍କ ତୃତୀୟ ପୁଅ ରବିନ୍ଦ୍ର ମଳିକ ନିଜ ଘରେ ଘଟାଇଛି ଉନ୍ମତ୍ତକାଣ୍ଡ। ଏକ ଧାରୁଆ ଟାଙ୍ଗିଆରେ ବଡ ଭାଇ ଅଭିମନ୍ୟୁ ମଳିକଙ୍କ ପତ୍ନୀ ମିଲୀ ମଳିକଙ୍କୁ ହାଣୀ ହତ୍ୟା କରିଛି । ଅପରପକ୍ଷରେ ଟାଙ୍ଗିଆରେ ଆକ୍ରମଣରେ ଅଳ୍ପକେ ଜୀବନବଞ୍ଚି ଯାଇଥିଲେ ମଧ୍ୟ ମୃତ ମିଲିଙ୍କ 5ବର୍ଷର ଶିଶୁ କନ୍ୟା ଗୁରୁତର ହୋଇଛି । ଗୁରୁତର ଅବସ୍ଥାରେ ତାକୁ ଭୁବନ ଡାକ୍ତର ଖାନାରେ ଭର୍ତ୍ତି କରାଯାଇଛି ।
ଶିଶୁ କନ୍ୟାର ମୁଣ୍ଡରେ ଚୋଟ ଲାଗିଛି । ଏପରି ଜଘନ୍ୟ ହତ୍ୟାକାଣ୍ଡ ଘଟାଇଥିବା ପରେ ମଧ୍ୟ ଅନ୍ୟମାନଙ୍କୁ ଆକ୍ରମଣ କରିବା ପାଇଁ ଉଦ୍ୟମ କରିବାବେଳେ ରବୀନ୍ଦ୍ର ମଳିକକୁ ଗ୍ରାମବାସୀ କାବୁ କରି ଭୁବନ ପୋଲିସର ଜିମା ଦେଇଛନ୍ତି ।
ସେପଟେ ଭୁବନ ଥାନା ପୋଲିସ ପହଞ୍ଚି ମୃତଦେହ ଜବତ କରି ତଦନ୍ତ ଚଳାଇଛି । ସୂଚନା ମୁତାବକ, ଚାରି ବର୍ଷ ହେବ ଅଭିଯୁକ୍ତ ରବିନ୍ଦ୍ର ମଳିକ ବିବାହ କରିଥିଲେ ମଧ୍ୟ ତାଙ୍କ ପତ୍ନୀ ତାକୁ ଛାଡି ପଳାଇଥିବା ଜଣାପଡିଛି । ତେବେ ରବୀନ୍ଦ୍ର ତାଙ୍କ ଭାଇ ମାନଙ୍କ ସହ ରହୁଥିଲେ । ଫଳରେ ସେ ମାନସିକ ବିକାରଗସ୍ତ ଯୋଗୁଁ ଏପରି ହତ୍ୟାକାଣ୍ଡ ଘଟାଇଥିବା ଅନୁମାନ କରାଯାଇଛି ।
ଗତକାଲି ରାତିରେ ପରିବାର ଲୋକେ ଖାଇପିଇ ସାରିବା ପରେ ସମସ୍ତ ପୁରୁଷମାନେ ଗ୍ରାମ ନିକଟ ବିଲକୁ ପାଣି ଦେଖିବାକୁ ଯାଇଥିବାବେଳେ ଏପରି ଘଟଣା ଘଟିଥିବା ଜଣାପଡିଛି । ମିଲି ଓ ତାଙ୍କ 5ବର୍ଷର ଝିଅ ଅଭିଶା ମଳିକ ଏକାଠି ଶୋଇଥିବା ସମୟରେ ରବିନ୍ଦ୍ର ଟାଙ୍ଗିଆରେ ମିଲିର ବେକରେ ଚୋଟ ମାରିଥିଲା । ଘଟଣାସ୍ଥଳରେ ମିଲିର ମୃତ୍ୟୁ ହୋଇଥିଲା । ତେବେ ଏହି ଆକ୍ରମଣରେ ଟାଙ୍ଗିଆ ଚୋଟ ବାଜି ମିଲିଙ୍କ ଝିଅ ଅଭିଶା ଗୁରୁତର ହୋଇଥିଲେ।
ପରେ ଖବର ପାଇ ସ୍ବାମୀ ଅଭିମନ୍ୟୁ ମଳିକ ଘରେ ପହଞ୍ଚି ଦେଖିବା ପରେ ଭୁବନ ପୋଲିସକୁ ଖବର ଦେଇଥିଲେ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
