ଢେଙ୍କାନାଳ: ସାତ ଜନ୍ମର ସାଥୀ ହୋଇ ବନ୍ଧନରେ ବାନ୍ଧି ହୋଇଥିଲେ । ଏଥିପାଇଁ ବୋଧେ ଆଗପଛ ହୋଇ ଚାଲିଗଲେ ପତିପତ୍ନୀ । ଢେଙ୍କାନାଳ ସଦର ଥାନା ଅନ୍ତର୍ଗତ ହରେକୃଷ୍ଣପୁର ଗ୍ରାମରେ ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ପତ୍ନୀର ମୃତ୍ୟୁ ଖବର ପାଇ ଗାଁକୁ ବାଇକ ଯୋଗେ ଜଣେ ବନ୍ଧୁଙ୍କୁ ନେଇ ଘରକୁ ଫେରୁଥିଲେ ସ୍ୱାମୀ । ଆଉ ଅଧା ବାଟରେ ସଡ଼କ ଦୁର୍ଘଟଣାରେ ସ୍ୱାମୀଙ୍କ ମଧ୍ୟ ମୃତ୍ୟୁ ଘଟିଛି ।
ହରେକୃଷ୍ଣପୁର ଗ୍ରାମର ଦିଲ୍ଲୀପ ନାୟକ ତାଙ୍କ ପତ୍ନୀଙ୍କ ମୃତ୍ୟୁ ଖବର ପାଇ ଗଁନ୍ଦିଆରୁ ବାଇକ ଯୋଗେ ବନ୍ଧୁ ହେମନ୍ତ ବେହେରାଙ୍କୁ ନେଇ ଗାଁକୁ ଫେରୁଥିଲେ । ତେବେ ଢେଙ୍କାନାଳ ଗଁନ୍ଦିଆ ରାସ୍ତାର ବିଶ୍ୱନାଥପୁର ନିକଟରେ ତାଙ୍କ ବାଇକ ଭାରସାମ୍ୟ ହରାଇ ରାସ୍ତା ପାର୍ଶ୍ଵ ଥିବା ଏକ ଗଛରେ ପିଟି ହୋଇଥିଲା । ଘଟଣାସ୍ଥଳରେ ଦିଲ୍ଲୀପ ନାୟକଙ୍କର ମୃତ୍ୟୁ ଘଟିଥିବା ବେଳେ ତାଙ୍କ ବନ୍ଧୁ ହେମନ୍ତ ବେହେରା ଗୁରୁତର ଆହତ ହୋଇଛନ୍ତି । ସେପଟେ ଦିଲ୍ଲୀପଙ୍କ ପତ୍ନୀ ଆତ୍ମହତ୍ୟା କରିଥିବା ଅଭଯୋଗ ହୋଇଛି ।
ଗୁରୁତର ହେମନ୍ତଙ୍କୁ ଚିକିତ୍ସା ପାଇଁ ୧୦୮ ଆମ୍ବୁଲାନ୍ସ ଯୋଗେ ଢେଙ୍କାନାଳ ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି । ଦିଲ୍ଲୀପଙ୍କ ଗତ ଦୁଇ ମାସ ପୂର୍ବେ ପ୍ରେମ ବିବାହ ହୋଇଥିଲା । ଏହି ବିବାହକୁ ଦିଲ୍ଲୀପଙ୍କ ଘରେ ତାଙ୍କ ବାପା ଓ ମା ସ୍ୱୀକାର କରୁନଥିଲେ । ତେବେ ବହୁ ଚେଷ୍ଟା ପରେ ଉଭୟଙ୍କ ପ୍ରେମ ସଫଳ ହୋଇଥିଲା ଓ ଦୁହେଁ ବିବାହ ବନ୍ଧନରେ ବାନ୍ଧି ହୋଇଥିଲେ । ତେବେ ନିୟତି କିଛି ଅଲଗା ହିଁ ଲେଖା ଥିଲା ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
