ଢେଙ୍କାନାଳ: ଭୁବନ ଥାନାର ମାର୍ଥାପୁରରେ ନାବାଳିକାଙ୍କୁ ଦୁଷ୍କର୍ମ ଓ ଭିଡିଓ ଭାଇରାଲ ଘଟଣାର ଶୁକ୍ରବାର ରାୟପ୍ରକାଶ ପାଇଛି । ଢେଙ୍କାନାଳ ସ୍ବତନ୍ତ୍ର ପୋକ୍ସୋ ଅଦାଲତ ଏହି ମାମଲାର ବିଚାର କରି ରାୟ ଶୁଣାଣି କରିଛନ୍ତି। ଘଟଣାର ମୁଖ୍ୟ ଅଭିଯୁକ୍ତ ଶତ୍ରୁଘ୍ନ ସାହୁକୁ 20ବର୍ଷ ସଶ୍ରମ କାରାଦଣ୍ଡ ସହ 20 ହଜାର ଟଙ୍କା ଜୋରିମାନା ଶୁଣାଇଛନ୍ତି । ଜୋରାମାନା ଅନାଦେୟ କଲେ ଆହୁରି ଏକ ବର୍ଷ କାରାଦଣ୍ଡାଦେଶ ମିଳିବ ।
ସେହିପରି ଘଟଣାରେ ଅନ୍ୟ ଏକ ସହଯୋଗୀ ଶେଷଦେବ ବାରିକକୁ 2 ବର୍ଷ ସଶ୍ରମ କାରାଦଣ୍ଡ ଦେଇଥିବା ବେଳେ ଅନ୍ୟ ଅଭିଯୁକ୍ତ ଗୋବିନ୍ଦ ମିଶ୍ରକୁ ପ୍ରମାଣ ଅଭାବରୁ ଖଲାସ କରାଯାଇଛି । ସୂଚନାଯୋଗ୍ୟ, ଗତ 2015 ମସିହା ଜୁଲାଇ 20 ତାରିଖରେ ଜଣେ ନାବାଳିକାକୁ ଦୁଷ୍କର୍ମ କରାଯାଉଥିବାର ଏକ ଭିଡିଓ ଭାଇରାଲ ହୋଇଥିଲା । ଘଟଣାକୁ ନେଇ ମାର୍ଥାପୁର ଗ୍ରାମ ସଭାପତିଙ୍କ ପୁଅ ଶିବାନୀ ପ୍ରସାଦ ମିଶ୍ର ଭୁବନ ଥାନାରେ ଅଭିଯୋଗ କରିଥିଲେ। ଭୁବନ ପୋଲିସ ମାମଲାର ତଦନ୍ତ କରି ଘଟଣାରେ ସମ୍ପୃକ୍ତ ଥିବା ମାର୍ଥାପୁର 3 ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ଯାହାର ବିଚାର ଢେଙ୍କାନାଳ ସ୍ବତନ୍ତ୍ର ପୋକ୍ସୋ ଅଦାଲତରେ ଚାଲିଥିଲା ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
