ଢେଙ୍କାନାଳ: ବନଖଣ୍ଡ ଅନ୍ତର୍ଗତ ହିନ୍ଦୋଳ ବନାଞ୍ଚଳର ବେଡାପଡା ଗାଁ ନିକଟରେ ଚାଷୀଙ୍କୁ ହାତୀ ଆକ୍ରମଣ କରିଛି । ବେଡାପଡ଼ା ବିଲମାଲରେ ଜଣେ ଚାଷୀଙ୍କୁ ଏକ ଦନ୍ତା ହାତୀ କଚାଡି ପାଦରେ ଚାପି ଦେଇଛି । ଫଳରେ ଉକ୍ତ ଚାଷୀଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି । ମୃତ ଚାଷୀ ଜଣଙ୍କ ବେଡାପଡା ଗାଁର ଭୋଳେଶ୍ବର ଦେହୁରୀ ବୋଲି ଜଣାପଡିଛି ।
ରବିବାର ରାତିରେ ଭୋଳେଶ୍ବର ଓ ଅନ୍ୟଜଣେ ଚାଷୀ ବିଲକୁ ପାଣି ଦେଖିବାକୁ ଯାଇଥିବା ବେଳେ ଏହି ଦନ୍ତା ହାବୁଡ଼ରେ ପଡିଯାଇଥିଲେ । ତେବେ ଅନ୍ୟ ଜଣଙ୍କ ହାତୀ ଆକ୍ରମଣରୁ ଅଳ୍ପକେ ବର୍ତ୍ତି ଯାଇଥିବା ଜଣାପଡିଛି ।
ଖବରପାଇ ଆଜି (ସୋମବାର) ବନ କର୍ମଚାରୀମାନେ ପହଞ୍ଚି ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛନ୍ତି।
ଢେଙ୍କାନାଳରୁ ଉର୍ମିଳା ପାତ୍ର, ଇଟିଭି ଭାରତ
