ଢେଙ୍କାନାଳ: ମିଳିଲେ ନିଖୋଜ ହିନ୍ଦୋଳ ନୂଆଗାଁ ପଞ୍ଚାୟତ ସମିତି ସଭ୍ୟ ପ୍ରାର୍ଥୀ । ଦୁଇ ଦିନ ହେଲା ନିଖୋଜ ଥିଲେ ପ୍ରାର୍ଥୀ ସୁବ୍ରତ ବେହେରା । ଭାପୁର ଫାଣ୍ଡି ଅନ୍ତର୍ଗତ ବେଗୁନିଆପାଳ ଗାଁରୁ ଉଦ୍ଧାର ହୋଇଛନ୍ତି ।
ତେବେ ତାଙ୍କ ନିଖୋଜ ହେବା ପରେ ପରିବାର ପକ୍ଷରୁ କଣ୍ଟାବଣିଆ ଥାନାରେ କରାଯାଇଥିଲା ଅଭିଯୋଗ । ଅଭିଯୋଗ ପରେ ପୁଲିସ ଆରମ୍ଭ କରିଥିଲା ତଦନ୍ତ । ତେବେ ସେ କାହିଁକି ଓ କିପରି ନିଖୋଜ ହେଲେ ଏ ସମ୍ପର୍କରେ ପୋଲିସ ପକ୍ଷରୁ ସୂଚନା ଦିଆଯାଇ ନାହିଁ ।
ସେହିପରି ସୁବ୍ରତଙ୍କୁ ଭାପୁର ଫାଣ୍ଡିରୁ ଢେଙ୍କାନାଳକୁ ନେଇ ପୁଲିସ ପଚରାଉଚରା କରୁଛି । ସୁବ୍ରତ ବେହେରା ଢେଙ୍କାନାଳ ଜିଲ୍ଲା ହିନ୍ଦୋଳ ବ୍ଲକ ଅନ୍ତର୍ଗତ ନୂଆଗାଁ ଗ୍ରାମ ପଞ୍ଚାୟତର ବିଜେଡି ସମର୍ଥିତ ସମିତି ସଭ୍ୟ ପ୍ରାର୍ଥୀ । ମଙ୍ଗଳବାର ତାଙ୍କ ଗ୍ରାମ କଣ୍ଟାବଣିଆ ଥାନା ଅନ୍ତର୍ଗତ ନୂଆଗାଁରୁ ବାଇକ ଯୋଗେ ନିମବାହାଳି ଛକକୁ ନିଜର ପୋଷ୍ଟର ତିଆରି ପାଇଁ ଯାଇ ଆଉ ଘରକୁ ଫେରିନଥିଲେ ।
ହେଲେ ପରିବାର ପକ୍ଷରୁ ଖୋଜା ଖୋଜି ପରେ ନ ପାଇବାରୁ ମଙ୍ଗଳବାର ରାତିରେ କଣ୍ଟାବଣିଆ ଥାନାରେ ଲିଖିତ ଅଭିଯୋଗ କରିଥିଲେ । ଗତକାଲି ପୁଲିସ ନିମବାହାଳି ଛକର ୫୦ ମିଟର ଦୂରରରୁ ନିଖୋଜ ସୁବ୍ରତଙ୍କ ବାଇକକୁ ଠାବ କରି ତଦନ୍ତ କରୁଥିଲା । ସୁବ୍ରତଙ୍କ ମୋବାଇଲ ଟ୍ରାକିଂ ଜରିଆରେ ଉଦ୍ଧାର କରିଛି ପୋଲିସ ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
