ଢେଙ୍କାନାଳ: ନାରୀ ସୃଷ୍ଟିର ଆଧାର । ନାରୀ ବିନା ସଂସାରର ପରିକଳ୍ପନା ଅସମ୍ଭବ। ନାରୀ ଗର୍ଭରୁ ଜନ୍ମ ନେଇ ସେ ନିଜେ ପୁଣି ଏକ ପରିପୂର୍ଣ ନାରୀଟିଏ ହୁଏ। ଗୋଟିଏ ସଂସାରକୁ ଜାବୁଡି ଧରେ ସୁଖରେ ଓ ଦୁଃଖରେ। ସଂସାରରେ ତାର ତ୍ୟାଗ ଅସୀମ। ତମାମ ବାଧା ବିଘ୍ନ ସତ୍ତ୍ବେ ନିଜକୁ ଜଣେ ସଫଳ ମହିଳା ଉଦ୍ୟୋଗୀ ଭାବେ ପରିଚିତ କରିଥିବା ଏପରି ଜଣେ ନାରୀ ହେଉଛନ୍ତି ଢେଙ୍କାନାଳର ଯାଜ୍ଞସେନୀ ଜେନା ।
ଢେଙ୍କାନାଳ ଜିଲ୍ଲା ଗୋବିନ୍ଦପୁର ଅଞ୍ଚଳର ଯାଜ୍ଞସେନୀ ଜେନା । ଯିଏ ଅଞ୍ଚଳରେ ବୋଇ ଅପା ଭାବେ ପରିଚିତ । ସ୍ବାମୀଙ୍କ ଶାରିରୀକ ଅକ୍ଷମତା ପରେ ପରିବାରର ଗୁଜୁରାଣ ମେଣ୍ଟାଇବା ପାଇଁ ଯାଜ୍ଞସେନୀଙ୍କୁ ଘର ଘର ବୁଲି କ୍ଷୀର ବିକ୍ରି କରିବାକୁ ପଡିଥିଲା । ଜୀବନ ସଂଗ୍ରାମରେ ନିଜର ଧର୍ଯ୍ୟ, ନିଷ୍ଠା ଓ ଏକାଗ୍ରତାକୁ ପାଥେୟ କରି ଆଜି ଯାଜ୍ଞସେନୀ ପାଲଟିଯାଇଛନ୍ତି ଢେଙ୍କାନାଳର ଜଣେ ସୁପରିଚିତ ମହିଳା ଉଦ୍ୟୋଗୀ। ବହୁ ବାଧା ବିଘ୍ନ ସତ୍ତ୍ବେ ଗୋବିନ୍ଦପୁରରେ ଗଢି ଉଠିଛି ତାଙ୍କର ଗୋବିନ୍ଦ ଧୂପକାଠୀ ଉଦ୍ୟୋଗ । 2012 ମସିହାରୁ ନିଜେ ଘରେ ଆରମ୍ଭ କରିଥିବା ଏହି ଉଦ୍ୟୋଗ ଯାଜ୍ଞସେନୀଙ୍କ ପରିବାରର ଆର୍ଥିକ ଗୁଜୁରାଣ ମେଣ୍ଟାଇବା ସହ ଅନ୍ୟ ମହିଳାଙ୍କୁ ମଧ୍ୟ ପରିବାରର ଗୁଜୁରାଣ ମେଣ୍ଟାଇବାରେ ସହାୟକ ହୋଇ ପାରିଛି ।
ଏଠାରେ ପ୍ରସ୍ତୁତ ହର୍ବଲ ଧୂପକାଠୀ, କୃଷ୍ଣ ଦର୍ଶନ ଓ ଝୁଣା ଧୂପର ବଜାରରେ ବେଶ ଚାହିଦା ରହିଛି । ଏହାସହ ହୋମ କୁଣ୍ଡ ଓ କାଠି ବିହୀନ କୋନ ଧୂପର ମଧ୍ୟ ବଜାର ଚାହିଦା ବୃଦ୍ଧି ପାଇବାରେ ଲାଗିଛି । ଓରମାସ ପକ୍ଷରୁ ରାଜ୍ୟର ବିଭିନ୍ନ ସ୍ଥାନରେ ଆୟୋଜିତ ପଲ୍ଲୀଶ୍ରୀ ମେଳା ମେଳା ଠାରୁ ଆରମ୍ଭ କରି ବିଭିନ୍ନ ମେଳା ଯାତ୍ରାରେ ଏହି ଗୋବିନ୍ଦ ଧୂପକାଠି କ୍ଲଷ୍ଟରର ଷ୍ଟଲ ଲାଗିଥାଏ । ଯାହା ଦ୍ବାରା ବେଶ ଦୁଇ ପଇସା ରୋଜଗାର କରି ପାରନ୍ତି ଗୋବିନ୍ଦ ଧୂପକାଠୀ ଉଦ୍ୟୋଗର ମହିଳା ମାନେ ।
ନିଜ ଉଦ୍ୟମ ବଳରେ ପୁଅକୁ ପାଠ ପଢ଼ାଇ ଏନଡିଏ ପରେ ଏବେ ଭାରତୀୟ ସେନାରେ ଲେଫ୍ଟନାଣ୍ଟ କର୍ଣ୍ଣେଲ କରାଇପାରି ପରିବାରର ସ୍ବତନ୍ତ ପରିଚୟ ସୃଷ୍ଟି କରିପାରିଛନ୍ତି ଯାଜ୍ଞସେନୀ । ଗୋବିନ୍ଦ ଧୂପକାଠି ମାଧ୍ୟମରେ ଦୈନିକ ଏକ କୁଇଣ୍ଟାଲରୁ ଉର୍ଦ୍ଧ୍ବ ଧୂପକାଠି ପ୍ରସ୍ତୁତ ହେଉଥିବା ବେଳେ ବାର୍ଷିକ ସମସ୍ତ ଖର୍ଚ୍ଚ ପରେ ପ୍ରାୟ ଅଢେଇରୁ ତିନି ଲକ୍ଷ ଟଙ୍କା ଲାଭ ମିଳିଥାଏ ବୋଲି କୁହନ୍ତି ଯାଜ୍ଞସେନୀ । ତାଙ୍କ କାର୍ଯ୍ୟ ଦକ୍ଷତା, ନିଷ୍ଠା ଯୋଗୁଁ ସେ ପାଇଛନ୍ତି ଅନେକ ପୁରସ୍କାର ଓ ସମ୍ବର୍ଦ୍ଧନା। ଏପରିକି ଓରମାସ ପକ୍ଷରୁ ଏବେ 16ଟି ମହିଳା ସ୍ବୟଂ ସହାୟକ ଗୋଷ୍ଠୀକୁ ଏହି ଗୋବିନ୍ଦ ଧୂପକାଠି କ୍ଲଷ୍ଟରରେ ସାମିଲ କରିଥିବା ଜଣାପଡ଼ିଛି ।
ମାତ୍ର 10 ଜଣ ମହିଳାଙ୍କୁ ନେଇ ଆରମ୍ଭ କରିଥିବା ଏହି ଉଦ୍ୟୋଗରେ ବର୍ତ୍ତମାନ 70 ଜଣ ମହିଳା କାର୍ଯ୍ୟ କରୁଛନ୍ତି । ନିଜର ଦୈନନ୍ଦିନ କାମ ସାରି ଧୂପକାଠୀ ଉଦ୍ୟୋଗରେ କାମ କରି ରୋଜଗାରର ପନ୍ଥା ପାଇଥିବା ମହିଳା ମାନେ ବେଶ ଖୁସି । ନିଜ ଉଦ୍ୟମ ବଳରେ ଧୂପକାଠୀ ଉଦ୍ୟୋଗ ଆରମ୍ଭ କରି ଅନ୍ୟ ମହିଳା ମାନଙ୍କୁ ସ୍ବାବଲମ୍ବୀ କରିଥିବା ଯାଜ୍ଞସେନୀ ସଭିଙ୍କ ପାଇଁ ଉଦାହରଣ ପାଲଟି ଯାଇଛନ୍ତି ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
