ଢେଙ୍କାନାଳ: ବନବିଭାଗ ଦ୍ବାରା ଗିରଫ ହେଲା ବନ୍ୟଜନ୍ତୁ ଶିକାରୀ । ଢେଙ୍କାନାଳ ଜିଲ୍ଲା ଷଢଙ୍ଗୀ ବନକର୍ମଚାରୀମାନେ ଚଢ଼ାଉ କରି ଦୁଇଟି ହରିଣ ମୁଣ୍ଡ ଓ ଗୋଟିଏ ବାରହା ମୃତଦେହ ଉଦ୍ଧାର କରିଛନ୍ତି। ଏହାସହ ୩ଟି ବନ୍ଧୁକ ଜବତ କରିବା ସହ ଦୁଇ ଶିକାରୀଙ୍କୁ ଗିରଫ କରିଛି ବନବିଭାଗ।
ଢେଙ୍କାନାଳ ବନଖଣ୍ଡରେ ବାରମ୍ବାର ଚଢ଼ାଉ ସତ୍ତ୍ବେ ଥମୁନାହିଁ ବନ୍ୟଜନ୍ତୁ ଶିକାର । ଏପରିକି ଦୁଇଟି ହରିଣ ଓ ଗୋଟିଏ ବାରହାକୁ ଶିକାର କରି ଶିକାରୀମାନେ ମାଂସ କାଟି ବିକ୍ରି କରୁଥିବାବେଳେ ଷଢଙ୍ଗୀ ବନକର୍ମଚାରୀମାନେ କାବୁ କରିଛନ୍ତି ।
ଗିରଫ ଶିକାରୀ ଦୁଇଜଣ ଢେଙ୍କାନାଳ ସଦର ଥାନା ଅନ୍ତର୍ଗତ ନାଗିଆପଶିର କ୍ଷେତ୍ରବାସୀ ପ୍ରଧାନ ଓ ନାଠୁଆ ଗ୍ରାମର ବରଜୁ ନାଏକ ବୋଲି ଜଣାପଡିଛି । ତେବେ ଅନ୍ୟମାନେ ଫେରାର ହୋଇଯାଇଛନ୍ତି । ଢେଙ୍କାନାଳ ବନଖଣ୍ଡର ଷଢଙ୍ଗୀ ବନାଞ୍ଚଳର ରୁପାବଳିଆ ସଂରକ୍ଷିତ ଜଙ୍ଗଲରୁ ଏହି ଜଙ୍ଗଲୀ ପ୍ରାଣୀମାନଙ୍କୁ ଶିକାର କରି ସେମାନଙ୍କ ମାଂସ କାଟି ବିକ୍ରି କରୁଥିବାବେଳେ ଖବର ପାଇ ବନକର୍ମଚାରୀମାନେ ଚଢ଼ାଉ କରିଥିଲେ।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
